મુંબઈ હાઈવે પર BMW કાર 250ની સ્પીડે પલટીઃ મૃતકોના અંગો રસ્તા પર દૂર-દૂર સુધી વેરવિખેર પડયા
મુંબઈ-વડોદરા હાઈવે પર 250ની ઝડપે જતી BMWનો ભયાનક અકસ્માત
બર્થડે સેલિબ્રેશન પતાવ્યા બાદ મિત્રો સાથે લોન્ગ ડ્રાઈવ પર નીકળેલા ત્રણ યુવાનોની સફર માત્ર ગણતરીની મિનિટોમાં જ કાળના કોળિયામાં ફેરવાઈ ગઈ-યુવક-યુવતીના મોત થયાં
મુંબઈ, મહારાષ્ટ્રના બદલાપુરથી એક અત્યંત ચોંકાવનારા અને હૃદયદ્રાવક સમાચાર સામે આવ્યા છે. રવિવારે ૨૧ જૂનના રોજ બર્થડે સેલિબ્રેશન પતાવ્યા બાદ મિત્રો સાથે લોન્ગ ડ્રાઈવ પર નીકળેલા ત્રણ યુવાનોની સફર માત્ર ગણતરીની મિનિટોમાં જ કાળના કોળિયામાં ફેરવાઈ ગઈ હતી.
મુંબઈ-વડોદરા હાઈવે પર સ્પીડની મજા સજા બની ગઈ હતી અને અકસ્માત એટલો ભીષણ હતો કે કાર પલટી ખાઈને રોડ પર ઘસડાતી ગઈ હતી, જેના લીધે મૃતકોના અંગો પણ રસ્તા પર દૂર-દૂર સુધી વેરવિખેર થઈ ગયા હતા.
મૃતકોની ઓળખ બદલાપુરના રહેવાસી યોગેશ નેગી (૨૬) અને બાંદ્રાની રહેવાસી રેબેકા જેકબ (૨૪) તરીકે થઈ છે. રવિવારે યોગેશનો જન્મદિવસ હોવાથી તેણે બદલાપુર પશ્ચિમમાં પોતાના મિત્રો સાથે એક શાનદાર પાર્ટી રાખી હતી. પાર્ટી પૂરી થયા બાદ બર્થડે બોય યોગેશ, તેની મિત્ર રેબેકા અને કારનો માલિક અંગદ મોડી રાત્રે આ નિર્માણાધીન એક્સપ્રેસવે પર ફરવા માટે નીકળ્યા હતા. મળતી માહિતી મુજબ, કાર ટિટવાલાથી બદલાપુર તરફ આવી રહી હતી.
VIDEO | Badlapur, Maharashtra: Birthday celebration ended in tragedy as a BMW crashed and killed two on the Mumbai-Vadodara Highway. Visuals from the spot. More details are awaited. #Maharashtra
(Full video available on PTI Videos – https://t.co/n147TvrpG7) pic.twitter.com/BtyrwFvJD3
— Press Trust of India (@PTI_News) June 22, 2026
આ દરમિયાન એરંજાડ વિસ્તાર પાસે ચાલકે કાર પરનો કાબૂ ગુમાવી દીધો હતો અને પૂરપાટ ઝડપે જતી કાર સીધી ડિવાઈડર સાથે ધડાકાભેર અથડાઈ હતી.પ્રત્યક્ષદર્શીઓના જણાવ્યા અનુસાર, રાત્રે આશરે ૨ થી ૩ વાગ્યાની વચ્ચે આ લક્ઝરી કાર એક્સપ્રેસવે પર ઘણી વાર ભારે ઝડપે દોડતી જોવા મળી હતી.
એક ચશ્મદીદે જણાવ્યું કે, “આ કાર બે વાર અમારી સામેથી ખૂબ જ હાઈ-સ્પીડમાં પસાર થઈ હતી. પરંતુ ત્રીજી વખત એક જોરદાર ધડાકાનો અવાજ સંભળાયો. અમે જ્યારે ઘટનાસ્થળે દોડીને પહોંચ્યા ત્યારે કાર સંપૂર્ણપણે તબાહ થઈ ચૂકી હતી. એક યુવતી (રેબેકા) કારમાંથી ફગાઈને ઘણી દૂર જઈને પડી હતી અને થોડી જ વારમાં તેણે દમ તોડી દીધો હતો.”
આ અકસ્માતમાં યોગેશ અને રેબેકાના ઘટનાસ્થળે જ મોત થયા છે, જ્યારે કાર ચલાવી રહેલો અંગદ નામનો યુવક ગંભીર રીતે ઘાયલ થયો છે. તેને તાત્કાલિક સારવાર માટે ઠાણેની જ્યુપિટર હોસ્પિટલમાં દાખલ કરવામાં આવ્યો છે, જ્યાં ડોક્ટરોના જણાવ્યા અનુસાર હાલ તેની સ્થિતિ ખતરાથી બહાર છે. ઘટનાની જાણ થતાં જ સ્થાનિક પોલીસ અને ફોરેન્સિક ટીમ ઘટનાસ્થળે પહોંચી ગઈ હતી અને પુરાવા એકત્ર કરવાની કામગીરી શરૂ કરી છે.
સૂત્રોના જણાવ્યા અનુસાર અકસ્માત સમયે ડ્રાઈવર દારૂના નશામાં હોવાની આશંકા છે, પરંતુ પોલીસે હજુ સુધી તેની સત્તાવાર પુષ્ટિ કરી નથી. આટલી ભયાનક ટક્કર છતાં એરબેગ્સ ખુલવાને કારણે કે અન્ય કોઈ કારણોસર અંગદનો જીવ કેવી રીતે બચ્યો, તે તેનો સત્તાવાર બયાન નોંધાયા બાદ જ સ્પષ્ટ થશે.SS1
