અમેરિકામાં એર શો દરમિયાન બે ફાઇટર જેટ હવામાં ટકરાયા: 4 ક્રૂ મેમ્બર્સનો ચમત્કારિક બચાવ
ઇડાહો (અમેરિકા), ૧૮ મે: અમેરિકાના ઇડાહોમાં આવેલા માઉન્ટેન હોમ એર ફોર્સ બેઝ પર આયોજિત એક એર શો દરમિયાન બે યુએસ ફાઇટર જેટ હવામાં એકબીજા સાથે ટકરાયા હતા. સ્થાનિક મીડિયા અહેવાલો અનુસાર, આ ગંભીર અકસ્માત બાદ સત્તાવાળાઓએ તાત્કાલિક એર બેઝને લોકડાઉન કરી દીધું હતું અને એર શોના બાકીના તમામ નિર્ધારિત કાર્યક્રમો રદ કર્યા હતા.
આ ઘટના રવિવારે સ્થાનિક સમય અનુસાર બપોરે ૧૨:૩૦ વાગ્યાની આસપાસ ‘ગનફાઇટર સ્કાઇઝ એર શો’ દરમિયાન બની હતી. ટક્કર બાદ ઘટનાસ્થળેથી કાળો ડિબાંગ ધુમાડો હવામાં ઉડતો જોવા મળ્યો હતો, જેને પગલે ઈમરજન્સી ટીમો તાત્કાલિક ઘટનાસ્થળે દોડી ગઈ હતી.
અહેવાલો અનુસાર, અકસ્માતનો ભોગ બનેલા બંને વિમાનો ‘EA-18G ગ્રોલર’ (EA-18G Growler) ફાઇટર જેટ હતા. હવામાં ટકરાયા બાદ બંને જેટ એર બેઝથી લગભગ બે માઇલ દૂર ક્રેશ થયા હતા. સોશિયલ મીડિયા પર વાયરલ થયેલા વીડિયોમાં બંને લશ્કરી વિમાનો હવામાં ટકરાતા અને તેના ટુકડા થતા જોઈ શકાય છે. જો કે, ટક્કરની થોડી જ ક્ષણોમાં હવામાં ચાર પેરાશૂટ ખુલતા દેખાયા હતા, જે દર્શાવે છે કે વિમાનમાં સવાર ક્રૂ મેમ્બર્સ સમયસર સુરક્ષિત રીતે ઇજેક્ટ (બહાર નીકળવામાં) થવામાં સફળ રહ્યા હતા.
‘ઇડાહો સ્ટેટ્સમેન’ અખબારના જણાવ્યા અનુસાર, કાર્યક્રમના એનાઉન્સરે દર્શકોને માહિતી આપી હતી કે બંને ફાઇટર જેટમાં સવાર તમામ ચાર ક્રૂ મેમ્બર્સ અકસ્માત પહેલા સુરક્ષિત રીતે બહાર નીકળી ગયા હતા. બાદમાં યુએસ નેવીએ પણ પુષ્ટિ કરી હતી કે ચારેય ક્રૂ મેમ્બર્સનો આબાદ બચાવ થયો છે.
સુરક્ષાના પગલા રૂપે વહીવટીતંત્રે રવિવારના બાકીના તમામ કાર્યક્રમો રદ કર્યા હતા. માઉન્ટેન હોમ પોલીસે પણ પુષ્ટિ કરી છે કે આ અકસ્માત બાદ ઇમરજન્સી અને સુરક્ષા ટીમોની કામગીરી માટે બેઝને લોકડાઉન કરવામાં આવ્યો હતો.
નોંધનીય છે કે, આ ‘ગનફાઇટર સ્કાઇઝ એર શો’ આઠ વર્ષના લાંબા અંતરાલ બાદ આ સપ્તાહના અંતે યોજાયો હતો, જેને જોવા માટે હજારો દર્શકો એકઠા થયા હતા. આ મોટા પાયે આયોજિત એર શોની તૈયારીઓ માટે આયોજકોએ લગભગ બે વર્ષ જેટલો સમય લીધો હતો. હજુ સુધી આ હવામાં થયેલી ટક્કરનું ચોક્કસ કારણ જાણી શકાયું નથી અને અધિકારીઓ દ્વારા આ મામલે તપાસ શરૂ કરવામાં આવી છે.
