યુપીના શખ્સે સગીરાને રાજકોટની હોટલમાં ગોંધી રાખી દુષ્કર્મ આચર્યું
Files Photo
રાજકોટ: શહેરમાં ૬ દિવસ પહેલા સદર બજાર વિસ્તારમાં આવેલી હોટેલ પાર્ક ઇનમાંથી મહિલા પોલીસે કુટણખાનું ઝડપી પાડી દેહવ્યાપારનો ધંધો કરાવતી વડોદરાની મહિલા, હોટલ મેનેજર અને રાજકોટના પુરુષની ધરપકડ કરી હતી. આ હોટેલમાંથી ૬ દિવસ પહેલા દરોડા દરમિયાન મળી આવેલી સગીરાનું ૬ દિવસ સુધી કાઉન્સેલિંગ કર્યા બાદ અને પરિવારને મળ્યા બાદ ચોંકાવનારી હકીકત સામે આવી છે. જેમાં હોટેલના રૂમમાં જ બે મહિના સુધી યુપીના સંતોષકુમાર કુશવાહે સગીરાને ગોંધી રાખી વારંવાર દુષ્કર્મ આચરી હવસનો શિકાર બનાવી હતી. આથી યુપીના અલીગઢનાં સંતોષકુમાર કુશવાહ સામે બળાત્કાર, અપહરણ, પોક્સો સહિતની કલમો હેઠળ મહિલા પોલીસ મથકે ગુનો નોંધાયો છે.
બીજી તરફ દરોડાનાં દિવસથી જ સગીરાનું કાઉન્સેલિંગ ચાલુ હતું. બીજા જ દિવસે મેડિકલ ચેકઅપ થઈ ગયું હતું. અને ત્રીજા કે ચોથા દિવસે સગીરાનો પરિવાર પણ મળી આવ્યો હતો. તે સમયે પોલીસે દાવો કર્યો હતો કે સગીરાનો પરિવાર કોઈ ફરિયાદ કરવા માગતો નથી. કારણ કે તેના મૂળ વતનનો રહેવાસી સંતોષકુમાર હરિસિંહ કુશવાહને સગીરા સાથે પ્રેમસંબંધ હોય જેથી સગીરાને હોટેલમાં રાખી હતી. જાેકે દરોડાનાં ૬ દિવસ બાદ ગત સાંજે મહિલા પોલીસ મથકે સગીરાની માતાએ સંતોષ વિરૂદ્ધ ફરિયાદ દાખલ કરી હતી. સગીરાની માતાના જણાવ્યા મુજબ તેમના બે પુત્રો છેલ્લા કેટલાંક સમયથી રાજકોટમાં રહી મજૂરી કામ કરે છે.
સગીરાની માતાએ જણાવ્યા અનુસાર પરિવાર મૂળ ઉત્તરપ્રદેશનાં અલીગઢનો છે. તેઓ સગીરા અને તેનાથી નાની પુત્રી સાથે અલીગઢ રહેતા હતા. પરંતુ સગીરાનાં પિતાનું અવસાન થયા બાદ બન્ને દીકરી સાથે રાજકોટ આવી ગયા હતા. અહીં પુત્રો સાથે રહેવાની વ્યવસ્થા ન હોવાથી અલીગઢનાં જ વતની અને પરિવારનાં ઓળખીતા એવા સંતોષ કુશવાહ કે જે રાજકોટના કોઠારીયા વિસ્તારમાં આવેલા સ્વાતી પાર્કમાં રહે છે અને ગોંડલ રોડ પર તેનું કારખાનું આવેલું છે. તેણે પોતાનાં કારખાને રહેવાની વ્યવસ્થા કરતા ત્રણેક માસ પહેલા ત્યાં રહેવા ગયા હતા.
આ દરમિયાન સંતોષે સગીરા ઉપર નજર બગાડી હતી અને તેણીને લલચાવી ફોસલાવી પ્રેમજાળમાં ફસાવી હતી અને લગ્ન કરવાના ઈરાદે તેણીનું અપહરણ કરી ભગાડી ગયા બાદ બે માસથી હોટેલમાં રાખી હતી. આ દરમિયાન સગીરા ઉપર સંતોષે વારંવાર દુષ્કર્મ આચરી પોતાની હવસ સંતોષી હતી.
માતાની ફરિયાદ પરથી મહિલા પોલીસે સંતોષકુમાર હરસિંહ કુશવાહ (રહે. હાલ કોઠારીયા વિસ્તાર, ગોંડલ રોડ ઓવરબ્રિજ પાસે સ્વાતિ પાર્ક, મૂળ માદ્રક ગામ અલીગઢ ઉતરપ્રદેશ) વિરૂદ્ધ આઈપીસી કલમ ૩૬૩, ૩૬૬, ૩૭૬ (૨) એન તેમજ પોક્સોની કલમ હેઠળ ગુનો નોંધી આરોપીને ઝડપી લેવા તપાસ હાથ ધરી છે. સગીરાના માતાના જણાવ્યા મુજબ સંતોષે સગીરાને પ્રેમજાળમાં ફસાવ્યા બાદ લગ્ન કરવાની લાલચ આપી હતી. અને એક રીક્ષામાં તેણીને બેસાડી લઈ ગયો હતો. બાદમાં હોટેલ ખાતે અગાઉથી જ બુક કરાયેલા રૂમમાં તેને રાખી હતી.
મહત્વનું છે કે ૬ દિવસ પહેલા રાજકોટ જિલ્લા સમાજ સુરક્ષા વિભાગ અને મુંબઇની એનજીઓ દ્વારા રજૂઆત કરવામાં આવી હતી કે રાજકોટના સદર બજાર વિસ્તાર નજીક આવેલી હોટલ પાર્ક ઇનમાં સંતોષ નામનો વ્યક્તિ સગીર વયની બાળકીને લાવી રૂમમાં રાખી છે જેને મુક્ત કરવા જાણ કરી હતી. બાદમાં પંચો તેમજ સમાજ સુરક્ષા વિભાગને સાથે રાખી પોલીસ ટીમ સાંજના સમયે હોટલ પાર્ક ઇન પહોંચી હતી. જ્યાં હોટલના મેનેજર મેહુલને મળી બાદમાં હોટલની તલાસી લેવામાં આવી હતી.
