અમે સરકાર બનાવી રહ્યા છીએ: અખિલેશ યાદવ
લખનૌ, ઉત્તરપ્રદેશ વિધાનસભા ચૂંટણીના તમામ તબક્કા માટે મતદાન પૂર્ણ થઈ ગયું છે. ગઇકાલે સોમવારે રાજ્યમાં સાતમા અને છેલ્લા તબક્કા માટે મતદાન થયું હતું. મતદાન પ્રક્રિયા પૂર્ણ થયા બાદ એક્ઝિટ પોલના આંકડા બહાર આવ્યા છે.
આ દરમિયાન સમાજવાદી પાર્ટીના વડા અખિલેશ યાદવે ટ્વીટ કરીને મોટી વાત કહી છે. એક્ઝિટ પોલમાં સમાજવાદી પાર્ટીને સારો ફાયદો થતો જાેવા મળી રહ્યો છે, પરંતુ તે બહુમતીના આંકડા પાછળ જાેઈ રહી છે. જાે કે આ સિવાય અખિલેશ યાદવે પાર્ટી વિશે એક મોટી વાત કહી છે.
સપાના વડા અખિલેશ યાદવે ટ્વીટ કર્યું, “સાતમા અને નિર્ણાયક તબક્કામાં બહુમતથી ખૂબ આગળ સપા-ગઠબંધનની જીત અપાવવા માટે તમામ મતદારો અને ખાસ કરીને યુવાનોનો ખૂબ ખૂબ આભાર! અમે સરકાર બનાવી રહ્યા છીએ!” આ પહેલા પણ અખિલેશ યાદવ વિધાનસભા ચૂંટણીમાં સપાની જીતનો દાવો કરી ચૂક્યા છે. જ્યારે બીજી તરફ ભાજપ પોતાની જીતનો દાવો કરી રહ્યું છે. ૧૦ માર્ચે પરિણામ જાહેર થશે.HS
