દુનિયાથી હકીકત છુપાવવા સેટેલાઇટ કંપનીઓ સામે યુએસએ હાથ જોડ્યાં

(એજન્સી) વોશિંગ્ટન, અમેરિકા અને ઈરાન વચ્ચે ચાલી રહેલા ભીષણ યુદ્ધમાં ટ્રમ્પ પ્રશાસનની ભારે ફજેતી કરનારો એક સનસનીખેજ ઘટસ્ફોટ થયો છે. ઈરાનના હુમલામાં અમેરિકાના સૈન્ય મથકોને થયેલા ભારે નુકસાનની વિગતો દુનિયાથી છુપાવવા માટે ટ્રમ્પ વહીવટીતંત્રે ખાનગી સેટેલાઇટ કંપનીઓ સામે હાથ જોડવા પડ્યા હોવાનું સામે આવ્યું છે.

અમેરિકી સંરક્ષણ વિભાગ પેન્ટાગોનને ડર હતો કે જો હુમલામાં પાયમાલ થયેલા સૈન્ય ઠેકાણાઓની અસલી તસવીરો દુનિયા સામે આવશે, તો અમેરિકાની મહાસત્તા તરીકેની છબીને ઊંડો આઘાત લાગશે. દુનિયાને ખબર પડી જશે કે ઈરાને અમેરિકાની અજેય ગણાતી સેનાને લાચાર બનાવી દીધી છે, જેનાથી આંતરરાષ્ટ્રીય સ્તરે અમેરિકાનું જાહેર અપમાન થાય તેમ હતું.

આધુનિક યુગમાં મેક્સર અને પ્લેનેટ લેબ્સ જેવી ખાનગી કંપનીઓ અવકાશમાંથી કોઈપણ નુકસાનની સચોટ તસવીરો ખેંચી લે છે. આ અહેવાલ મુજબ અમેરિકાની દિગ્ગજ સેટેલાઇટ કંપની પ્લેનેટ લેબ્સ એ ઈરાન અને મધ્ય-પૂર્વના સંઘર્ષવાળા વિસ્તારોની તસવીરો જાહેર કરવા પર અચોક્કસ મુદત માટે પ્રતિબંધ મૂકી દીધો છે.