અમદાવાદમાં AMTS બસની બ્રેક ફેલ થતા અકસ્માત, ફૂડ ડિલિવરી બોય બસ અને કાર વચ્ચે ફસાયો
અમદાવાદ: શહેરના પશ્ચિમ વિસ્તારમાં આવેલા નારણપુરા રેલવે ક્રોસિંગ પાસે ગુરૂવાર તા. 07-05-2026ના રોજ બપોરના સમયે એક ભયાનક અકસ્માત સર્જાયો હતો. એક AMTS બસની બ્રેક અચાનક ફેલ થઈ જતાં ડ્રાઈવરે સ્ટીયરિંગ પરથી કાબૂ ગુમાવ્યો હતો અને બસે માર્ગ પર પસાર થઈ રહેલા અનેક વાહનોને અડફેટે લીધા હતા. આ અકસ્માતમાં એક ફૂડ ડિલિવરી એજન્ટ ગંભીર રીતે ઘાયલ થયો હોવાના અહેવાલ મળી રહ્યા છે.
બસ અને કાર વચ્ચે બાઈકનો કચ્ચરઘાણ અકસ્માતની સામે આવેલી હૃદયદ્રાવક તસવીરોમાં જોઈ શકાય છે કે, બ્રેક ફેલ થયેલી AMTS બસ એટલી વેગમાં હતી કે તેણે આગળ જતી કારને પાછળથી જોરદાર ટક્કર મારી હતી. આ ટક્કર દરમિયાન બસ અને કારની વચ્ચે એક ફૂડ ડિલિવરી એજન્ટનું બાઈક આવી ગયું હતું.
બાઈકનો બંને વાહનો વચ્ચે ખુરદો બોલી ગયો હતો અને ચાલક તેમાં ફસાઈ ગયો હતો. સ્થાનિક લોકોએ ભારે જહેમત બાદ બાઈકચાલકને બહાર કાઢ્યો હતો.
બાઈકચાલકની હાલત ગંભીર આ દુર્ઘટનામાં અન્ય વાહનચાલકોને પણ નાની-મોટી ઈજાઓ પહોંચી છે. ઈજાગ્રસ્તોને તાત્કાલિક ધોરણે નજીકની હોસ્પિટલમાં સારવાર અર્થે ખસેડવામાં આવ્યા છે.
હોસ્પિટલના સૂત્રોના જણાવ્યા અનુસાર, બસ અને કાર વચ્ચે ફસાયેલા બાઈકચાલકની હાલત અત્યંત નાજુક છે અને તેની સારવાર ચાલી રહી છે. અન્ય ઈજાગ્રસ્તો અત્યારે ખતરાની બહાર હોવાનું જાણવા મળ્યું છે.
ટ્રાફિક જામ અને પોલીસ કાર્યવાહી અકસ્માતને પગલે નારણપુરા ક્રોસિંગ રોડ પર ટ્રાફિકના દ્રશ્યો સર્જાયા હતા. ઘટનાની જાણ થતા જ પોલીસ કાફલો સ્થળ પર પહોંચી ગયો હતો અને ક્રેન દ્વારા અકસ્માતગ્રસ્ત વાહનોને દૂર કરી રસ્તો ખુલ્લો કરાવ્યો હતો.
પોલીસે બસના ડ્રાઈવરની અટકાયત કરી છે અને બસનું મેન્ટેનન્સ ક્યારથી બાકી હતું તેમજ અકસ્માત પાછળ ટેકનિકલ ખામી જવાબદાર છે કે ડ્રાઈવરની બેદરકારી, તે દિશામાં તપાસ હાથ ધરી છે.
