સતત ૭ કલાક સુધી પીછો કરીને રાજસ્થાનના બે કુખ્યાત ભાગેડુ ગેંગસ્ટરો અમદાવાદમાં ઝડપાયા

ગુજરાતમાં પોતાનું ગુનાહિત સામ્રાજ્ય જમાવે તે પહેલા જ ક્રાઈમ બ્રાન્ચે તેમની ધરપકડ કરી લીધી છે.-વેજલપુર-વિશાલા રોડ પરથી રવિ ગોદારા ગેંગના ૨ ગેંગસ્ટરની ધરપકડ

(એજન્સી)અમદાવાદ, અમદાવાદ ક્રાઈમ બ્રાન્ચે એક ઇનપુટના આધારે રાજસ્થાનની અત્યંત કુખ્યાત અમન બચ્ચા ગેંગના બે સાગરીતોને સતત ૭ કલાકની કામગીરી બાદ ફિલ્મી ઢબે ઝડપી પાડ્‌યા છે. આ ગેંગ ગુજરાતને પોતાનું નવું ઠેકાણું બનાવી અહીંથી ગુનાહિત સામ્રાજ્ય ચલાવવાના પ્રયત્નમાં હતા.

જેમાં ક્રાઈમ બ્રાન્ચની ટીમે કોટાના અમન ઉર્ફે બચ્ચા અને સુહેબ ઉર્ફે ચિન્ટુ નામના આરોપીઓને વેજલપુર-વિશાલા રોડ પરથી ફિલ્મી સ્ટાઇલમાં પીછો કરીને દબોચી લીધા હતા. મહત્ત્વનું છે કે, આ બંને રવિ ગોદારા ગેંગ સાથે સંકળાયેલા હોવાનું પ્રાથમિક તપાસમાં સામે આવ્યું છે.

મળતી માહિતી મુજબ, અમદાવાદ ક્રાઈમ બ્રાન્ચે એક બાતમીના આધારે સતત ૭ કલાક સુધી પીછો કરીને રાજસ્થાનના બે કુખ્યાત ભાગેડુ ગેંગસ્ટરો, અમન ઉર્ફે બચ્ચા (એહસાનઅલી સૈયદ) અને સુહેબ ઉર્ફે ચિન્ટુ (ફિરોઝખાન પઠાણ)ને ઝડપી પાડ્‌યા છે. આ બંને રાજસ્થાનના કોટામાં આર્મ્સ એક્ટ જેવા ગંભીર ગુનાઓમાં વોન્ટેડ હતા અને તેમની સામે સંગઠિત ખંડણી, હત્યાનો પ્રયાસ તેમજ ટાર્ગેટેડ શૂટિંગ જેવા ૨૦થી વધુ ગુનાઓ નોંધાયેલા છે.

આ ઓપરેશન દ્વારા ગુજરાત પોલીસે આંતરરાજ્ય ગુનેગારોના ષડયંત્ર પર પાણી ફેરવી દીધું છે અને હવે કાયદાકીય પ્રક્રિયા પૂર્ણ થયા બાદ તેમને કોટા પોલીસને સોંપવાની તજવીજ હાથ ધરવામાં આવી છે.

આ મામલે ક્રાઈમ બ્રાંચના ઘાસૂરાએ આ ઓપરેશન અંગે વિગતવાર માહિતી આપતા જણાવ્યું હતું કે, અમન બચ્ચા ગેંગ એક અત્યંત ખતરનાક અને સોપારી કિલર પ્રકારના ગુનેગારોનું ગ્રુપ છે, જે હુમલો કરવામાં જરાપણ અચકાતા નથી. પોલીસને બાતમી મળી હતી કે તેઓ અમદાવાદમાં પોતાનું સેટઅપ કરવા માટે સ્થાનિક સંપર્કો શોધી રહ્યા છે, જો કે પોલીસ પાસે શરૂઆતમાં તેમના કોઈ મોબાઈલ નંબર કે અન્ય વિગતો નહોતી.

સતત ટેકનિકલ સર્વેલન્સ, મોબાઈલ ટ્રેસિંગ અને ઇન્ફોર્મર્સની મદદથી પોલીસ તેમની પાછળ લાગી હતી. જ્યારે પોલીસ એકદમ નજીક પહોંચી ત્યારે આરોપીઓને શંકા થતાં તેઓએ ક્રેટા ગાડી ફુલ સ્પીડમાં ભાગહતી, પરંતુ ક્રાઈમ બ્રાંચની ટીમે જીવના જોખમે પીછો ચાલુ રાખ્યો અને હાઈ-વોલ્ટેજ ડ્રામા બાદ તેમને રસ્તા પર જ આંતરી લીધા હતા અને બંનેની ધરપકડ કરી હતી.

પ્રાથમિક તપાસમાં સામે આવ્યું છે કે ઝડપાયેલા બંને આરોપીઓ કુખ્યાત રવિ ગોદારા ગેંગ સાથે સંકળાયેલા છે અને હાલમાં તેમની બિશ્નોઈ ગેંગ સાથે તકરાર ચાલી રહી છે. આ ગેંગસ્ટરો અમદાવાદમાં પોતાનું ખંડણીનું નેટવર્ક સ્થાપિત કરવા અને નવા સ્થાનિક ટાર્ગેટ શોધવાના ઈરાદે ગુજરાતમાં આશરો લઈ રહ્યા હતા.

ગુજરાતમાં પોતાનું ગુનાહિત સામ્રાજ્ય જમાવે તે પહેલા જ ક્રાઈમ બ્રાન્ચે તેમની ધરપકડ કરી લીધી છે. રાજસ્થાન પોલીસ સાથેના સંકલન દ્વારા હવે તેમના ગુનાઈત ઇતિહાસની વધુ ઊંડાણપૂર્વક તપાસ કરવામાં આવી રહી છે.