સુરતમાં લીવઇનમાં રહેતા પ્રેમીએ કાતર મારી પ્રેમિકાની હત્યા કરી

સમગ્ર વિસ્તારમાં અરેરાટી ફેલાઈ

અમરોલીના ઝવેરી મહોલ્લામાં રવિવારે રાત્રે જમવાનું બનાવતી વખતે થયેલી સામાન્ય બોલાચાલીએ લોહિયાળ સ્વરૂપ ધારણ કર્યું હતું

સુરત, માનવીય સંવેદનાઓ જાણે મરી પરવારી હોય તેમ સુરતના અમરોલી વિસ્તારમાં માત્ર રસોઈના ધુમાડા જેવી સામાન્ય બાબતે એક પ્રેમીએ તેની સાથે છેલ્લા સાત વર્ષથી પત્ની તરીકે રહેતી મહિલાની કાતરના ઘા ઝીંકી ઘાતકી હત્યા કરી નાખતા અરેરાટી ફેલાઈ છે. અમરોલીના ઝવેરી મહોલ્લામાં રવિવારે રાત્રે જમવાનું બનાવતી વખતે થયેલી સામાન્ય બોલાચાલીએ લોહિયાળ સ્વરૂપ ધારણ કર્યું હતું, જેમાં ૪૦ વર્ષીય જયાબેનનું કરુણ મોત નીપજ્યું છે.

હત્યાની ઘટના અંગે અમરોલી પોલીસના વર્તુળો કહે છે કે, અમરોલીના ઝવેરી મહોલ્લામાં જયાબેન (ઉ.વ. ૪૦) તેમના પ્રેમી ભાવેશ મનુભાઈ પાંડવ સાથે છેલ્લા સાત વર્ષથી પતિ-પત્ની તરીકે રહેતા હતા. રવિવારે રાત્રે જયાબેન જ્યારે ઘરે રસોઈ બનાવી રહ્યા હતા ત્યારે ઘરમાં ધુમાડો ફેલાયો હતો એટલે ભાવેશ ઉશ્કેરાઈ ગયો હતો અને ‘તું કેમ આટલો ધુમાડો કરે છે?’ તેમ કહી ઝઘડો શરૂ કર્યાે હતો.

જોતજોતામાં ઉગ્ર બનેલી બોલાચાલી વચ્ચે આવેશમાં આવી ગયેલા ભાવેશે ઘરમાં પડેલી કાતર ઉઠાવી જયાબેનના ગળાના ભાગે ઝીંકી દેતા તેમનું કરુણ મોત નીપજ્યું હતું.SS1