સુરતમાં દોડતા ટેમ્પોના બોનેટ પર બેસી સ્ટંટ કરવાનું ભારે પડ્યું

સુરત, સોશિયલ મીડિયા રિલ્સ બનાવવા જોખમી સ્ટંટ કરવાનો ટ્રેન્ડ હમણાં ચાલી નીકળ્યો છે, ત્યારે થોડા દિવસ પહેલાં શહેરના ડીંડોલી બ્રિજ પર એક દોડતા ટેમ્પોના બોનેટ પર બેઠેલા યુવકનો વીડિયો વાયરલ થયો હતો. વીડિયો જોઈ પોલીસ હરકતમાં આવી હતી અને ટેમ્પો ચાલક તથા સ્ટંટ કરનાર બંને યુવકોને દબોચી લીધા હતાં. મોટર વ્હીકલ એક્ટ મુજબ ગુનો નોંધીને કાન પણ પકડાવ્યા હતા.

સોશિયલ મીડિયામાં વીડિયો વાયરલ થયા બાદ તે પોલીસે તપાસ શરૂ કરી હતી. તપાસ કરતા તે વીડિયો તા.૧૫/૦૫/૨૦૨૪ના સાંજના સાતેક વાગ્યાના અરસાનો ડીંડોલી પ્રમુખ પાર્ક ઓવરબ્રિજ ખાતેનું હોવાની વિગતો બહાર આવી હતી.

વિડીયોમા દેખાતી મહિન્દ્રા પીક-અપ ગાડીના ડ્રાઇવર તથા ગાડીના બોનેટ ઉપરથી કેબિનમાં આવતા શખ્સને હ્યુમન ઇન્ટેલિજન્સ તથા ટેકનિકલ સર્વેલન્સના આધારે ડિંડોલી પોલીસ મથકના સર્વેલન્સ સ્ટાફે ગણતરીના કલાકોમાં પકડી પાડ્યા હતાં.

પોલીસે આ કેસમાં મુકેશ સંજય બુવા (ઉં.વ. ૨૭ હાલ રહે. ૧૫, શાંતિનગર સોસાયટી, નિલમ હોટલ પાછળની ગલી, કડોદરા જિ. સુરત મૂળ રહે. ગામઃ ગણપુર, અકુલખેડા, જી. જલગાવ મહારાષ્ટ્ર) અને નૌસાદ નઇમખાન આલમ (ઉં.વ. ૨૦ હાલ રહે. પ્લોટ નંબરઃ ૨૨, એસ.ડી એન્ટરપ્રાઇઝ, ક્રિષ્ના ઇન્ડસ્ટ્રીયલ એસ્ટેટ, જેજે કોમ્પલેક્ષની પાછળ, કડોદરા, જિ. સુરત મૂળ રહે. ગામઃ આઈલહવા બગાહી, દેવરીયા, જી. બલરામપુર ઉત્તરપ્રદેશ)ની ધરપકડ કરી કલમ ૨૭૯, ૩૩૬, ૧૧૪ તથા મોટર વ્હીકલ એક્ટની કલમ ૧૨૩, ૧૭૭, ૧૮૪ મુજબ ગુનો દાખલ કર્યો હતો. પોલીસે આ બંને આરોપીની ધરપકડ કર્યા બાદ તેઓના કાન પકડાવ્યા હતા અને માફી મંગાવી હતી.SS1MS