પ્રવાસી મજૂરોના ડેટામાં વિલંબ બદલ સુપ્રીમની લાલ આંખ
Files Photo
નવી દિલ્હી: સુપ્રીમ કોર્ટે આજે પોતાના મહત્વના આદેશમાં કહ્યું છે કે દેશભરમાં તમામ રાજ્ય વન નેશન વન રાશન કાર્ડની સ્કીમ ૩૧ જૂલાઈ સુધી લાગુ કરે. સુપ્રીમ કોર્ટે રાજ્યોને કહ્યું કે જ્યાં સુધી કોવિડ મહામારીની સ્થિતિ બનેલી છે ત્યાં સુધી તેઓ કમ્યુનિટી કિચન ચલાવે અને પ્રવાસી મજૂરોને કરિયાણું પૂરું પાડે. આ દરમિયાન મજૂરોના ડેટા તૈયાર કરવામાં મોડું થઈ રહ્યું છે તેના પર કોર્ટે કેન્દ્ર સામે લાલ આંખ કરી છે.
પ્રવાસી મજૂરોના મામલે સુપ્રીમ કોર્ટ તરફથી કેન્દ્ર સરકાર સામે લાલ આંખ કરવામાં આવી છે. સુપ્રીમ કોર્ટે કહ્યું કે શ્રમ અને રોજગાર મંત્રાલય તરફથી પ્રવાસી મજૂરોનો ડેટા તૈયાર કરવામાં મોડું થઈ રહ્યું છે અને બેદરાકારી દાખવમાં આવી રહ્યું છે તે વલણને માફ ના કરી શકાય. પોર્ટલમાં કેન્દ્ર તરફથી જે મોડું થઈ રહ્યું છે તે દર્શાવે છે કે પ્રવાસી મજૂરો પ્રત્યે કોઈ ચિંતા નથી. સુપ્રીમ કોર્ટે પાછલી સુનાવણીમાં કહ્યું હતું કે પ્રવાસી મજૂરોની રજિસ્ટ્રેશન પ્રક્રિયા ઘણી ધીમી છે. રજિસ્ટ્રેશન પ્રક્રિયા નિશ્ચિત રીતે ઝડપી કરવી જેથી કોવિડની સ્થિતિમાં પ્રવાસી મજૂરોને બેનિફિટવાળી યોજનાઓનો લાભ મળી શકે. કોર્ટે કહ્યું કે પ્રવાસી મજૂરો અને બિનસંગઠીત ક્ષેત્રોના મજૂરોના રજિસ્ટ્રેશનની પ્રક્રિયા ઝડપી બનાવવામાં આવે.
આ પહેલાની સુનાવણી દરમિયાન કોર્ટે કહ્યું હતું કે, સરકાર કહી રહી છે કે હજારો કરોડોની ફાળવણી કરી છે. પરંતુ મુદ્દો એ છે કે શું ખરા લાભાર્થિઓ સુધી તે પહોંચી છે? એવામાં તમારે (સરકાર) આ સંપૂર્ણ પ્રક્રિયાને મોનિટરિંગ કરવું પડે. કોર્ટ એ વાતને લઈને ચિંતિત છે કે સંબંધિત લાભાર્થિઓ સુધી બેનિફિટનો લાભ જલદી પહોંચે.
