ઘરેલુ ગેસ સિલિન્ડરનો ગેરકાયદે વપરાશ: હોટલમાં SOGનો દરોડો

મોડાસાની મુસાફીર હોટલમાં એસ.ઓ.જી.નો દરોડો

મોડાસા,  અરવલ્લી જિલ્લામાં હોટલ અને રેસ્ટોરન્ટ્‌સમાં ગેરકાયદેસર રીતે ઘરેલુ ગેસ સિલિન્ડરનો ઉપયોગ કરતા સંચાલકો સામે પોલીસ તંત્ર લાલઆંખ કરી રહ્યું છે. ગાંધીનગર વિભાગના નાયબ પોલીસ મહાનિરીક્ષક વિરેન્દ્રસિંહ યાદવ અને અરવલ્લી જિલ્લા પોલીસ અધિક્ષક મનોહરસિંહ એન. જાડેજાની સૂચના મુજબ જિલ્લામાં સરપ્રાઇઝ ચેકિંગ હાથ ધરવા માટે ખાસ અભિયાન ચલાવવામાં આવી રહ્યું છે.

આ અભિયાન અંતર્ગત અરવલ્લી એસ.ઓ.જી.ના પોલીસ ઇન્સ્પેક્ટર પી.બી. ચૌધરીના માર્ગદર્શન હેઠળ પી.એસ.આઈ. એ.એચ. રાઠોડ અને તેમની ટીમ મોડાસા ટાઉન વિસ્તારમાં પેટ્રોલિંગમાં હતી તે દરમિયાન પોલીસને ચોક્કસ બાતમી મળી હતી કે મોડાસાની ડુગરવાડા ચોકડી નજીક આવેલી ‘હોટલ મુસાફીર’ ના સંચાલક પોતાની હોટલમાં ગેરકાયદેસર રીતે ઘરેલુ વપરાશ માટેના રાંધણ ગેસના બોટલોનો ઉપયોગ કરે છે.

આ બાતમીના આધારે એસ.ઓ.જી. પોલીસે મોડાસા પુરવઠા વિભાગના મામલતદારને સાથે રાખી હોટલ મુસાફીરમાં તપાસ હાથ ધરતા ત્યાંથી ઇન્ડેન કંપનીના ઘરેલુ વપરાશના ૦૩ નંગ ગેસ સિલિન્ડર મળી આવ્યા હતા. પોલીસે હોટલના સંચાલક સઇદભાઇ ડોસુભાઇ અખુનજી (રહે. શાહીકોટ વિસ્તાર, મોડાસા) પાસેથી આ ગેસ સિલિન્ડરો કબજે કરી કાયદેસરની કાર્યવાહી હાથ ધરી હતી.

આ સફળ કામગીરીમાં એસ.ઓ.જી. શાખાના પોલીસ ઇન્સ્પેક્ટર પી.બી. ચૌધરી, પોલીસ સબ ઇન્સ્પેક્ટર એ.એચ. રાઠોડ, હેડ કોન્સ્ટેબલ દિનેશભાઇ, હેડ કોન્સ્ટેબલ જીતેન્દ્રસિંહ, એ.એસ.આઇ ઇમરાનખાન અને પોલીસ કોન્સ્ટેબલ નરેન્દ્રસિંહ સહિતના સ્ટાફે અસરકારક કામગીરી કરી હતી. પોલીસની આ તવાઈથી જિલ્લામાં ગેરકાયદેસર પ્રવૃત્તિ કરતા અન્ય હોટલ સંચાલકોમાં ફફડાટ વ્યાપી ગયો છે.