દેશ નિષ્ઠા સાથે ગુરુઓના આદર્શો પર આગળ વધી રહ્યો છે: વડાપ્રધાન
નવીદિલ્હી, નવી દિલ્હીના લાલ કિલ્લા ખાતે શ્રી ગુરુ તેગ બહાદુરજીના ૪૦૦મા પ્રકાશ પર્વના અવસરે આ કાર્યક્રમનું આયોજન કરવામાં આવ્યું છે.
આ સમારોહમાં રાષ્ટ્રને સંબોધતા વડાપ્રધાન નરેન્દ્ર મોદીએ કહ્યું હતું કે ગુરુ તેગ બહાદુર સાહેબના ૪૦૦મા પ્રકાશ પર્વને સમર્પિત આ ભવ્ય કાર્યક્રમમાં હું તમને બધાનું હૃદયપૂર્વક સ્વાગત કરું છું. હવે શબદ કીર્તન સાંભળીને મને જે શાંતિ મળી તે શબ્દોમાં વ્યક્ત કરવી મુશ્કેલ છે.
આજે મને ગુરુને સમર્પિત સ્મારક ટપાલ ટિકિટ અને સિક્કો બહાર પાડવાનો લહાવો પણ મળ્યો છે. હું તેને આપણા ગુરુઓની વિશેષ કૃપા માનું છું. પીએમ મોદીએ કાર્યક્રમમાં સ્મારક સિક્કો અને ટપાલ ટિકિટ પણ બહાર પાડી હતી.
કાર્યક્રમમાં પીએમ મોદીએ કહ્યું, “૨૦૧૯ની શરૂઆતમાં, અમને ગુરુ નાનક દેવજીના ૫૫૦માં પ્રકાશ પર્વ અને ૨૦૧૭માં ગુરુ ગોવિંદ સિંહજીના ૩૫૦મા પ્રકાશ પર્વની ઉજવણી કરવાની તક પણ મળી હતી. મને ખુશી છે કે આજે આપણો દેશ આપણા ગુરુઓના આદર્શો પર સંપૂર્ણ નિષ્ઠા સાથે આગળ વધી રહ્યો છે. આ પુણ્ય પ્રસંગે હું તમામ દસ ગુરુઓના ચરણોમાં નમન કરું છું.
પ્રકાશ પર્વ નિમિત્તે આપ સૌને, તમામ દેશવાસીઓને અને સમગ્ર વિશ્વમાં ગુરુવાણીમાં આસ્થા ધરાવનાર તમામ લોકોને હાર્દિક અભિનંદન પાઠવું છું.
વડાપ્રધાન મોદીએ કહ્યું, “આઝાદીના ૭૫ વર્ષમાં, ભારતના ઘણા સપના અહીંથી ગુંજ્યા છે, તેથી સ્વતંત્રતાના અમૃત ઉત્સવ દરમિયાન લાલ કિલ્લા પર આયોજિત આ કાર્યક્રમ ખૂબ જ ખાસ બની ગયો છે. આ લાલ કિલ્લો ઘણા મહત્વપૂર્ણ સમયગાળાનો સાક્ષી રહ્યો છે. આ કિલ્લાએ ગુરુ તેગ બહાદુર જીની શહાદત પણ જાેઈ છે અને દેશ માટે શહીદ થયેલા લોકોની હિંમતની પણ કસોટી કરી છે.
ધર્મ અને માનવીય મૂલ્યો, આદર્શો અને સિદ્ધાંતોની રક્ષા માટે ગુરુ તેગ બહાદુરજીએ વિશ્વ ઇતિહાસમાં પોતાનું બલિદાન આપ્યું હતું. કાશ્મીરી પંડિતોની ધાર્મિક સ્વતંત્રતાને સમર્થન આપવા બદલ મુઘલ શાસક ઔરંગઝેબના આદેશ પર તેમને ફાંસી આપવામાં આવી હતી.
તેમની પુણ્યતિથિ, ૨૪ નવેમ્બર, દર વર્ષે શહીદ દિવસ તરીકે ઉજવવામાં આવે છે. દિલ્હીમાં ગુરુદ્વારા સીસ ગંજ સાહિબ અને ગુરુદ્વારા રકાબ ગંજ તેમના પવિત્ર બલિદાન સાથે સંકળાયેલા છે. તેમનો વારસો આ રાષ્ટ્ર માટે એકતાના મહાન બળ તરીકે કામ કરે છે.HS
