“આતા માજી સટકલી”: અજય દેવગણની ‘સિંઘમ અગેન’ને જબરજસ્ત આવકાર
(પ્રતિનિધિ)અમદાવાદ, દિવાળી પર્વ હિંદી ફિલ્મ જગત માટે શુકનવંતો સાબિત થઈ રહયો છે. ફિલ્મ સ્ટાર અજય દેવગનની મલ્ટી સ્ટાર ફિલ્મ ‘સિંઘમ અગેન’ બોક્સ ઓફિસ પર બમ્પર કમાણી કરી રહી છે. જોકે સોમવાર પછી ફિલ્મની આવક ઘટી રહી છે તે ચિંતાનો વિષય બન્યો છે.
પાંચ દિવસમાં ફિલ્મએ સારી એવી કમાણી કરી લીધી છે એકશન ડાયરેકટર રોહિત શેટ્ટીના ડાયરેકશન હેઠળ બનેલી ‘સિંઘમ અગેન’એ પાંચ દિવસમાં ૧પ૩.રપ કરોડ રૂપિયાની તગડી કમાણી કરી છે. દિવાળી પર્વમાં રજાઓના માહોલમાં દર્શકોએ મનોરંજન માટે હિંદી ફિલ્મો પર ફરીથી વિશ્વાસ મૂકીને કમાણીના નવા શિખરો સર કર્યા છે. ‘સિંઘમ અગેન’ ફિલ્મ પ્રથમ સપ્તાહમાં ૧૮૦થી ૧૯૦ કરોડ રૂપિયાનો કારોબાર આસાનીથી કરી લેશે તે પ્રકારનું વાતાવરણ સર્જાયુ છે.
એક રીપોર્ટ અનુસાર સિંઘમ અગેન ફિલ્મએ દેશભરમાં પાંચ દિવસમાં ૧પ૩.રપ કરોડ રૂપિયા કમાઈ લીધા છે. મંગળવારના રોજ પાંચમા દિવસે દેશભરમાં રૂ.૧૩.પ૦ કરોડની આસપાસનો બિઝનેસ કર્યો છે. જયારે સોમવારે તે ૧૮ કરોડ રૂપિયાના નેટ કલેકશન પર આંકડો હતો.
પહેલા દિવસે ૪૩.પ૦ કરોડનો કારોબાર થયો હતો. જોકે ધીમેધીમે તેની કમાણી સતત ઘટી રહી છે. તેને કારણે ફિલ્મ મેકર ચિંતામાં મૂકાયા છે. જોકે હજુ દિવાળી પર્વમાં શાળા-કોલેજોમાં રજાનો માહોલ હોવાથી સિંઘમ અગેનની આવકમાં વધારો થશે તેવી ગણતરી મૂકવામાં આવી રહી છે.
