ભારત પાસે 60 દિવસનો ક્રૂડ ઓઈલ રિઝર્વ સ્ટોક, LPGનો 1 મહિનાનો પૂરો પુરવઠો સુરક્ષિત: સરકાર

ભારતમાં પેટ્રોલ, ડીઝલ અને LPGનો પૂરતો જથ્થો સુરક્ષિત: અફવાઓથી બચવા સરકારની અપીલ

હાલમાં ભારતની LPGની દૈનિક જરૂરિયાત ૮૦ TMT છે, જેની સામે ૫૦ TMTનું ઉત્પાદન દેશમાં જ થઈ રહ્યું છે.

નવી દિલ્હી, ૨૬ માર્ચ: કેન્દ્ર સરકારે ગુરુવારે સ્પષ્ટપણે જણાવ્યું હતું કે ભારતની પેટ્રોલિયમ અને એલપીજી (LPG) પુરવઠાની સ્થિતિ સંપૂર્ણપણે સુરક્ષિત અને નિયંત્રણમાં છે. સરકારે નાગરિકોને અપીલ કરી છે કે તેઓ ગભરાટ ફેલાવવા માટે “હેતુપૂર્વક ચલાવવામાં આવતા ખોટા પ્રચાર અને અફવાઓ” થી ગેરમાર્ગે ન દોરાય.

પેટ્રોલિયમ મંત્રાલયે જણાવ્યું હતું કે, મધ્ય-પૂર્વની કટોકટીનો ગુરૂવારે ૨૭મો દિવસ હોવા છતાં ભારત પાસે કુલ ૭૪ દિવસની અનામત ક્ષમતા છે અને હાલમાં વાસ્તવિક સ્ટોક આશરે ૬૦ દિવસનો છે (જેમાં ક્રૂડ ઓઈલ, પેટ્રોલિયમ ઉત્પાદનો અને વ્યૂહાત્મક સંગ્રહનો સમાવેશ થાય છે). તમામ રિટેલ ફ્યુઅલ આઉટલેટ્સ પર પૂરતો પુરવઠો ઉપલબ્ધ છે.

નિવેદનમાં વધુમાં જણાવાયું છે કે, “દેશમાં ક્યાંય પણ પેટ્રોલ, ડીઝલ કે એલપીજીની અછત નથી. વૈશ્વિક સ્તરે ગમે તે પરિસ્થિતિ હોય, દરેક ભારતીય નાગરિક માટે આગામી બે મહિનાનો સ્થિર પુરવઠો તૈયાર છે.”

આંતરરાષ્ટ્રીય સ્થિતિ અને ભારતની તૈયારી

વિશ્વના ઘણા દેશો હાલમાં ભાવવધારો, રેશનિંગ અને વાહનો પરના પ્રતિબંધોનો સામનો કરી રહ્યા છે, પરંતુ ભારતમાં આવી કોઈ સ્થિતિ નથી. મંત્રાલયે ભારપૂર્વક જણાવ્યું કે, “ભારતને આવા કોઈ પગલાં લેવાની જરૂર નથી. સોશિયલ મીડિયા પર વાયરલ થયેલા કેટલાક ભ્રામક વીડિયોને કારણે પસંદગીના પંપો પર ખરીદી માટે ભીડ જોવા મળી હતી, પરંતુ ત્યાં પણ પૂરતો પુરવઠો પહોંચાડવામાં આવ્યો છે.”

હોર્મુઝની સામુદ્રધુનીમાં તણાવ હોવા છતાં, ભારત આજે તેના ૪૧થી વધુ વૈશ્વિક સપ્લાયર્સ પાસેથી પહેલા કરતા પણ વધુ ક્રૂડ ઓઈલ મેળવી રહ્યું છે. ભારતીય રિફાઇનરીઓ ૧૦૦ ટકા ક્ષમતા સાથે કામ કરી રહી છે.

LPG અને PNG અંગે સ્પષ્ટતા

એલપીજી (LPG) અંગે મંત્રાલયે જણાવ્યું કે ઘરેલું રિફાઇનરી ઉત્પાદનમાં ૪૦ ટકાનો વધારો કરવામાં આવ્યો છે. હાલમાં ભારતની દૈનિક જરૂરિયાત ૮૦ TMT છે, જેની સામે ૫૦ TMTનું ઉત્પાદન દેશમાં જ થઈ રહ્યું છે. બાકીનો પુરવઠો અમેરિકા, રશિયા અને ઓસ્ટ્રેલિયા જેવા દેશોમાંથી સુરક્ષિત રીતે આવી રહ્યો છે.

પાઇપ્ડ નેચરલ ગેસ (PNG) અંગે સરકારે સ્પષ્ટતા કરી કે, “PNG ને પ્રોત્સાહન આપવામાં આવી રહ્યું છે કારણ કે તે સસ્તું, સ્વચ્છ અને સુરક્ષિત છે. એવો દાવો કરવો કે LPG ખૂટી પડ્યો હોવાથી PNG પર ભાર મુકાય છે, તે તદ્દન ખોટી માહિતી છે.”