મુખ્યમંત્રીના હસ્તે ‘વિકસીત ગુજરાત @ 2047’ ઇમ્પ્લીમેન્ટેશન રોડ મેપનું વિમોચન

ગાંધીનગર, : ગુજરાતને દેશનું અગ્રેસર રાજ્ય રાખવાના મક્કમ નિર્ધાર સાથે ગાંધીનગર ખાતે એક ઉચ્ચસ્તરીય બેઠકમાં ‘વિકસીત ગુજરાત @ 2047’ ઇમ્પ્લીમેન્ટેશન રોડ મેપનું ભવ્ય વિમોચન કરવામાં આવ્યું હતું. મુખ્યમંત્રી શ્રી ભૂપેન્દ્રભાઈ પટેલના વરદહસ્તે આ રોડ મેપ લોન્ચ કરાયો હતો, જેને ગુજરાત રાજ્ય ઈન્સ્ટિટ્યુટ ફોર ટ્રાન્સફોર્મેશન (GRIT) અને સામાન્ય વહીવટ વિભાગ (GAD) દ્વારા સંયુક્ત રીતે તૈયાર કરવામાં આવ્યો છે.

આ ગરિમામય પ્રસંગે નાણાં મંત્રી શ્રી કનુભાઈ દેસાઈ, મંત્રીમંડળના સદસ્યો, મુખ્ય સચિવ શ્રી એમ.કે. દાસ, મુખ્યમંત્રીશ્રીના મુખ્ય સલાહકાર શ્રી ડૉ. હસમુખ અઢીયા સહિત રાજ્ય સરકારના વરિષ્ઠ સચિવશ્રીઓ ખાસ ઉપસ્થિત રહ્યા હતા.

વડાપ્રધાનના ‘વિકસિત ભારત’ના વિઝનને સાકાર કરતું ગુજરાત

રોડ મેપનું વિમોચન કરતા મુખ્યમંત્રી શ્રી ભૂપેન્દ્રભાઈ પટેલે જણાવ્યું હતું કે, આ દસ્તાવેજ રાજ્યની વિકાસ યાત્રાનો એક અત્યંત નિર્ણાયક પડાવ સાબિત થશે. વડાપ્રધાન શ્રી નરેન્દ્રભાઈ મોદીએ આપેલા ‘વિકસિત ભારત @ 2047’ના ભવ્ય વિઝનને સુસંગત રહીને જ આ અમલીકરણ રોડમેપ તૈયાર કરાયો છે. વડાપ્રધાનશ્રીના ‘સૌનો સાથ, સૌનો વિકાસ, સૌનો વિશ્વાસ અને સૌનો પ્રયાસ’ના મંત્રને દોહરાવતા તેમણે ઉમેર્યું કે, દેશના સર્વાંગી વિકાસમાં રાજ્યોની સક્રિય ભાગીદારી અનિવાર્ય છે અને ગુજરાત તેમાં લીડ લેવા સજ્જ છે.

‘અર્નિંગ વેલ, લિવિંગ વેલ’ના કોન્સેપ્ટ પર ભાર

મુખ્યમંત્રીશ્રીએ રાજ્ય સરકારની પ્રાથમિકતાઓ સ્પષ્ટ કરતા જણાવ્યું હતું કે:

• સરકારનો મુખ્ય ધ્યેય સામાન્ય માનવીની સુખાકારી અને તેના આર્થિક આધારને વધુ સુદ્રઢ બનાવવાનો છે.

• આ માટે રાજ્ય સરકારે ‘અર્નિંગ વેલ, લિવિંગ વેલ’ (Earning Well, Living Well) નો નૂતન કોન્સેપ્ટ અપનાવ્યો છે.

• ‘GRIT’ દ્વારા તૈયાર કરાયેલો આ રોડમેપ આગામી સમયમાં નાગરિકોના જીવનધોરણને ઊંચું લાવવામાં અને આર્થિક સમૃદ્ધિ વધારવામાં એક સચોટ દિશાદર્શક (રોડમેપ) તરીકે કામ કરશે.

આ રોડમેપના અમલીકરણ સાથે જ ગુજરાત આગામી ૨૫ વર્ષના અમૃતકાળમાં આર્થિક, સામાજિક અને માળખાકીય ક્ષેત્રે એક નવી ઊંચાઈ સર કરવા તરફ આગળ વધશે તેવો આશાવાદ વ્યક્ત કરવામાં આવ્યો હતો.