અમેરિકામાં શટડાઉન લંબાઈ જતાં હવાઈ મુસાફરીમાં ભારે અંધાધૂંધી: મુસાફરોની મુશ્કેલીઓ વધી

300 થી વધુ TSA (ટ્રાન્સપોર્ટેશન સિક્યુરિટી એડમિનિસ્ટ્રેશન) અધિકારીઓએ રાજીનામું આપી દીધું છે અને જેઓ સેવા આપી રહ્યા છે તેમનો પગાર મળતો નથી.

વિશ્વના સૌથી વ્યસ્ત હબ પૈકીના એક, એટલાન્ટાના હાર્ટ્સફિલ્ડ-જેક્સન ઇન્ટરનેશનલ એરપોર્ટ પર વીકેન્ડમાં વેઇટિંગ ટાઈમ બે કલાકની આસપાસ હતો

વોશિંગ્ટન, 17 માર્ચ: અમેરિકામાં સરકારની કામગીરી લાંબા સમયથી બંધ (Government Shutdown) રહેવાને કારણે દેશભરમાં હવાઈ મુસાફરી ખોરવાઈ ગઈ છે. આ સ્થિતિને લીધે એરપોર્ટ સુરક્ષા કામગીરીમાં અવરોધ ઊભો થયો છે, જેના પરિણામે મુસાફરોની લાંબી કતારો, વ્યાપક વિલંબ અને સેંકડો મુસાફરો અટવાયા હોવાના અહેવાલો છે.

ડિપાર્ટમેન્ટ ઓફ હોમલેન્ડ સિક્યુરિટીને ફંડ ન મળવાને કારણે સુરક્ષા ચેકપોઇન્ટ્સ પર ભારે દબાણ છે. ટ્રાન્સપોર્ટેશન સિક્યુરિટી એડમિનિસ્ટ્રેશન (TSA) ના અધિકારીઓ મુસાફરીની વ્યસ્ત સીઝન હોવા છતાં પગાર વગર કામ કરી રહ્યા છે.

આ વિક્ષેપને કારણે અનેક એરપોર્ટ પર ફ્લાઈટ્સમાં વિલંબ થઈ રહ્યો છે અને મુસાફરોને લાંબો સમય રાહ જોવી પડી રહી છે. સત્તાવાળાઓએ મુસાફરોને સલાહ આપી છે કે ફ્લાઈટ ચૂકી ન જવાય તે માટે નિર્ધારિત સમય કરતાં ઘણું વહેલું એરપોર્ટ પહોંચવું.

HOLY SMOKES: Anyone else traveling today? It’s a nightmare. I’ve never seen an airport so crowded. This is Fort Lauderdale International…it is like this at every gate in at least the two terminals I have been in today.
Original American Airlines flight was to leave for Dallas at… pic.twitter.com/Wspzro7owh

— Victor Bigham 🇺🇸 (@Ravious101) March 15, 2026

TSA એ એક પોસ્ટમાં જણાવ્યું હતું કે, “મુસાફરો માટે 3 કલાકથી વધુ લાંબી લાઈનો છે. 300 થી વધુ TSA અધિકારીઓએ રાજીનામું આપી દીધું છે અને જેઓ સેવા આપી રહ્યા છે તેમનો પગાર શૂન્ય છે. હવે અતિ થઈ રહી છે.” એજન્સીએ પુષ્ટિ કરી છે કે શટડાઉન શરૂ થયું ત્યારથી અત્યાર સુધીમાં સેંકડો પગાર વગરના અધિકારીઓએ નોકરી છોડી દીધી છે, જેનાથી મોટા એરપોર્ટ્સ પર સ્ટાફની અછત વધુ વણસી છે.

આ અસરો દેશભરમાં જોવા મળી રહી છે. વીકેન્ડ દરમિયાન દેશના વિવિધ એરપોર્ટ પર કલાકો સુધી લાંબી લાઈનો જોવા મળી હતી. જોકે સોમવાર સાંજ સુધીમાં કેટલાક સ્થળોએ સ્થિતિમાં થોડો સુધારો થયો હતો, પરંતુ હજુ પણ ઘણા વિસ્તારોમાં વિલંબ ચાલુ છે. વિશ્વના સૌથી વ્યસ્ત હબ પૈકીના એક, એટલાન્ટાના હાર્ટ્સફિલ્ડ-જેક્સન ઇન્ટરનેશનલ એરપોર્ટ પર વીકેન્ડમાં વેઇટિંગ ટાઈમ બે કલાકની આસપાસ હતો, જે સોમવારે ઘટીને 15 મિનિટ થયો હતો.

એરપોર્ટ સત્તાવાળાઓએ મુસાફરોને તેમના ટ્રાવેલ પ્લાનમાં ફેરફાર કરવા વિનંતી કરી છે. સ્થાનિક મીડિયા અનુસાર, ઓસ્ટિન-બર્ગસ્ટ્રોમ ઇન્ટરનેશનલ એરપોર્ટે જણાવ્યું હતું કે, “સ્થાનિક ફ્લાઈટ માટે કૃપા કરીને રવાના થવાના ઓછામાં ઓછા 2.5 કલાક પહેલા પહોંચો.”

TSA સ્ટાફમાં ગેરહાજરીને કારણે ઓપરેશનલ દબાણ પણ વધ્યું છે. અહેવાલો મુજબ, રવિવારે રાષ્ટ્રીય સ્તરે ગેરહાજરીનો દર 10.19 ટકા નોંધાયો હતો, જે આ શટડાઉન દરમિયાન સૌથી વધુ છે. ન્યુયોર્કમાં લા ગાર્ડિયા એરપોર્ટ પર વેઇટિંગ ટાઈમ ત્રણ કલાકની નજીક પહોંચ્યો હતો, જ્યાં સ્ટાફની ગેરહાજરીનો દર 25 ટકાથી વધુ હતો. જોન એફ. કેનેડી અને નેવાર્ક લિબર્ટી એરપોર્ટ પર પણ આવી જ સ્થિતિ જોવા મળી હતી.

ફ્લાઈટ રદ થવાને કારણે મુસાફરો મુશ્કેલીમાં મુકાયા છે. જે મુસાફરની ફ્લાઈટ બે વાર રદ થઈ હતી તેવા માઈવ હિગિન્સે જણાવ્યું કે, “અમે આખી સવાર સાડા ત્રણ કલાક સુધી હોલ્ડ પર રહ્યા હતા.” અન્ય એક પ્રવાસી લોરેન પ્રાઇસે જણાવ્યું કે, “હોટેલનું રિફંડ મળી શકે તેમ નથી, તેથી અમે જેટલા દિવસ રહી શકાશે તેટલા દિવસ ત્યાં રોકાઈશું.”

એરલાઇન એક્ઝિક્યુટિવ્સે વધતા રોષ અંગે ચેતવણી આપી છે. કોંગ્રેસને લખેલા પત્રમાં એરલાઇન CEOના જૂથે જણાવ્યું હતું કે, “અમેરિકન નાગરિકો વારંવારના શટડાઉનને કારણે એરપોર્ટ પરની લાંબી લાઈનો અને ફ્લાઈટ કેન્સલેશનથી કંટાળી ગયા છે.”

અગાઉના શટડાઉન દરમિયાન પણ TSA અધિકારીઓએ પગાર વિના કામ કરવું પડ્યું હતું, જેના કારણે આવી જ રીતે સ્ટાફની ગેરહાજરી અને વિલંબની સમસ્યા સર્જાઈ હતી. TSA દરરોજ લાખો મુસાફરોનું સ્ક્રીનિંગ કરે છે, જે યુએસ એવિએશન સિક્યુરિટીનો મુખ્ય સ્તંભ છે.