UP અને બિહારમાં વાવાઝોડા-વીજળી સાથે વરસાદની તબાહી, 44ના મોત; ઓરેન્જ એલર્ટ

નવી દિલ્હી | તા. ૫ મે, ૨૦૨૬,  ઉત્તર ભારત અને બિહારમાં સોમવારે કુદરતે રૌદ્ર સ્વરૂપ ધારણ કર્યું હતું. ભારે વાવાઝોડા, વરસાદ અને વીજળી પડવાની ઘટનાઓમાં ઉત્તર પ્રદેશમાં 24 અને બિહારમાં 20 લોકોએ જીવ ગુમાવ્યા છે. આ કુદરતી આફતમાં અનેક લોકો ઘાયલ થયા છે અને ખેતીના પાકને વ્યાપક નુકસાન થયું છે.

વીજ પુરવઠો ખોરવાયો અને પાકને ભારે નુકસાન

ભારે પવનને કારણે સેંકડો ગામડાઓમાં વીજળીના થાંભલા અને વાયર તૂટી પડતા અંધારપટ છવાઈ ગયો હતો. રસ્તાઓ પર ઝાડ પડવાથી વાહનવ્યવહાર પણ અટકી પડ્યો છે. ખાસ કરીને કેરી, ઘઉં અને શાકભાજીના પાકને મોટું નુકસાન થતા ખેડૂતો ચિંતામાં મુકાયા છે.

ઉત્તર પ્રદેશમાં ‘બ્લેક આઉટ’ જેવી સ્થિતિ

યુપીમાં છેલ્લા અઠવાડિયાથી ચાલી રહેલી ગરમી વચ્ચે સોમવારે સવારે અચાનક વાતાવરણ પલટાયું હતું.

• સવારે જ અંધારું: લખનૌ સહિત 50થી વધુ જિલ્લાઓમાં સવારે 8:30 વાગ્યે કાળા વાદળોને કારણે રાત જેવો માહોલ સર્જાયો હતો.

• એલર્ટ: હવામાન વિભાગે પૂર્વ અને પશ્ચિમ યુપીમાં આગામી 48 કલાક માટે ઓરેન્જ એલર્ટ જાહેર કર્યું છે. 60થી વધુ જિલ્લાઓમાં કરા પડવાની પણ શક્યતા છે.

વીવીઆઈપી વિમાનનું ઈમરજન્સી લેન્ડિંગ: ખરાબ હવામાનને કારણે યુપીના બંને નાયબ મુખ્યમંત્રીઓ બ્રજેશ પાઠક અને કેશવ પ્રસાદ મૌર્યનું વિમાન તોફાનમાં ફસાયું હતું, જેને સલામતી ખાતર ભોપાલ તરફ વાળવામાં આવ્યું હતું.

બિહારમાં વીજળી પડવાથી 20ના મોત

બિહારમાં પણ સ્થિતિ ગંભીર છે. ઔરંગાબાદ, ગયા અને પૂર્વ ચંપારણ જિલ્લામાં સૌથી વધુ અસર જોવા મળી છે.

• ગયા: શેરઘાટી અને ટીકરી વિસ્તારમાં વીજળી પડતા 5 લોકોના મોત.

• પૂર્વ ચંપારણ: અહીં પણ 5 લોકોએ જીવ ગુમાવ્યા છે.

• નુકસાન: આ વિસ્તારોમાં લીચી અને કેરીના બગીચાઓને ભારે નુકસાન થયું છે.

દિલ્હીમાં ફ્લાઈટ્સ ડાયવર્ટ કરાઈ

દિલ્હીમાં ઓછી વિઝિબિલિટી અને ખરાબ હવામાનને કારણે રવિવાર રાતથી સોમવાર સવાર સુધી 15 જેટલી ફ્લાઈટ્સને લખનૌ તરફ ડાયવર્ટ કરવામાં આવી હતી. હવામાન વિભાગે આજે દિલ્હીમાં પણ ભારે વરસાદ અને વાવાઝોડાની ચેતવણી આપી છે.

હવામાન વિભાગની આગામી સૂચના:

• રાજ્ય: યુપી, બિહાર અને દિલ્હી.

• ચેતવણી: વીજળી પડવી, ભારે પવન (60-70 kmph) અને કરા.

• સાવચેતી: વીજળીના કડાકા વખતે ઝાડ કે થાંભલા નીચે ઉભા ન રહેવા તંત્રની અપીલ.