મેટ્રિમોનિયલ ફ્રોડના કિસ્સામાં આરોપીને આજીવન કેદ, બેંક ખાતા સીઝ કરવા કોર્ટનો આદેશ

મેટ્રિમોનિયલ ફ્રોડના કિસ્સામાં સામાન્ય રીતે આરોપી જેલમાં જાય છે

મણિનગર પીઆઈને આરોપીના નામની મિલકતો અને બેંક બેલેન્સની તપાસ કરી ૫ માસમાં અહેવાલ રજૂ કરવા તાકીદ

દુષ્કર્મના આરોપીને આજીવન કેદ, વળતર માટે બેંક ખાતા સીઝ કરવા કોર્ટનો આદેશ

અમદાવાદ, સેશન્સ કોર્ટે એક ઐતિહાસિક અને સીમાચિહ્નરૂપ ચુકાદો આપતા મેટ્રિમોનિયલ વેબસાઇટ દ્વારા યુવતીઓને ફસાવતા આરોપીને આજીવન કેદની સજા ફટકારી છે. આ કેસમાં સૌથી મહત્ત્વનો અને સંભવતઃ ગુજરાતમાં પહેલીવાર લેવાયેલો નિર્ણય એ છે કે, કોર્ટે આરોપીના તમામ બેંક ખાતાઓ તાત્કાલિક અસરથી સીઝ (સ્થગિત) કરવાનો આદેશ આપ્યો છે, જેથી ભોગ બનનાર યુવતીને વળતર ચૂકવી શકાય.

આ સાથે જ કોર્ટે મણિનગર પી.આઈ.ને આરોપીના નામે ચાલતી તમામ મિલકતો અને બેંક બેલેન્સની તપાસ કરી ૫ માસમાં અહેવાલ રજૂ કરવા તાકીદ કરી છે. નોંધનીય છે કે, મેટ્રિમોનિયલ ફ્રોડના કિસ્સામાં સામાન્ય રીતે આરોપી જેલમાં જાય છે, પરંતુ પીડિતાએ ગુમાવેલા નાણાં પરત મળવાની શક્યતા ઓછી હોય છે. આ કિસ્સામાં બેંક ખાતા સીઝ કરવાનો આદેશ એક દાખલો બેસાડશે કે ડિજિટલ માધ્યમથી છેતરપિંડી કરનારાઓ હવે આર્થિક રીતે પણ બચી શકશે નહીં. આ ચુકાદો અન્ય ભોગ બનનાર યુવતીઓ માટે આશાનું કિરણ છે અને જે લોકો ઓનલાઇન પ્લેટફોર્મનો દુરુપયોગ કરે છે તેમના માટે એક કડક ચેતવણી સમાન છે.

શહેરના રાણીપ વિસ્તારમાં રહેતા આકાશ રાજેશભાઇ વાળોદયાએ ‘જીવનસાથી ડોટ કોમ’ પર પોતાની ખોટી પ્રોફાઇલ બનાવી હતી. તેણે એક યુવતીનો સંપર્ક કરી તેને પ્રેમજાળમાં ફસાવી હતી અને લગ્નનો વિશ્વાસ અપાવી વારંવાર દુષ્કર્મ આચર્યું હતું. એટલું જ નહીં, આરોપીએ યુવતીને ભાવનાત્મક રીતે બ્લેકમેલ કરી તેની પાસેથી લાખો રૂપિયાની લોન કરાવી આઈફોન જેવી કિંમતી ભેટો અને રોકડ રકમ પડાવી હતી. આ મામલે ફરિયાદ બાદ તપાસમાં બહાર આવ્યું હતું કે આરોપીએ અગાઉ પણ અન્ય યુવતીઓને આ જ રીતે શિકાર બનાવી હતી.

આ મામલે પોલીસે તપાસ કરી આરોપી સામે ચાર્જશીટ કરતા કેસ સેશન્સ કોર્ટમાં ચાલવા પર આવ્યો હતો. જેમાં સરકારી વકીલ મિનલ ઉમંગ ભટ્ટે પૂરતા સાક્ષી તપાસી અને દસ્તાવેજી પુરાવા રજૂ કરતા કોર્ટને જણાવ્યું હતું કે, આરોપી સામે ગંભીર પ્રકારનો ગુનો છે, આરોપીએ ફરિયાદીના પૈસા પડાવ્યા હોવાનું પણ સામે આવ્યું છે, આરોપીએ આ રીતે અન્ય યુવતીઓને પણ ઠગી છે એટલે તે ગુનો કરવાની ટેવ ધરાવે છે, ગંભીર પ્રકારનો કેસ છે, ત્યારે સમાજમાં દાખલો બેસે અને આવા આરોપીઓમાં કાયદાનો ભય રહે તે હેતુને ધ્યાને રાખી આરોપીને સખ્તમાં સખ્ત સજા કરવી જોઇએ. આવી રજૂઆત બાદ કોર્ટે આરોપીને આજીવન કેદની સજા ફટકારી છે અને તેના બેંક એકાઉન્ટ સીઝ કરવા આદેશ કર્યાે છે. SS1