નેપાળના નવા PM બાલેન્દ્ર શાહના ભારત સાથેના સંબંધો કેવા રહેશે ?

નેપાળમાં ‘બાલન’ યુગની શરૂઆત: બાલેન્દ્ર શાહ બન્યા નેપાળના નવા વડાપ્રધાન, ઐતિહાસિક બહુમતી સાથે સત્તા સંભાળી

નેપાળમાં મોટાભાગના યુવા સાંસદો ચૂંટાઈ આવ્યા છે, જે નેપાળના રાજકારણમાં એક મોટા ‘જનરેશન શિફ્ટ’ (પેઢીગત પરિવર્તન) નો સંકેત આપે છે.

કાઠમંડુ, ૨૭ માર્ચ: નેપાળના રાજકારણમાં એક નવો ઇતિહાસ રચાયો છે. રાષ્ટ્રીય સ્વતંત્ર પાર્ટી (RSP) ના સંસદીય દળના નેતા બાલેન્દ્ર શાહ (જેઓ ‘બાલન’ તરીકે લોકપ્રિય છે) ને નેપાળના નવા વડાપ્રધાન તરીકે નિયુક્ત કરવામાં આવ્યા છે.

રાષ્ટ્રપતિ રામચંદ્ર પૌડેલે શુક્રવારે બંધારણની કલમ 76(1) મુજબ કાઠમંડુ મહાનગરપાલિકાના પૂર્વ મેયર બાલેન્દ્ર શાહની આ પદ પર નિમણૂક કરી હતી. ઉલ્લેખનીય છે કે, તાજેતરની સંસદીય ચૂંટણીમાં RSP એ લગભગ બે-તૃતીયાંશ બહુમતી સાથે પ્રચંડ વિજય મેળવ્યો છે, જેના પગલે ગુરુવારે પાર્ટીએ શાહને પોતાના નેતા તરીકે ચૂંટ્યા હતા. તેઓ નેપાળના ૪૭મા વડાપ્રધાન બન્યા છે.

ભારત માટે બાલેન્દ્ર શાહ એક એવા નેતા સાબિત થઈ શકે છે જેઓ વ્યવહારુ (Practical) છે. તેઓ ભાવનાઓ કરતા વિકાસ અને ઈન્ફ્રાસ્ટ્રક્ચર ને વધુ મહત્વ આપે છે. જો ભારત તેમને યોગ્ય સહયોગ આપે, તો ભારત-નેપાળ સંબંધોમાં એક નવો અને આધુનિક અધ્યાય શરૂ થઈ શકે છે.

વૈદિક મંત્રોચ્ચાર અને શંખનાદ વચ્ચે શપથ ગ્રહણ

વડાપ્રધાન શાહ શુક્રવારે બપોરે ૧૨:૩૪ કલાકે રાષ્ટ્રપતિ ભવનમાં શપથ ગ્રહણ કરશે. આ સમારોહ સંપૂર્ણપણે હિન્દુ અને બૌદ્ધ પરંપરાઓ મુજબ યોજાશે:

• શંખનાદ: શુભ શરૂઆત માટે સાત શંખ વાદકો દ્વારા શંખનાદ કરવામાં આવશે.

• સ્વસ્તિ શાંતિ: ૧૦૮ બટુકો (વૈદિક પૂજારીઓ) દ્વારા સ્વસ્તિ શાંતિના પાઠ કરવામાં આવશે.

• અષ્ટમંગલ: ૧૬ બૌદ્ધ સાધુઓ અષ્ટમંગલનો પાઠ કરશે, જે નેપાળની મિશ્ર સંસ્કૃતિનું પ્રતિક છે.

સૌથી યુવા વડાપ્રધાન અને પેઢીગત પરિવર્તન

૩૫ વર્ષીય બાલેન્દ્ર શાહ નેપાળના ઇતિહાસના સૌથી યુવા વડાપ્રધાનોમાંના એક છે. આ ચૂંટણીમાં મોટાભાગના યુવા સાંસદો ચૂંટાઈ આવ્યા છે, જે નેપાળના રાજકારણમાં એક મોટા ‘જનરેશન શિફ્ટ’ (પેઢીગત પરિવર્તન) નો સંકેત આપે છે. ગયા વર્ષે ૨૮ ડિસેમ્બરે રાષ્ટ્રીય રાજકારણમાં પ્રવેશ્યા બાદ શાહની લોકપ્રિયતાને કારણે RSP એ ૨૭૫ માંથી ૧૮૨ બેઠકો જીતીને અભૂતપૂર્વ સફળતા મેળવી છે.

કે.પી. શર્મા ઓલીને રેકોર્ડ મતોથી હરાવ્યા

બાલેન્દ્ર શાહે પૂર્વ વડાપ્રધાન કે.પી. શર્મા ઓલીને ઝાપા-૫ બેઠક પર ૪૯,૬૧૪ મતોના જંગી માર્જિનથી હરાવ્યા છે. શાહને ૬૮,૩૪૮ મત મળ્યા હતા જ્યારે ઓલીને માત્ર ૧૮,૭૩૪ મત મળ્યા હતા. ૧૯૯૧ પછી નેપાળની ચૂંટણીમાં કોઈ ઉમેદવાર દ્વારા મેળવવામાં આવેલા આ સૌથી વધુ મતો છે.

એન્જિનિયરિંગથી વડાપ્રધાન પદ સુધીની સફર

૨૭ એપ્રિલ ૧૯૯૦ના રોજ કાઠમંડુમાં એક મધેશી પરિવારમાં જન્મેલા બાલેન્દ્ર શાહ વ્યવસાયે સ્ટ્રક્ચરલ એન્જિનિયર છે. તેમણે ભારતની વિશ્વેશ્વરૈયા ટેકનોલોજીકલ યુનિવર્સિટીમાંથી માસ્ટર્સની ડિગ્રી મેળવી છે. એન્જિનિયરિંગના તેમના જ્ઞાનનો ઉપયોગ તેમણે કાઠમંડુના મેયર તરીકે શહેરના આધુનિક વિકાસ અને ઈન્ફ્રાસ્ટ્રક્ચર સુધારવા માટે કર્યો હતો, જેના કારણે તેઓ સમગ્ર દેશમાં લોકપ્રિય બન્યા.