મુકેશ અંબાણીના પુત્ર આકાશની ઉંચી ઉડાન
મુકેશ અંબાણીના પુત્ર અને રિલાયન્સ જિયોના ચેરમેન આકાશ અંબાણીએ એક મોટી સિદ્ધિ હાંસલ કરી છે
નવી દિલ્હી,ભારતના દિગ્ગજ ઉદ્યોગપતિ મુકેશ અંબાણીના પુત્ર અને રિલાયન્સ જિયોના ચેરમેન આકાશ અંબાણીએ એક મોટી સિદ્ધિ હાંસલ કરી છે. તેનું નામ ટાઈમ મેગેઝીનની ‘ટાઈમ ૧૦૦ નેક્સ્ટ’ની યાદીમાં સામેલ કરવામાં આવ્યું છે. ખાસ વાત એ છે કે આ યાદીમાં સ્થાન મેળવનાર તે એકમાત્ર ભારતીય છે.
ભારતીય મૂળની અમેરિકન નાગરિક આમ્રપાલી ગણાએ પણ આ યાદીમાં પોતાનું સ્થાન બનાવ્યું છે. આકાશ અંબાણીનું નામ યાદીમાં સામેલ થયા બાદ ટાઈમ મેગેઝીને તેમના વિશે ટિપ્પણી કરી અને લખ્યું કે ભારતના એક મોટા ઔદ્યોગિક ગૃહ સાથે સંબંધ ધરાવતા આકાશ અંબાણી પાસેથી એવી અપેક્ષા રાખવામાં આવે છે કે તેઓ આગામી દિવસોમાં રિલાયન્સ જિયોને નવી ઊંચાઈઓ પર લઈ જશે.
ટાઈમ ૧૦૦’ની જેમ દુનિયાના સૌથી પ્રભાવશાળી લોકોની યાદી પણ ‘ટાઈમ્સ ૧૦૦ નેક્સ્ટ લિસ્ટ’ છે. આ યાદીમાં બિઝનેસ જગત અને અન્ય ક્ષેત્રોના ઉભરતા સિતારાઓને સ્થાન આપવામાં આવ્યું છે, જેનાથી આશા છે કે તેઓ આવનારા સમયમાં દુનિયાને બદલવામાં મોટું યોગદાન આપી શકે છે. હવે આ યાદીમાં રિલાયન્સ જિયોના ચેરમેન આકાશ અંબાણીએ પોતાનું સ્થાન બનાવી લીધું છે.
મુકેશ અંબાણી અને નીતા અંબાણીના મોટા પુત્ર આકાશ અંબાણીને ‘ટાઈમ ૧૦૦ નેક્સ્ટ’ કેટેગરીમાં સામેલ કરવામાં આવ્યા છે, જે લીડર્સ કેટેગરી છે. તાજેતરમાં જ આકાશ અંબાણીએ રિલાયન્સ જિયોને ગૂગલ અને ફેસબુક સાથે જાેડાણ કર્યું છે. આ માટે આકાશ અંબાણીએ સૌથી મહત્વની ભૂમિકા ભજવી છે. ઉપરાંત, ભારતમાં ટૂંક સમયમાં 5G સેવા શરૂ થવા જઈ રહી છે, જેમાં રિલાયન્સ જિયો અને એરટેલ સૌથી આગળ છે.
ખાસ વાત એ છે કે રિલાયન્સ જિયો એકમાત્ર ભારતીય ટેલિકોમ કંપની છે જેણે 700 MHz સ્પેક્ટ્રમ બેન્ડ ખરીદ્યું છે. 5G સેવા (5G સ્પેક્ટ્રમ)ના આગમન પછી, ભારતમાં ટેલિકોમની દુનિયામાં એક નવી ક્રાંતિ આવી શકે છે. ટાઈમ ૧૦૦ નેક્સ્ટ લિસ્ટમાં સામેલ થનાર આકાશ અંબાણી એકમાત્ર ભારતીય છે. આકાશ અંબાણીએ ૨૨ વર્ષની ઉંમરે જિયોના બોર્ડમાં સ્થાન મેળવ્યું હતું.
આ પછી જૂન ૨૦૨૨માં તેમને રિલાયન્સ જિયોના ચેરમેન બનાવવામાં આવ્યા છે. તે હવે માત્ર ૩૦ વર્ષનો છે. રિલાયન્સ જિયોના દેશભરમાં લગભગ ૪૨ કરોડ ૬૦ લાખ ગ્રાહકો છે. ટાઇમ મેગેઝિન દર વર્ષે TIME100 નેક્સ્ટની યાદી બહાર પાડે છે. આ યાદીમાં બિઝનેસની દુનિયા ઉપરાંત દુનિયાના વિવિધ ક્ષેત્રો અને પ્રોફેશનલ ડોક્ટરો, સરકારી અધિકારીઓ, આંદોલનકારીઓ વગેરેને પણ સ્થાન આપવામાં આવ્યું છે.
આ વર્ષે આકાશ અંબાણી સિવાય અમેરિકન સિંગર SZA, એક્ટ્રેસ સિડની સ્વીની, બાસ્કેટબોલ પ્લેયર જા મોરાન્ટ, સ્પેનિશ ટેનિસ પ્લેયર કાર્લોસ અલ્કારાઝ અને પર્યાવરણ કાર્યકર્તા ફરવિઝા ફરહાનને પણ આ યાદીમાં સ્થાન મળ્યું છે.ss1
