ગુજરાતની DEO કચેરીઓ હવે સંપૂર્ણ પેપરલેસ,માત્ર ‘ઈ-સરકાર’ પોર્ટલ જ ચાલશે

(એજન્સી)ગાંધીનગર, રાજ્યની શિક્ષણ વ્યવસ્થામાં પારદર્શિતા અને ઝડપ લાવવા માટે સરકાર દ્વારા મક્કમ ડગલું ભરવામાં આવ્યું છે. રાજ્યની તમામ જિલ્લા શિક્ષણાધિકારી કચેરીઓને હવે સંપૂર્ણપણે ડિજિટલ બનાવી ‘ઈ-સરકાર’ પોર્ટલ હેઠળ આવરી લેવાનો કડક આદેશ આપવામાં આવ્યો છે.

હવેથી શાળાઓના કમિશનરની કચેરી ખાતે કોઈપણ પત્રવ્યવહાર કે ફાઈલ હાર્ડ કોપીમાં સ્વીકારવામાં આવશે નહીં. શાળા કમિશનર કચેરી દ્વારા જારી કરવામાં આવેલા નવા આદેશ મુજબ, તમામ વહીવટી અને શૈક્ષણિક કામગીરી હવે ડિજિટલ ફોર્મેટમાં જ કરવાની રહેશે. ડ્ઢઈર્ં કચેરીથી રાજ્ય કક્ષાએ મોકલવામાં આવતી ફાઈલો જો ભૌતિક સ્વરૂપે હશે, તો તેનો અસ્વીકાર કરવામાં આવશે.

જો કોઈ અધિકારી આ આદેશનું ઉલ્લંઘન કરી મેન્યુઅલ ફાઈલ મોકલશે, તો તેમની સામે શિસ્તભંગના પગલાં લેવાની પણ ચેતવણી આપવામાં આવી છે. સરકારનો મુખ્ય હેતુ સરકારી કચેરીઓને આધુનિક બનાવવાનો છે.

જેમાં મેન્યુઅલ ફાઈલોની હેરફેરમાં થતો સમય બચશે અને કામગીરી ઝડપી થશે. કોઈ ફાઈલ કયા ટેબલ પર અને કેટલા સમયથી પેન્ડિંગ છે તેનું ઓનલાઈન ટ્રેકિંગ સરળ બનશે. ભ્રષ્ટાચાર અને ફાઈલો ગુમ થવાની શક્યતાઓ નહિવત્ થઈ જશે. આ ઉપરાંત વર્ષો જૂના દસ્તાવેજોને ડિજિટલ સ્વરૂપે સુરક્ષિત રાખી શકાશે.

ઉલ્લેખનીય છે કે, પ્રાથમિક શિક્ષણ વિભાગમાં વર્ષ ૨૦૨૪થી ઇ સરકારમાં કામગીરી ચાલે છે અને નવો જે આદેશ છે એ સેકન્ડરી અને હાયર સેકન્ડરી શિક્ષણ માટે છે., પરંતુ કેટલીક કચેરીઓ હજુ પણ જૂની પદ્ધતિથી જ કામ કરતી હતી.