૧૬ કોમર્શિયલ ગેસના સિલિન્ડર ચોરી કરનાર નડિયાદમાં પકડાયો
(પ્રતિનિધિ) નડિયાદ, ખેડા જિલ્લા લોકલ ક્રાઈમ બ્રાન્ચે નડિયાદ ટાઉન પોલીસ મથકની હદમાં આવેલ પીજ ભાગોળ વિસ્તારમાંથી થયેલી કોમર્શિયલ ગેસ સિલિન્ડરની ચોરીનો ગુનો ઉકેલી નાખ્યો છે. પોલીસે બાતમીના આધારે એક શખ્સને ૧૬ નંગ ગેસની બોટલો સાથે ઝડપી પાડી કાયદેસરની કાર્યવાહી હાથ ધરી છે.
મળતી માહિતી મુજબ નડિયાદ ટાઉન પોલીસ મથક વિસ્તારમાં એલ.સી.બી.ની ટીમ નાઈટ પેટ્રોલિંગમાં હતી, તે દરમિયાન હરજીભાઈ અને રણજીતસિંહ ને બાતમી મળી હતી કે સાગર કાળીદાસ ધોબી (રહે. સાંથ બજાર, ગોરનો ખાચો, નડિયાદ) એ પોતાના ઘરની પાસે શંકાસ્પદ હાલતમાં ગેસના સિલિન્ડર છુપાવ્યા છે.
આ બાતમીના આધારે પોલીસે સ્થળ પર જઈ તપાસ કરતા આરોપી હાજર મળી આવ્યો હતો. તેની પાસેથી અલગ-અલગ કંપનીના ૧૬ નંગ કોમર્શિયલ રાંધણ ગેસના સિલિન્ડર મળી આવ્યા હતા, જેની અંદાજિત કિંમત રૂ.૪૮,૦૦૦ જેટલી થાય છે. પોલીસ દ્વારા આ સિલિન્ડરની માલિકી અંગેના કાગળો માંગતા આરોપી કોઈ સંતોષકારક જવાબ આપી શક્યો ન હતો.
પોલીસની સઘન પૂછપરછ દરમિયાન આરોપીએ કબૂલાત કરી હતી કે, અંદાજે દસેક દિવસ પહેલા પીજ ભાગોળ પાસે આવેલ શ્રીજી ઝોલના ગોડાઉનમાંથી તેણે આ ગેસના બોટલોની ચોરી કરી હતી. આ મામલે નડિયાદ ટાઉન પોલીસ મથકે બી.એન.એસ.ની કલમ ૩૦૫(એ) મુજબ ગુનો નોંધાયેલો હતો.
ખેડા એલ.સી.બી.એ તમામ મુદ્દામાલ કબજે કરી આરોપીની ધરપકડ કરી છે અને આગળની તપાસ માટે તેને નડિયાદ ટાઉન પોલીસને સોંપવાની તજવીજ હાથ ધરી છે. આ કામગીરીમાં એલ.સી.બી. પી.આઈ. કે.આર.વેકરીયા સહિત પી.એસ.આઈ. જે.એસ. ચંપાવત, એમ.એચ. રાવલ અને અન્ય સ્ટાફના માણસો જોડાયા હતા.
