ગુજરાતમાં રૂ. ૩૨૪ કરોડથી વધુનું ક્રિકેટ સટ્ટાબાજી અને સાયબર ફ્રોડ કૌભાંડ: તપાસ તેજ

• SMC એ રૂ. ૩૨૪ કરોડનું ઓનલાઈન સટ્ટાબાજી કૌભાંડ ઝડપ્યું. કૌભાંડમાં કુલ ૪૭ આરોપીઓ સામે ગુનો નોંધવામાં આવ્યો.

• સટ્ટાબાજીના નાણાં છુપાવવા ‘મ્યુલ’ બેંક ખાતાઓનો ઉપયોગ થતો.-દુબઈ કનેક્શન અને ફ્રેન્ચાઈઝી મોડલ દ્વારા નેટવર્ક ચાલતું હતું.

ગાંધીનગર/અમદાવાદ, 21 જૂન: ગુજરાત પોલીસના સ્ટેટ મોનિટરિંગ સેલ (SMC) એ કથિત ગેરકાયદેસર ઓનલાઈન ક્રિકેટ સટ્ટાબાજી અને સાયબર ફ્રોડ નેટવર્કની તપાસ તેજ કરી છે. સત્તાવાળાઓના જણાવ્યા અનુસાર, આ મામલે અનેક ધરપકડો કરવામાં આવી છે અને મોટા પાયે ‘મ્યુલ’ (બેનામી) બેંક ખાતાઓનો ઉપયોગ કરીને રૂ. ૩૨૪ કરોડથી વધુના શંકાસ્પદ વ્યવહારો થયા હોવાનું સામે આવ્યું છે.

આ કેસની શરૂઆત ચાલુ વર્ષના મે મહિનામાં વિજય કરદાણીની ધરપકડ સાથે થઈ હતી, ત્યારબાદ તપાસકર્તાઓએ કેટલાક રાજ્યો અને વિદેશી કનેક્શન ધરાવતા વ્યાપક નેટવર્કની લિંક શોધવાનું શરૂ કર્યું હતું.

અધિકારીઓના જણાવ્યા અનુસાર, કરદાણીની ધરપકડ બાદ ઈન્ડિયન પ્રીમિયર લીગ (IPL) સીઝન સાથે જોડાયેલી ઓનલાઈન સટ્ટાબાજીની પ્રવૃત્તિઓનું આખું રેકેટ ખુલ્લું પડ્યું હતું. ચોક્કસ બાતમીના આધારે પોલીસે અમદાવાદના નિકોલ વિસ્તારમાંથી કરદાણીની ધરપકડ કરી હતી અને તેની પાસેથી ટેબ્લેટ, ત્રણ મોબાઈલ ફોન, ટેલિવિઝન, સેટ-ટોપ બોક્સ, રોકડ અને કાર સહિતના ઈલેક્ટ્રોનિક ઉપકરણો અને અસ્કયામતો જપ્ત કરી હતી. જપ્ત કરાયેલી મિલકતની કુલ કિંમત રૂ. ૧૫,૭૩,૬૬૦ હોવાનો અંદાજ છે.

ત્યારબાદની તપાસમાં ૪૭ આરોપીઓ સામે ગુનો નોંધવામાં આવ્યો હતો, જેમાં રાજવીરસિંહ નામના મુખ્ય વોન્ટેડ આરોપી અને ગ્રાહકો અથવા સહાયકો તરીકે સંકળાયેલા અન્ય ૪૫ લોકોનો સમાવેશ થાય છે. આ કેસ જુગાર ધારાની કલમ ૪ અને ૫, ભારતીય ન્યાય સંહિતાની કલમ ૧૧૨(૨) અને ઇન્ફોર્મેશન ટેકનોલોજી એક્ટ, ૨૦૦૦ની કલમ ૬૬(ડી) હેઠળ નોંધવામાં આવ્યો છે.

તપાસકર્તાઓએ શોધી કાઢ્યું કે વિજય કરદાણી, મીત કલરીયા, જય ઉર્ફે રાજા અઘેરા, અનિલ ગોકળદાસ ઉર્ફે ગોપાલદાસ કોટક અને આકાશ નાયક સહિતના અનેક આરોપીઓ પોતાની ઓળખ છુપાવવા અને પકડાઈ જવાથી બચવા માટે ‘મ્યુલ’ બેંક ખાતાઓ દ્વારા ગેરકાયદેસર સટ્ટાબાજીની રકમ ટ્રાન્સફર કરતા હતા.

પોલીસે જણાવ્યું કે કરદાણીના મોબાઈલ ફોનમાંથી રિકવર કરાયેલા વોટ્સએપ ડેટામાં ૨૮૧ બેંક ખાતાઓની વિગતો મળી હતી, જેમાંથી ૫૦ ખાતાઓ નેશનલ સાયબરક્રાઈમ રિપોર્ટિંગ પોર્ટલ (NCCRP) દ્વારા વેરિફિકેશન બાદ ફ્રીઝ કરવામાં આવ્યા હતા. આરોપી અનિલ ગોકળદાસના ઉપકરણમાંથી અન્ય એક રિકવરીમાં, તપાસકર્તાઓએ ૧,૯૦૭ બેંક ખાતાઓની વિગતો મેળવી હતી, જેમાંથી ૩૦૪ ખાતાઓ ફ્રીઝ હોવાની પુષ્ટિ થઈ છે. આ ખાતાઓનો ઉપયોગ કથિત રીતે ગેરકાયદેસર ઓનલાઈન ક્રિકેટ સટ્ટાબાજી અને સાયબર ફ્રોડ માટે કરવામાં આવતો હતો.

તપાસમાં ‘મ્યુલ’ ખાતાઓનું સંચાલન કરવા માટે કમિશન આધારિત માળખું પણ બહાર આવ્યું છે. આકાશ નાયકે દુબઈ સ્થિત હેન્ડલર “યુઆન” પાસેથી સટ્ટાબાજી સંબંધિત નાણાકીય પ્રવાહનું સંચાલન કરવા માટે ૪૦ ટકા કમિશન પર ફ્રેન્ચાઈઝી જેવી વ્યવસ્થા મેળવી હોવાનો આરોપ છે. તેણે આગળ ભારતમાં ૨૦ થી ૨૫ ટકા કમિશન પર સબ-ફ્રેન્ચાઈઝીઓ આપી હોવાનો પણ આરોપ છે.

પોલીસે જણાવ્યું હતું કે, વ્યાપક તપાસ દરમિયાન આ નેટવર્ક સાથે જોડાયેલા કુલ ૩૫૪ બેંક ખાતાઓ સામે વિવિધ રાજ્યોમાં સાયબર ક્રાઈમની ફરિયાદો નોંધાઈ હોવાનું જાણવા મળ્યું છે. આ ખાતાઓને કાયદા અમલીકરણ એજન્સીઓ દ્વારા ફ્રીઝ કરવામાં આવ્યા છે. વધુમાં, NCCRP પોર્ટલ પર આ ખાતાઓના સંદર્ભમાં ૫૪૨ સાયબર ફ્રોડની ફરિયાદો નોંધાઈ હતી. ફરિયાદના ડેટા અનુસાર, પીડિતો સાથે કુલ રૂ. ૩૨૪,૫૮,૩૪,૨૮૫ ની છેતરપિંડી કરવામાં આવી હતી.

અધિકારીઓએ વધુમાં જણાવ્યું હતું કે આરોપીઓએ છેલ્લા બે વર્ષમાં એક સંકલિત ષડયંત્રના ભાગરૂપે સટ્ટાબાજી અને ગેમિંગ પ્રવૃત્તિઓમાંથી મેળવેલા ગેરકાયદેસર નાણાં ટ્રાન્સફર કરવા માટે અજાણ્યા વ્યક્તિઓના નામે નોંધાયેલા ‘મ્યુલ’ ખાતાઓનો ઉપયોગ કર્યો હતો.

હાલમાં આ કેસમાં આકાશ નાયક, અનિલ કોટક, પ્રતીક મરાડીયા, વિજય કરદાણી, અશ્વિન મેંદપરા, જય ઉર્ફે શંભુ કનેરીયા, હિરેન કથરીયા, નવનીત ખાંબલા, જય ઉર્ફે રાજા અઘેરા અને મીત કલરીયા સહિત ૧૦ આરોપીઓની ધરપકડ કરવામાં આવી છે. તપાસકર્તાઓ અન્ય લાભાર્થીઓ અને એકાઉન્ટ હેન્ડલર્સની ઓળખ કરવા માટે ભારતમાં અને વિદેશમાં મની ટ્રેલની તપાસ ચાલુ રાખી રહ્યા છે. પોલીસે જણાવ્યું હતું કે આગામી સમયમાં વધુ ધરપકડો થવાની શક્યતા છે.