૪૭ કરોડના સાયબર ફ્રોડ કૌભાંડમાં BSc પાસ યુવકની ધરપકડ

(એજન્સી)સુરત, સુરત સાયબર સેલે લિંબાયત વિસ્તારમાં દરોડા પાડીને દુબઈ સ્થિત સાયબર માફિયાઓ માટે કામ કરતા એક મોટા રેકેટનો પર્દાફાશ કર્યો છે. આ ટોળકી મહારાષ્ટ્રની બેંકોના ખાતા ખોલાવી તેની કિટ દુબઈ મોકલતી હતી અને તે ખાતાઓમાં જમા થતા ફ્રોડના નાણાં એટીએમ મારફતે ઉપાડી લેતી હતી.

પોલીસે આ મામલે ૨૨ વર્ષીય બીએસસી પાસ યુવક ભાવેશ શિંદેની ધરપકડ કરી છે, જ્યારે મુખ્ય સૂત્રધારો હરીશ ચૌધરી અને રૂષિકેશ શિંદેને વોન્ટેડ જાહેર કર્યા છે. સાયબર સેલને મળેલી બાતમી મુજબ, ભાવેશ શિંદે અને તેના સાથીદારો લોકોને કમિશનની લાલચ આપીને અલગ-અલગ બેંકોમાં ખાતા ખોલાવતા હતા.

આ ખાતાઓની ડેબિટ કાર્ડ અને પાસબુક સહિતની બેંક કિટ દુબઈના સાયબર માફિયાઓને મોકલવામાં આવતી હતી. આ ખાતાઓમાં દેશભરમાંથી સાયબર ફ્રોડના નાણાં જમા થતા હતા, જેને સુરતના અલગ-અલગ એટીએમ સેન્ટરો પર જઈને ઉપાડી લેવામાં આવતા હતા.

પોલીસે નીલગીરી સર્કલ પાસેથી ભાવેશને ઝડપી પાડ્‌યા બાદ લિંબાયતના સુભાષનગરમાં હરીશ ચૌધરીના ઘરે દરોડો પાડ્‌યો હતો. ઘરની તલાશી દરમિયાન પોલીસે ૧૬ ડેબિટકાર્ડ અને ૧૪ કાર્ડ કવર, ૬ ચેકબુક અને ૨૪ બેંક પાસબુક, ૪૦ સિમકાર્ડ અને નવ મોબાઈલ ફોન, રૂપિયા ગણવાનું મશીન તથા રૂ. ૧૮.૫૦ લાખની રોકડ જપ્ત કરી હતી.

તપાસ દરમિયાન સૌથી મોટો ઘટસ્ફોટ એ થયો કે, આ ટોળકી દ્વારા વાપરવામાં આવતા ૩૫ બેંક ખાતાઓ પર દેશભરના જુદા-જુદા રાજ્યોમાં કુલ ૫૬ ઓનલાઇન ફરિયાદો નોંધાયેલી છે. દ્ગઝ્રઝ્રઇઁ પોર્ટલ પરની વિગતો મુજબ, આ ખાતાઓ દ્વારા અંદાજે ૪૭.૪૪ કરોડ રૂપિયાની ઠગાઈ થઈ હોવાનું સામે આવ્યું છે. પોલીસ સમક્ષ ધરપકડ કરાયેલા ભાવેશ શિંદેએ કબૂલાત કરી છે કે તે રૂષિકેશ અને હરીશના ઈશારે એટીએમમાંથી નાણાં ઉપાડવાનું કામ કરતો હતો.

તે ભટાર, અડાજણ, સિટીલાઈટ અને સહારા દરવાજા જેવા વિસ્તારોમાં રોજ અલગ-અલગ એટીએમ પર જતો હતો જેથી પોલીસ પકડી ન શકે. રોજના ૩થી ૩.૫૦ લાખ રૂપિયા ઉપાડવાના બદલામાં તેને ૧૦૦૦ થી ૧૫૦૦ રૂપિયા ચૂકવવામાં આવતા હતા.