આમોદ પંથકમાં ચાલતાં બેફામ માટી કૌભાંડો ઉપર કોની રહેમ નજર?
સરભાણ ગામનાં તળાવ તથા તલાવડી માંથી થયેલ માટી કૌભાંડ બાબતે ગામના તત્કાલીન સરપંચ તથા ડેપ્યુટી સરપંચને ૫.૯૩ કરોડનો દંડ ભરવા નોટીસ.
અગાઉ સરભાણ ગામે થયેલ માટી કૌભાંડમાં કોન્ટ્રાકટર ઉત્તમ પટેલને નોટીસ ફટકારવામાં આવી હતી.
(વિરલ રાણા) ભરૂચ,
આમોદ તાલુકાના સરભાણ ગામે ગામ તળાવ તથા તલાવડીમાંથી ગેરકાયદે થયેલ માટી કૌભાંડ બાબતે ભરૂચ ખાણ ખનીજ વિભાગ દ્વારા સરભાણ ગામના તત્કાલીન સરપંચ તથા ડેપ્યુટી સરપંચને ૫.૯૩ કરોડનો દંડ ભરવા નોટીસ ફટકારવામાં આવતાં આમોદ પંથકમાં ગેરકાયદે માટી ચોરી કરતા તત્વોમાં ફફડાટ ફેલાઈ ગયો છે.
આમોદ તાલુકામાં આવેલા સરભાણ ગામે આવેલા સર્વે નંબર ૮ તળાવ તથા સર્વે નંબર ૮૩૭ તલાવડી માંથી ગેરકાયદેસર રીતે ૨,૪૦,૫૬૦ મેટ્રીક ટન સાદી માટીનું બિન અધિકૃત ખોદકામ કરવામાં આવ્યું હતું.
જે બાબતે ૪ એપ્રિલ ૨૦૨૧ ના રોજ સ્થળ તપાસ કરવામાં આવી હતી.આ ઉપરાંત ફેબ્રુઆરી મહિનામાં પણ નાયબ જિલ્લા વિકાસ અધિકારી ભરૂચ,આમોદ તાલુકા વિકાસ અધિકારી તથા ખાણ ખનીજ વિભાગની સયુંક્ત ટીમ દ્વારા પણ સ્થળ તપાસ કરવામાં આવી હતી.જે તપાસ અહેવાલમાં જણાવ્યા મુજબ ગામ પંચાયતના સરપંચ તેમજ સભ્ય અને તલાટી કમ મંત્રીની પણ જવાબદારી બનતી હોય બિન અધિકૃત ખોદકામ બાબતે નોટીસ પાઠવવામાં આવી હતી.જેથી માટી ચોરી કરતાં તત્વોમાં ફફડાટ ફેલાઈ ગયો હતો.
તેમજ જો સાત દિવસમાં આધાર પુરાવા સાથે નોટીસનો ખુલાસો આપવા ખાણ ખનીજ વિભાગના અધિકારીએ ફરમાન કર્યું હતું.અત્રે ઉલ્લેખનીય છે કે આમોદ તાલુકાના સરભાણ ગામે થયેલા માટી કૌભાંડ બાબતે કોન્ટ્રાકટર ઉત્તમ છોટુભાઈ પટેલને દંડ ભરવા નોટીસ ફટકારવામાં આવી હતી.આમોદ તાલુકાના સરભાણ ગામે થયેલા માટી કૌભાંડ બાબતે ગામના જાગૃત નાગરિક બિપિન પટેલે વિકાસ કમિશનર ગાંધીનગરને રજુઆત કરી હતી કે સરભાણ ગામે થયેલા માટી ગામ તળાવ તલાવડી તેમજ ગૌચરની જમીન કૌભાંડમાં આમોદ તાલુકા પંચાયતના પ્રમુખ રોનક પટેલ જે તે સમયે ડેપ્યુટી સરપંચ હતા.અને તેઓ કસૂરવાર હોય તેમને તાત્કાલિક આમોદ તાલુકા પંચાયતના પ્રમુખ પદેથી તેમજ સભ્ય પદે થી બરતરફ કરવા રજુઆત કરી હતી.
સરભાણ ગામે ગૌચરની જમીન માંથી થયેલ માટી કૌભાંડ બાબતે તાલુકા વિકાસ અધિકારીએ આમોદ પોલીસ મથકે ફરિયાદ નોંધાવી હતી.આમોદ તાલુકાના સરભાણ ગામે થયેલા માટી કૌભાંડ બાબતે ગામના તત્કાલીન સરપંચ તથા ડેપ્યુટી સરપંચને ૫.૯૩ કરોડનો દંડ ભરવા નોટીસ ફટકારવામાં આવી છે.ત્યારે ભરૂચ જિલ્લા વિકાસ અધિકારીએ બબ્બે વખત આમોદ તાલુકા વિકાસ અધિકારી સમીર મોજણીદાર સરભાણની ગૌચરની જમીનમાં થયેલા માટી કૌભાંડ બાબતે આમોદ પોલીસ મથકે ફરિયાદ કરવાનો હુકમ કરતાં આખરે ૯ મી મે ના રોજ આમોદ પોલીસ મથકે આમોદ તાલુકા વિકાસ અધિકારીએ સરભાણની ગૌચરની જમીન સર્વે નંબર ૬૬૫ માંથી ૪૫૭૩.૮૨ મેટ્રીક ટનની ચોરી બાબતે જેની કિંમત રૂપિયા ૮,૦૦,૪૧૮ ની આરોપીના નામ ઠામ વગરની ફરિયાદ નોંધાવી હતી.
આમોદ પંથકમાં અનેક જગ્યાએ ગેરકાયદેસર રીતે માટી ચોરો બેફામ બની માટી ચોરી કરી રહ્યા છે. જે બાબતે જાગૃત નાગરિકો દ્વારા ખાણ ખનીજ વિભાગના લાગતા વળગતા અધિકારી સાથે ફોનથી તેમજ લાઈવ લોકેશન મોકલી આપી માટી ચોરી અંગેના ફોટા તેમજ વીડિયો પણ મોકલી ફરિયાદ કરવામાં આવતી હોવા છતાં ખાણ ખનીજ વિભાગનું તંત્ર જાણે માટી ચોરો ઉપર મહેરબાન હોય તેમ કોઈ કાર્યવાહી કરતું નથી.આમોદ પંથકમાં માટી ચોરો દ્વારા છેક પાણીના ઝરણાં ફૂટી નીકળે તેટલી હદે માટી ચોરી કરે છતાં કોઈ કાર્યવાહી કરવામાં આવતી નથી.
