ગઠિયાએ કમિશનર કચેરીમાં હોવાનું કહી વૃદ્ધા સાથે ૧૮ લાખની છેતરપિંડી આચરી

અમદાવાદ, એકતરફ ગૃહ વિભાગ સિનિયર સિટીઝનોની મદદ કરવા પોલીસ વિભાગને સૂચવે છે પરંતુ કેટલાક પોલીસ સ્ટેશનનો સ્ટાફ કે અધિકારીઓ સિનિયર સિટીઝનની મદદ કરવા કે કાર્યવાહી કરવાની જગ્યાએ તેમને ધક્કા ખવડાવી ચપ્પલ ઘસી નાખવા મજબૂર કરે છે.

શહેરમાં રહેતા સિનિયર સિટીઝનને વાસણા પોલીસનો આવો જ કડવો અનુભવ થયો છે. ૫૬ વર્ષીય સિનિયર સિટીઝન મહિલાએ જૂનાગઢની એક મહિલાને દોઢ લાખ રૂપિયા આપ્યા બાદ તે મહિલા રૂપિયા પરત આપતી નહોતી.

ભોગ બનનાર સિનિયર સિટીઝન એક પરિવારના ઘરે રસોઇકામ માટે ગયા ત્યારે ત્યાં કચરા પોતાનું કામ કરતી મહિલાએ તેનો ભાઇ શાહીબાગ સરકારી કચેરીમાં છે અને તે રૂપિયા કઢાવી આપશે તેવો વાયદો કર્યાે હતો. બાદમાં ગઠિયાએ પોતે કમિશનર કચેરીમાં હોવાનું કહીને વૃદ્ધાને વિશ્વાસ કેળવીને તેમની પાસેથી સિફતપૂર્વક ૧૮.૬૫ લાખ મેળવીને પરત ન આપીને છેતરપિંડી આચરી હતી. વૃદ્ધાએ આક્ષેપ કર્યાે છે કે આ બાબતને લઇને તે વાસણા પોલીસ પાસે ગયા ત્યારે તેમને કડવો અનુભવ થયો હતો. સ્થાનિક પોલીસે ફરિયાદ ન લેતા તેમને એસીપી, ડીસીપીને મળવાની ફરજ પડી હતી.

અંતે સાત માસ બાદ વાસણા પોલીસે ગુનો નોંધી તપાસ હાથ ધરી છે. વાસણામાં રહેતા ૫૬ વર્ષીય અલ્કાબેન પરીખ રસોઇકામ કરે છે અને વર્ષ ૨૦૨૪માં તે ઇસનપુરમાં રહેતા કૌશીકાબેનના ઘરે રસોઇ કામ કરવા ગયા હતા. જ્યાં કચરા પોતાનું કામ કરતી સંગીતા નામની મહિલા મળી હતી.

અલ્કાબેને જૂનાગઢની એક મહિલાને હાથ ઉછીના આપેલા દોઢ લાખ પરત ન આપતી હોવા બાબતે સંગીતાને વાત કરી હતી. ત્યારે સંગીતાએ તેનો ભાઇ શાહીબાગ પોલીસ કમિશનર કચેરીમાં સરકારી નોકરી કરતો હોવાનું કહીને ફોન પર વાત કરાવી હતી. એકાદ વર્ષ બાદ લલિત માલી નામનો ગઠિયો અલ્કાબેનના ઘરે આવ્યો હતો.

લલિતે સર્વેલન્સમાં મૂકવા માટે જૂનાગઢની મહિલાનો નંબર મેળવીને પૈસા અપાવી દેવાનો અલ્કાબેનને ભરોસો આપ્યો હતો. બાદમાં લલિતે જૂનાગઢની મહિલા પાસે રૂબરૂ જવાના બહાને અલ્કાબેન પાસેથી ૩૦ હજાર પડાવ્યા હતા. જે બાદ લલિતે જૂનાગઢ જતા મારામારી થઇ હતી અને હાથમાં ળેક્ચર થવાની સાથે તેની સામે ગુનો દાખલ થયો હોવાથી સરકારી નોકરીમાંથી સસ્પેન્ડ કર્યાે હોવાના બહાના બતાવ્યા હતા. જે પછી સરકારી નોકરીમાં ફરી જોડાવવા સેટિંગ કર્યું હોવાથી ૧૯ લાખ વહીવટ નક્કી કર્યાે હોવાનું કહીને અલ્કાબેન પાસેથી ૧૮.૬૫ લાખ રોકડા પડાવી લીધા હતા.

આરોપીએ નાણાં પરત ન આપતા આખરે અલ્કાબેને પોલીસની મદદ લીધી હતી. જોકે અલ્કાબેનના જણાવ્યા મુજબ વાસણા પોલીસે આમાં કંઇ ન થાય તેવો ઉડાઉ જવાબ આપીને સાત માસ સુધી અલ્કાબેનને ધક્કા ખવડાવ્યા હતા. આખરે અલ્કાબેને એસીપી ડીસીપીને રજૂઆત કરતા વાસણા પોલીસે આ મામલે ગુનો નોંધી તપાસ હાથ ધરી છે.

અલ્કાબેન જ્યારે તેની પાસે પૈસા માંગતા કે મળવા માટે બોલાવતા ત્યારે લલિત માલી પાલનપુર, ચાંદખેડા, વેજલપુર ટ્રાન્સફર થઇ છે અને નાસિકનો પ્લોટ તથા રાજસ્થાનની જમીન વેચી છે તેમાંથી આવેલા નાણાંમાંથી પૈસા પરત આપી દેવાનો વાયદો કરતો હતો. જોકે, બાદમાં આરોપીએ ફોન બંધ કરી દીધો હતો.SS1MS