અભિનેત્રી હિમાંશી ખુરાનાને કોરોના પોઝિટિવ આવ્યો
મુંબઈ: કેંદ્ર સરકારે રજૂ કરેલા કૃષિ બિલના વિરોધમાં હાલમાં જ દેશભરના ખેડૂતોએ વિરોધ પ્રદર્શન કર્યું હતું. જેમાં પંજાબી એક્ટ્રેસ અને બિગ બોસની પૂર્વ કન્ટેસ્ટન્ટ હિમાંશી ખુરાના સામેલ થઈ હતી.
ઘણા વખતથી ખેડૂતોની તરફેણમાં પોસ્ટ કરી રહેલી હિમાંશી વિરોધ પ્રદર્શનમાં તેમની પડખે ઊભી રહી ત્યારે લોકોએ તેના ખૂબ વખાણ કર્યા હતા. જો કે, હવે હિમાંશી ખુરાના કોરોના સંક્રમિત થઈ હોવાના અહેવાલ છે. હિમાંશી ખુરાનાએ ઈન્સ્ટાગ્રામ પર પોસ્ટ મૂકીને આ વિશે જાણકારી આપી છે.
હિમાંશી ખુરાનાએ લખ્યું, પૂરતી કાળજી રાખવા છતાં પણ હું કોરોનાથી સંક્રમિત થઈ છું. તમને ખબર છે કે, હું પરમ દિવસે એક આંદોલનમાં ભાગ લેવા પહોંચી હતી અને ત્યાં ખૂબ ભીડ હતી. એટલે આજે સાંજે શૂટિંગ પર જતાં પહેલા કોરોનાનો ટેસ્ટ કરાવવાનું નક્કી કર્યું હતું.
મારા સંપર્કમાં આવેલા તમામ લોકોને વિનંતી કે તેઓ પોતાનો ટેસ્ટ કરાવી લે અને વિરોધ પ્રદર્શન કરતી વખતે સાવધાની રાખે. વિરોધ કરી રહેલા સૌને મારી અપીલ છે કે, આપણે એક મહામારીમાંથી પસાર થઈ રહ્યા છીએ એ વાત ભૂલશો નહીં અને પોતાનું ધ્યાન રાખજો. અગાઉ હિમાંશીએ એક વિડીયો શેર કરીને કૃષિ બિલ પર પોતાના મંતવ્યો આપ્યા હતા.
ઉલ્લેખનીય છે કે, લગભગ એકાદ મહિના પહેલા હિમાંશી ખુરાના કોરોના પોઝિટિવ હોવાની અફવા ઉડી હતી. જો કે, તેની મેનેજર આ વાત નકારતા કહ્યું હતું કે, હિમાંશી એકદમ સ્વસ્થ છે. પર્સનલ લાઈફની વાત કરીએ તો, હિમાંશી બિગ બોસ-૧૩ના ફર્સ્ટ રનર-અપ અસીમ રિયાઝ સાથે રિલેશનશીપમાં છે.
જો કે, વચ્ચે એવા અહેવાલ હતા કે બંનેનું બ્રેકઅપ થઈ ગયું છે. કૃષિ બિલના વિરોધમાં હિમાંશીએ અવાજ ઉઠાવ્યો હતો ત્યારે અસીમે તેના વખાણ કર્યા હતા. ઉલ્લેખનીય છે કે, હિમાંશી અને અસીમે કેટલાક મ્યૂઝિક વિડીયોમાં સાથે કામ પણ કર્યું છે.
