માતાની નજર સામે સિંહે બાળકીને ઘરમાંથી ઉપાડી જઈ ફાડી ખાધી

ઊના, ઉના તાલુકાના ડમાસા ગામની સીમમાં સિંહે ચાર વર્ષની માસૂમ બાળકીનો શિકાર કરી તેને મોતને ઘાટ ઉતારી દેતા સમગ્ર પંથકમાં અરેરાટી વ્યાપી ગઈ છે. સોમવારે સાંજે બનેલી આ હૃદયદ્રાવક ઘટનામાં સિંહ ઘરની ઓસરીમાં બેઠેલી બાળકીને તેની માતાની નજર સામેથી જ જડબામાં દબોચીને ખેતરોમાં ગાયબ થઈ ગયો હતો.

આ બનાવ બાદ વન વિભાગની ટીમ મોડી પહોંચતા સ્થાનિક ગ્રામજનોમાં ભારે રોષ જોવા મળ્યો હતો.ડમાસા ગામના વાડી વિસ્તારમાં રહેતા જીવાભાઈ પામકની ચાર વર્ષની પુત્રી સાંજે ૭ વાગ્યાના સુમારે તેની માતા સવિતાબેન સાથે ઘરની ઓસરીમાં બેઠી હતી. સવિતાબેન તેમના નાના પુત્રને દવા આપીને રસોઈની તૈયારી કરી રહ્યા હતા, તે દરમિયાન અચાનક ત્રાટકેલા સિંહે બાળકીને પકડી લીધી હતી.

માતા કંઈ સમજે તે પહેલા જ સિંહ બાળકીને ઉપાડીને ખેતરોમાં ભાગી ગયો હતો. સિંહ બાળકીને ઘરથી અંદાજે પાંચસો મીટર દૂર ખેતરમાં લઈ ગયો હતો, જ્યાં ગ્રામજનોએ ભારે દેકારો મચાવતા સિંહ બાળકીના મૃતદેહને છોડીને બાજરાના વાવેતરમાં નાસી છૂટ્યો હતો.SS1MS