ચાંદખેડામાં રહીશો પર હુમલો કરનાર બુટલેગર પિતા-પુત્રની ધરપકડ, પોલીસે જાહેરમાં સરઘસ કાઢ્યું
ચાંદખેડામાં આતંક મચાવનાર બુટલેગર પિતા-પુત્ર જેલભેગા
(એજન્સી)અમદાવાદ, અમદાવાદના ચાંદખેડા વિસ્તારમાં આવેલી પ્રહલાદ પાર્ક સોસાયટીમાં બુટલેગર દ્વારા સ્થાનિક રહીશો પર કરવામાં આવેલા હિંસક હુમલાના મામલામાં પોલીસે સપાટો બોલાવ્યો છે. સોસાયટીમાં આતંક મચાવી ભયનું વાતાવરણ ઊભું કરનારા મુખ્ય બુટલેગર પિતા-પુત્રની પોલીસે ગણતરીના કલાકોમાં જ ધરપકડ કરી લીધી છે.
પકડાયેલા આરોપીઓની ઓળખ પૃથ્વી પઢિયાર અને તેના પિતા કિશોર પઢિયાર તરીકે થઈ છે, જેમણે વિસ્તારમાં કાયદો અને વ્યવસ્થા હાથમાં લેવાનો પ્રયાસ કર્યો હતો.ધરપકડ કર્યા બાદ ચાંદખેડા પોલીસ બંને આરોપી પિતા-પુત્રને એ જ પ્રહલાદ પાર્ક સોસાયટીમાં લઈ ગઈ હતી જ્યાં તેમણે સ્થાનિક લોકો પર હિંસક હુમલો કર્યો હતો.
સોસાયટીના રહીશોની હાજરીમાં જ બંને આરોપીઓનું જાહેરમાં સરઘસ કાઢીને પોલીસે તેમને કાયદાનું ભાન કરાવ્યું હતું. પોલીસની આ કડક અને પ્રશંસનીય કાર્યવાહીને પગલે વર્ષોથી ડરના ઓથાર હેઠળ જીવતા સ્થાનિક રહીશોએ રાહતનો શ્વાસ લીધો છે અને ગુનેગારોમાં કાયદાનો ડર પેસ્યો છે. આ મામલામાં પોલીસે બંને આરોપીઓ સામે ગુનો નોંધીને કાયદેસરની વધુ તપાસ હાથ ધરી છે.
આ બુટલેગર પિતા-પુત્ર અન્ય કોઈ ગેરકાયદેસર દારૂના નેટવર્ક કે ગુનાહિત પ્રવૃત્તિઓ સાથે સંકળાયેલા છે કે કેમ, તે દિશામાં પણ પોલીસ દ્વારા ઝીણવટભરી પૂછપરછ કરવામાં આવી રહી છે. પોલીસે સ્થાનિક લોકોને સુરક્ષાની ખાતરી આપી છે કે વિસ્તારની શાંતિ ભંગ કરનારા અસામાજિક તત્વો સામે આવી જ કડક કાર્યવાહી ચાલુ રહેશે.
