ધનાઢય વેપારીઓને પ્રેમની જાળમાં ફસાવતી હની ટ્રેપ ગેંગનો પર્દાફાશ

અત્યાર સુધીમાં ૧૧ આરોપીઓની ધરપકડ -ગુગલ સર્ચમાંથી નંબર લઈ જાળમાં ફસાવવાનું કરતા કાવતરું-પોલીસને આશંકા છે કે આ ગેંગનો ભોગ બનનાર લોકોની સંખ્યા ઘણી મોટી હોઈ શકે છે

રાજકોટ, ગુજરાતના રાજકોટ જિલ્લામાંથી એક ચોંકાવનારો કિસ્સો સામે આવ્યો છે, જ્યાં પોલીસે વેપારીઓ અને ઉદ્યોગપતિઓને પ્રેમ સંબંધોમાં ફસાવીને લાખો રૂપિયા પડાવતી એક શાતિર ‘હની ટ્રેપ’ ગેંગનો પર્દાફાશ કર્યો છે.

આ મામલે પોલીસે ગેંગની મુખ્ય સૂત્રધાર પ્રિયંકા ઉર્ફે પીયુ સહિત અત્યાર સુધીમાં ૧૧ આરોપીઓની ધરપકડ કરી લીધી છે. પોલીસને આશંકા છે કે આ ગેંગનો ભોગ બનનાર લોકોની સંખ્યા ઘણી મોટી હોઈ શકે છે.

જેતપુર શહેર પોલીસની તપાસમાં બહાર આવ્યું છે કે, આ ટોળકી ખાસ કરીને આર્થિક રીતે સક્ષમ મધ્યમ વર્ગના વેપારીઓ, કારખાનેદારો અને ઉદ્યોગપતિઓને જ પોતાનો શિકાર બનાવતી હતી.

આ ગેંગ છેલ્લા કેટલાય સમયથી શહેરી વિસ્તારોની સાથે-સાથે સૌરાષ્ટ્રના ગ્રામીણ વિસ્તારોમાં પણ સક્રિય હતી અને વેપારીઓ પાસેથી મોટી રકમ પડાવતી હતી. થોડા દિવસો પહેલા જેતપુર અને જામકંડોરણા પોલીસ સ્ટેશનમાં નોંધાયેલી બે અલગ-અલગ ફરિયાદોના આધારે પોલીસે ઊંડાણપૂર્વક તપાસ શરૂ કરી ત્યારે આ આખા કાવતરાનો પર્દાફાશ થયો હતો.

પ્રિયંકા અને તેની ટોળકી ઉપર રાજકોટ, મોરબી , ટંકારા, જેતપુર , વાંકાનેર ના વેપારીઓ ને ફસાવી પૈસા પડાવવાનો આરોપ છે. પ્રિયંકા ઉર્ફે પિયુ અનેક કારખાનેદાર તેમજ વેપારીઓને મિત્ર બનાવવા અને સંબંધ બાંધવાના બહાને એકાંતની જગ્યાએ બોલાવતી હતી. અને એન્ડ મોકા ઉપર પોતાની ગેંગને સદસ્યોને બોલાવી તેને બ્લેકમેલ કરી પૈસા પાડવામાં આવતા હતા. હનીટ્રેપ ગુનામાં પ્રિયંકા સામે જેતપુર , જામકંડોરણા અને જૂનાગઢ ના ભેંસાણ ખાતે પણ ફરિયાદ નોંધાઈ છે.

પોલીસના જણાવ્યા અનુસાર, આ ગેંગ ખૂબ જ આયોજિત રીતે નેટવર્ક ચલાવતી હતી. ગેંગના સભ્યો ગુગલ સર્ચ, દુકાનોના સાઇનબોર્ડ અને અન્ય જાહેર માધ્યમો દ્વારા મોટી ઉંમરના ઉદ્યોગપતિઓ અને ફેક્ટરી માલિકોના ફોન નંબર મેળવતા હતા.

આ નંબરો જામનગરના કાલાવડની રહેવાસી અને ગેંગની મુખ્ય કડી પ્રિયંકા (પીયુ ગિનોયા) ને આપવામાં આવતા. પ્રિયંકા ફોન પર વેપારીઓ સાથે મીઠી-મીઠી વાતો કરીને મિત્રતા કેળવતી અને પ્રેમની જાળમાં ફસાવી મળવા માટે આમંત્રણ આપતી. જ્યારે કોઈ વેપારી મળવા માટે તૈયાર થતો, ત્યારે પ્રિયંકા પોતે જવાને બદલે અન્ય કોઈ મહિલાને મોકલતી. વેપારી નક્કી કરેલા સ્થળે પહોંચે કે તરત જ ગેંગના ૪-૫ પુરુષ સભ્યો ત્યાં આવીને તેને ઘેરી લેતા હતા.

સ્થળ પર પહોંચીને ગેંગના સભ્યો વેપારીને માર મારતા અને તેને બળાત્કાર જેવા ગંભીર કેસોમાં ફસાવી દેવાની ધમકી આપતા હતા. સામાજિક પ્રતિષ્ઠા ગુમાવવાની અને વ્યવસાય બરબાદ થવાના ડરથી વેપારીઓ આસાનીથી તેમના દબાણમાં આવી જતા અને ગેંગ તેમની પાસેથી લાખો રૂપિયા પડાવી લેતી હતી.

તપાસમાં ખૂલ્યું છે કે આ ગેંગે અગાઉ મોરબી, રાજકોટ, જેતપુર, વાંકાનેર અને જૂનાગઢના ભેંસાણ વિસ્તારમાં પણ અનેક વેપારીઓને શિકાર બનાવ્યા છે.ટેકનિકલ પુરાવા અને હ્યુમન ઇન્ટેલિજન્સના આધારે પોલીસે મુખ્ય આરોપી પ્રિયંકાના રિમાન્ડ મેળવી વધુ પૂછપરછ શરૂ કરી છે.

પોલીસનું માનવું છે કે સામાજિક બદનક્ષીના ડરથી ઘણા વેપારીઓ હજુ સુધી ફરિયાદ કરવા આગળ આવ્યા નથી. આથી પોલીસે જનતાને અપીલ કરી છે કે જો કોઈ આ ગેંગનો ભોગ બન્યું હોય તો નીડર થઈને પોલીસનો સંપર્ક કરે, ફરિયાદીની ઓળખ સંપૂર્ણપણે ગુપ્ત રાખવામાં આવશે. આ ઘટનાથી હાલ સમગ્ર સૌરાષ્ટ્રના વેપારી આલમમાં ભારે ચકચાર મચી ગઈ છે.