લગ્નના ૪ દિવસમાં જ સાસરીયાઓએ દેખાડી દીધો અસલી રંગ

દહેજભૂખ્યા સાસરિયાઓની રુ.૫૧ લાખ અને રુ.૧ કરોડની કારની ડિમાન્ડ- વારંવાર “તું તારા બાપના ઘરેથી અમારા મોભા મુજબનો કરિયાવર, ફોર-વ્હીલર કે મકાન-મિલકત લાવી નથી” તેમ કહીને મેણાં-ટોણાં મારતા હતા

અમદાવાદ, સોલા વિસ્તારમાં દહેજ ઉત્પીડનનો એક ચોંકાવનારો કિસ્સો સામે આવ્યો છે. લગ્નમાં ૭૮ તોલા સોનું અને ૪ કિલો ચાંદી આપવા છતાં સાસરિયાઓએ પરિણીતાને માનસિક અને શારીરિક ત્રાસ આપ્યો હતો.

પતિએ ૫૧ લાખ રોકડા અને ૧ કરોડની લક્ઝરી કારની માંગણી કરી પરિણીતા સાથે પત્ની તરીકેના સંબંધો પણ રાખ્યા નહોતા. અંતે, અન્ય યુવતી સાથે પ્રેમસંબંધ હોવાનું કહી પરિણીતાને ઘરમાંથી કાઢી મૂકવામાં આવતા સોલા પોલીસે પતિ અને સાસુ-સસરા વિરુદ્ધ ગુનો નોંધી કાયદેસરની કાર્યવાહી હાથ ધરી છે.

ભોગ બનનાર પરિણીતાના પિતાએ દીકરીના લગ્ન સમયે પોતાની યથાશક્તિ મુજબ ૭૮ તોલા સોનાના દાગીના, ૪ કિલો ચાંદી અને તમામ ઘરવખરીનો સામાન આપ્યો હતો. આમ છતાં, લગ્નના માત્ર ૩થી ૪ દિવસમાં જ સાસરિયાઓએ અસલી રંગ બતાવવાનું શરૂ કર્યું હતું. “તું તારા બાપના ઘરેથી અમારા મોભા મુજબનો કરિયાવર, ફોર-વ્હીલર કે મકાન-મિલકત લાવી નથી” તેમ કહીને મેણાં-ટોણાં મારવામાં આવતા હતા.

પરિણીતાનો પતિ સતત તેના પિતા પાસેથી ૫૧ લાખ રોકડા અને ૧ કરોડની કિંમતની લક્ઝરી ફોર-વ્હીલર ગાડી લઈ આવવા માટે દબાણ કરતો હતો. એટલું જ નહીં, સાસરિયાઓ પરિણીતાને નીચી દેખાડતાં કહેતા કે, “અમે ઉચ્ચ ખાનદાનના છીએ અને તું ઊતરતા ખાનદાનની છે, તારા કરતાં વધુ દહેજ આપે તેવી છોકરીઓ મળતી હતી, તારી સાથે લગ્ન કરીને અમે ભૂલ કરી છે.”

પતિ લગ્ન બાદ પરિણીતા સાથે નાની-નાની વાતોમાં ઝઘડો કરી મારઝૂડ કરતો હતો અને પત્ની તરીકેના કોઈ સંબંધો રાખ્યા નહોતા. જ્યારે પરિણીતાએ આ અંગે સાસુને ફરિયાદ કરી, ત્યારે સાસુએ પણ દીકરાનો પક્ષ લઈને ઝઘડો કર્યો હતો. પરિણીતાને વિદેશ લઈ ગયા પછી પણ પતિ તેની સાથે રહેતો નહોતો અને બીમારીના સમયે ખબરઅંતર પૂછવા પણ આવ્યો ન હતો.

પતિએ પરિણીતાને સ્પષ્ટ કહી દીધું કે તેના અન્ય યુવતી સાથે પ્રેમસંબંધ છે અને તે તેની સાથે જ લગ્ન કરવા માંગે છે. આટલું કહીને પરિણીતાને છૂટાછેડાની ધમકી આપી ઘરમાંથી હાંકી કાઢવામાં આવી હતી. આખરે ન્યાય માટે પરિણીતાએ સોલા પોલીસ સ્ટેશનના દ્વાર ખટખટાવતાં પોલીસે ગુનો નોંધી વધુ તપાસ શરૂ કરી છે.