જગદીશના કઝિને અંતિમ સંસ્કાર માટે ક્રાઉડફંડિગ શરૂ કર્યું
અમદાવાદ, કેનેડા-યુએસ બોર્ડર પર ઠંડીમાં થીજી જવાના કારણે મૃત્યુ પામેલા ગુજરાતી પરિવારના સગા-સંબંધીઓ હવે તેમના અંતિમ સંસ્કાર કરવા માટે લોકો પાસેથી ભંડોળ એકત્ર કરી રહ્યા છે. ૩૯ વર્ષીય જગદીશ પટેલ, ૩૭ વર્ષીય પત્ની વૈશાલી, ૧૧ વર્ષની દીકરી વિહાંગી અને ૩ વર્ષના દીકરા ધાર્મિકનું -૩૫ ડિગ્રી ઠંડીમાં થીજી જવાને કારણે ૧૯ જાન્યુઆરી નિધન થયું હતું.
હાડ થીજવતી ઠંડી અને બરફ વચ્ચે ચાલીને તેઓ યુએસની બોર્ડર ક્રોસ કરવાની કોશિશ કરી રહ્યા હતા. જગદીશ પટેલના કઝિન અને હાલ યુએસના ઈલિનોયમાં રહેતા દિલીપ પટેલે શનિવારે ઓનલાઈન ફંડરેઝર શરૂ કર્યું છે. રવિવાર સાંજ સુધીમાં ૬૭,૦૦૦ યુએસ ડોલર (૫૦.૩ લાખ રૂપિયા) ૫૧૦ દાતાઓની મદદથી એકત્ર થયા છે.
૭૦,૦૦૦ યુએસ ડોલર (૫૨.૫ લાખ રૂપિયા) એકઠા કરવાનું લક્ષ્ય છે. સૂત્રો પાસેથી પ્રાપ્ત થયેલી માહિતી અનુસાર, પટેલ પરિવાર ચારેય મૃતદેહોના અંતિમ સંસ્કાર આ સપ્તાહે કેનેડામાં જ કરે તેવી સંભાવના છે. દિલીપ પટેલ સિવાય પેન્સિલવેનિયામાં રહેતા જગદીશ પટેલના અન્ય એક કઝિને પણ અંતિમ સંસ્કાર કરવાની જવાબદારી ઉઠાવી છે.
ડીંગુચાથી જગદીશ પટેલના પરિવારનો ઓછામાં ઓછો એક સભ્ય અંતિમ સંસ્કારમાં ભાગ લઈ શકે તે માટે તેમણે વિઝાની અરજી આપી છે. નાનકડી આર્થિક મદદ અને પ્રાર્થનાઓ દ્વારા આપણે આ પીડાદાયક સમયમાં તેમના પરિવારની પડખે રહેવું જાેઈએ. શ્રદ્ધાંજલિ આપવા માટે શબ્દો નથી.
જન્મ અને મૃત્યુનું ચક્ર તો ઈશ્વરના હાથમાં છે પરંતુ આ દુઃખદ સમયમાં આપણે વ્યક્તિગત રીતે યથાશક્તિ ફાળો આપીને તેમના પરિવારને મદદ કરીશું તો ભગવાન પણ પ્રશંસા કરશે, તેમ ભંડોળ એકત્ર કરવા માટેની વેબસાઈટ પર લખવામાં આવ્યું છે. વેબસાઈટ પર એવી પણ માહિતી અપાઈ છે કે, ભંડોળની રકમ જગદીશ પટેલ અને તેમના પરિવારના અંતિમ સંસ્કાર તેમજ બીજા ખર્ચ માટે વપરાશે અને જે રકમ વધશે તે ભારતમાં રહેતા તેમના પરિવારને મોકલી અપાશે.
ગુજરાતી સમાજના એક સભ્યએ કહ્યું, ભારતીય કોન્યુલેટ અને કેનેડાની સરકારે અંતિમ સંસ્કાર માટે વ્યવસ્થા કરવા સહિતની બધી જ મદદ મૃતકોના પરિવારને કરી છે. મેનિટોબામાં રહેતો ગુજરાતી સમાજ પણ બનતી મદદ કરીને ફરજ નિભાવી રહ્યો છે. આ કેસની તપાસ દરમિયાન માનવ તસ્કરીનું એંગલ બહાર આવ્યું છે. એવામાં કેનેડાની પોલીસ ઘટનાની તપાસ કરવાની સાથે ભવિષ્યમાં આ પ્રકારની દુર્ઘટના બનતી રોકવા ભારતીય સમુદાયમાં જાગૃતિ ફેલાવી રહી છે.SSS
