કામધંધા બાબતે પિતાએ ઠપકો આપતા ઉશ્કેરાયેલા પુત્રએ પિતાના પગ કાપી નાખ્યા

પિતાની નિર્મમ હત્યા કરનાર આરોપી પુત્ર પ્રવીણની પોલીસે ધરપકડ કરી કાયદેસરની તપાસ શરૂ કરી

માળિયા મિયાણા પાસે પુત્રએ કુહાડીના ઘા ઝીંકી વૃદ્ધ પિતાની હત્યા કરી

મોરબી, મોરબી જિલ્લાના માળીયા મિયાણા તાલુકામાં કામ-ધંધા બાબતે પિતાએ પુત્રને ઠપકો આપતા, ઉશ્કેરાયેલા પુત્રએ પોતાના જ વૃદ્ધ પિતા પર કુહાડી વડે જીવલેણ હુમલો કરી તેમની નિર્મમ હત્યા નિપજાવી છે. આ મામલે પોલીસે ગુનો નોંધી આરોપી પુત્રની ધરપકડ કરીને કાર્યવાહી હાથ ધરી છે.મોટાભેલા ગામે રહેતા ૮૫ વર્ષીય જીવણભાઈ સોમાણીએ તેમના પુત્ર પ્રવીણ ઉર્ફે પવો જીવણભાઈ સોમાણીને કોઈ કામ-ધંધો કરવા બાબતે ઠપકો આપ્યો હતો. પિતાના આ ઠપકાથી પુત્રને માઠું લાગતા તેણે પિતા સાથે ઉગ્ર બોલાચાલી શરૂ કરી હતી.

આ ઝઘડાએ ઉગ્ર સ્વરૂપ ધારણ કરતા પ્રવીણે ઘરમાં રહેલી કુહાડી ઉઠાવી પિતા પર હુમલો કરી દીધો હતો. વૃદ્ધ પિતાના બંને પગના કાંડાના ભાગે કુહાડીના ઊંડા અને જીવલેણ ઘા મારી દેતા જીવણભાઈ લોહીલુહાણ થઈ ગયા હતા અને ગંભીર ઈજાઓને કારણે તેમનું ઘટનાસ્થળે જ મોત નીપજ્યું હતું.આ ઘટના અંગે મૃતક જીવણભાઈના બીજા પુત્ર ભરતભાઈ ઉર્ફે ભટ્ટી જીવણભાઈ સોમાણી (ઉં.૨૮)એ માળીયા તાલુકા પોલીસ સ્ટેશનમાં પોતાના જ સગા ભાઈ પ્રવીણ વિરુદ્ધ ફરિયાદ નોંધાવી છે.

પોલીસે મૃતદેહને પોસ્ટમોર્ટમ અર્થે ખસેડી હત્યાનો ગુનો દાખલ કર્યાે છે. ઘટનાની જાણ થતા જ માળીયા તાલુકા પોલીસ કાફલો ઘટનાસ્થળે દોડી ગયો હતો અને ત્વરિત કાર્યવાહી કરીને પિતાની હત્યા કરનાર આરોપી પુત્ર પ્રવીણની ધરપકડ કરી કાયદેસરની તપાસ શરૂ કરી છે. SS1