હવે અમેરિકામાં સંસદ સભ્યો નક્કી કરશે ઈરાન સાથે યુધ્ધ કરવું કે નહિંઃ ટ્રમ્પને યુધ્ધ કરવા મંજૂરી લેવી પડશે

ટ્રમ્પના ૪ સાંસદોએ તેમની વિરુદ્ધ મતદાન કર્યું: સંસદમાં યુદ્ધ રોકવાનો પ્રસ્તાવ પાસ-સેનેટમાં અંતિમ વોટિંગ થવાનું બાકી

વોશિંગ્ટન, અમેરિકી સંસદમાં રાષ્ટ્રપતિ ડોનાલ્ડ ટ્રમ્પની સૈન્ય શક્તિઓને મર્યાદિત કરતો પ્રસ્તાવ પાસ થઈ ગયો છે. વોટિંગમાં ૪ રિપબ્લિકન સાંસદોએ પણ વિપક્ષી પાર્ટી ડેમોક્રેટ્‌સનો સાથ આપ્યો. જોકે ૩ રિપબ્લિકન સાંસદો વોટિંગમાં સામેલ થયા નહોતા.

આ પ્રસ્તાવ ૫૦-૪૭થી પસાર થયો, જોકે તેને કાયદો બનવા માટે હજુ કેટલાક વધુ તબક્કાઓમાંથી પસાર થવું પડશે. જો આ પ્રસ્તાવ કાયદો બને છે, તો ટ્રમ્પ સરકારે ઈરાન વિરુદ્ધ યુદ્ધ ચાલુ રાખવા માટે કોંગ્રેસની મંજૂરી લેવી પડશે.

હજુ સેનેટમાં તેના પર અંતિમ વોટિંગ થવાનું બાકી છે. આ પછી તેને રિપબ્લિકન બહુમતીવાળી હાઉસ ઓફ રિપ્રેઝન્ટેટિવ્સ પાસેથી મંજૂરી લેવી પડશે. જોકે તે પછી પણ ટ્રમ્પ તેની વિરુદ્ધ વીટો કરી શકે છે. પછી તે વીટોને રદ કરવા માટે સેનેટ અને હાઉસ બંનેમાં બે-તૃતીયાંશ બહુમતી જોઈશે, જે હાલમાં મુશ્કેલ માનવામાં આવી રહ્યું છે.

આ વોટ વિપક્ષ માટે મોટી જીત માનવામાં આવી રહી છે જે કહી રહ્યા હતા કે અમેરિકામાં યુદ્ધ શરૂ કરવાનો કે સેના મોકલવાનો અધિકાર રાષ્ટ્રપતિ નહીં પણ સંસદ પાસે હોવો જોઈએ. અમેરિકી બંધારણમાં પણ આ જ વ્યવસ્થા આપવામાં આવી છે.

આ પ્રસ્તાવને વર્જિનિયાના ડેમોક્રેટ સેનેટર ટિમ કેન લઈને આવ્યા છે. ચર્ચા દરમિયાન તેમણે કહ્યું કે અત્યારે જ્યારે યુદ્ધવિરામની વાત થઈ રહી છે, ત્યારે ટ્રમ્પને સંસદ સામે આવીને પોતાની રણનીતિ જણાવવી જોઈએ.

ડેમોક્રેટ સેનેટર ટિમ કેને કહ્યું કે યુદ્ધ શરૂ કરવાનો અધિકાર સંસદ પાસે છે, માત્ર રાષ્ટ્રપતિ પાસે નહીં. જ્યારે વ્હાઇટ હાઉસે કહ્યું કે ટ્રમ્પે અમેરિકી સુરક્ષા માટે પોતાના અધિકારો હેઠળ કાર્યવાહી કરી છે.

અમેરિકી કાયદા મુજબ કોઈ પણ રાષ્ટ્રપતિ સંસદની મંજૂરી વિના માત્ર ૬૦ દિવસ સુધી સૈન્ય કાર્યવાહી ચલાવી શકે છે. આ પછી યુદ્ધ સમાપ્ત કરવું પડે છે અથવા કોંગ્રેસ પાસેથી પરવાનગી લેવી પડે છે, કે પછી સેનાની સુરક્ષિત વાપસી માટે ૩૦ દિવસની વધારાની મુદત માંગવી પડે છે.

ટ્રમ્પે કહ્યું કે અમેરિકા ઈરાન પર મોટો હુમલો કરવાનું હતું, પરંતુ હાલ પૂરતો તેને રોકી દેવામાં આવ્યો છે. તેમણે કહ્યું કે કતાર, સાઉદી અરેબિયા અને ેંછઈ એ વાતચીતને તક આપવા માટે હુમલો ટાળવાની અપીલ કરી હતી.

ઈરાને પર્શિયન ગલ્ફ સ્ટ્રેટ ઓથોરિટી બનાવીને હોર્મુઝ સ્ટ્રેટથી પસાર થતા જહાજો માટે પરવાનગી ફરજિયાત કરી દીધી છે. ઈરાને કહ્યું કે પરમિશન વિના પસાર થવું ગેરકાયદેસર માનવામાં આવશે. ઈરાને સ્પષ્ટ કહ્યું કે યુરેનિયમ સંવર્ધન તેનો અધિકાર છે અને તે કોઈ દબાણમાં નહીં આવે. રાષ્ટ્રપતિ મસૂદ પઝશકિયાને પણ કહ્યું કે વાતચીત થશે, પરંતુ ઈરાન ઝૂકશે નહીં.

ઈરાનની સંસદમાં એવું બિલ લાવવાની તૈયારી છે, જેમાં ટ્રમ્પ અને નેતન્યાહૂની હત્યા કરનારાઓને રૂ.૫૦૦ કરોડથી વધુનું ઈનામ આપવાનો પ્રસ્તાવ છે. અમેરિકી નાકેબંધીથી ઈરાની ઓઈલ ફસાયુંઃ ફાઇનાન્સિયલ ટાઇમ્સના અહેવાલ મુજબ, અમેરિકી નાકેબંધીના કારણે ઈરાનને સમુદ્રમાં ઉભેલા જૂના ટેન્કરોમાં ઓઈલનો સંગ્રહ કરવો પડી રહ્યો છે. ફારસની ખાડીમાં ઈરાની ઓઈલથી ભરેલા ટેન્કરોની સંખ્યા ઝડપથી વધી છે.