સુરતમાં સગીરના હત્યારાએ પોલીસ પર હુમલો કરતાં PIએ પગમાં ગોળી ધરબી

૪ દિવસમાં આરોપીને પગમાં ગોળી મારવાની બીજી ઘટના

આરોપી રાહુલે શરણાગતિ સ્વીકારવાને બદલે કોન્સ્ટેબલ પર ચપ્પુથી હુમલો કરતા ધમાચકડી મચી ગઈ હતી

સુરત, સુરતના લિંબાયત વિસ્તારમાં એક નિર્દાેષ સગીરની કરપીણ હત્યા કરી નાસી છૂટેલા કુખ્યાત ગુનેગાર રાહુલ જોગીને પકડવા ગયેલી પોલીસ ટીમ પર તેણે હુમલો કરતા લિંબાયત પી.આઈ. એ સ્વબચાવમાં બે રાઉન્ડ ફાયરિંગ કર્યું હતું. આ ફિલ્મી સ્ટાઈલમાં થયેલી અથડામણમાં એક ગોળી આરોપીના જમણા પગમાં વાગતા તે ફસડાઈ પડ્યો હતો, જ્યારે એક પોલીસ કોન્સ્ટેબલને પણ ઈજા પહોંચી છે.

૧૦મી મેની રાત્રે લિંબાયતના ગણેશ નગર પાસે બાઈક અથડાવાની સામાન્ય બાબતે રીઢા ગુનેગાર રાહુલ સંજયનાથ જોગીએ ૧૭ વર્ષીય અનુરાગ ઉર્ફે રાજ પવાર નામના કિશોરની છાતીમાં ચપ્પુના ઘા ઝીંકી હત્યા કરી હતી. પોલીસ કમિશનરે આરોપીને તાત્કાલિક ઝડપી લેવા ફરમાન કરતા સોમવારે વહેલી સવારે મીઠી ખાડી પાસે પોલીસ હત્યારા રાહુલને પકડવા પહોંચી હતી.આરોપી રાહુલે શરણાગતિ સ્વીકારવાને બદલે કોન્સ્ટેબલ મુકેશ બાગુલ પર ચપ્પુથી હુમલો કરતા ધમાચકડી મચી ગઈ હતી.

પરિસ્થિતિ વણસતી જોઈ લિંબાયત પીઆઈ ત્વરિત નિર્ણય લઈ પોતાની સર્વિસ રિવોલ્વરથી બે રાઉન્ડ ફાયરિંગ કર્યું હતું. એક ગોળી આરોપીના પગમાં વાગતા તે લોહીલુહાણ હાલતમાં જમીન પર પટકાયો હતો. ઘાયલ આરોપીને સુરતમાં છેલ્લા ચાર દિવસમાં પોલીસ સાથે આરોપીની હિંસક અથડામણની આ બીજી ઘટના છે. પહેલી ઘટનામાં સ્ટેટ બેંક લૂંટના આરોપી શુભમ ઠાકુર પર પણ પોલીસે ફાયરિંગ કર્યું હતું.SS1