ભારત અને મોલ્ડોવા વચ્ચેના આર્થિક સહયોગને નવી ઊંચાઈઓ પર લઈ જશે

ભારતના રાષ્ટ્રપતિએ ભારત-મોલ્ડોવા બિઝનેસ ફોરમને સંબોધિત કર્યું

નવી દિલ્હી,  ભારતના રાષ્ટ્રપતિ શ્રીમતી દ્રૌપદી મુર્મુએ 20 જુલાઈ, 2026 ચિસીનાઉ (Chișinău) ખાતે મોલ્ડોવાના રાષ્ટ્રપતિ મેડમ માયા સેન્ડુની ઉપસ્થિતિમાં ભારત-મોલ્ડોવા બિઝનેસ ફોરમને સંબોધિત કર્યું હતું.

તેમના ઉદ્ઘાટન પ્રવચનમાં, રાષ્ટ્રપતિએ જણાવ્યું હતું કે 1992માં રાજદ્વારી સંબંધોની સ્થાપના પછી ભારત અને મોલ્ડોવા વચ્ચે ઉષ્માભર્યા અને મૈત્રીપૂર્ણ સંબંધો રહ્યા છે. અમારી ભાગીદારી પરસ્પર આદર, લોકશાહી મૂલ્યો અને શાંતિ, વિકાસ તથા આંતરરાષ્ટ્રીય સહયોગ પ્રત્યેની સહિયારી પ્રતિબદ્ધતા પર આધારિત છે.

રાષ્ટ્રપતિએ જણાવ્યું હતું કે ભારત તેના વિકસિત ભારત 2047ના વિઝન તરફ આગળ વધી રહ્યું છે, ત્યારે અમે વિશ્વાસ અને સહિયારી સમૃદ્ધિ પર નિર્મિત ભાગીદારી ઈચ્છીએ છીએ. સાહસિકતા, ડિજિટલ પરિવર્તન, મેન્યુફેક્ચરિંગ ઉત્કૃષ્ટતા અને યુવા, કુશળ કાર્યબળ દ્વારા સંચાલિત ભારત સૌથી ઝડપથી વિકસતા મુખ્ય અર્થતંત્રોમાંનું એક છે. આ જ સમયે, મોલ્ડોવા સુધારા-લક્ષી દ્રષ્ટિકોણ, વ્યૂહાત્મક સ્થાન, પ્રતિભાશાળી માનવ મૂડી અને યુરોપિયન બજારો સાથે વધતું એકીકરણ ધરાવે છે, જે તેને ભારતીય વ્યવસાયો માટે એક મહત્વપૂર્ણ ગંતવ્ય બનાવે છે.

રાષ્ટ્રપતિએ ભારપૂર્વક જણાવ્યું હતું કે ડિજિટલ ટેકનોલોજી, આર્ટિફિશિયલ ઇન્ટેલિજન્સ, સાયબર-સિક્યુરિટી, ફિન-ટેક, ડિજિટલ પબ્લિક ઇન્ફ્રાસ્ટ્રક્ચર, ઇન્ફ્રાસ્ટ્રક્ચર ડેવલપમેન્ટ, પુનઃપ્રાપ્ય ઊર્જા, અદ્યતન મેન્યુફેક્ચરિંગ, કૃષિ, ફૂડ પ્રોસેસિંગ, ફાર્માસ્યુટિકલ્સ, બાયોટેકનોલોજી અને હેલ્થકેર જેવા વિવિધ ક્ષેત્રોમાં સહયોગની અપાર ક્ષમતા છે. તેમણે જણાવ્યું હતું કે ભારતીય કંપનીઓ સૌર ઊર્જા, બેટરી સ્ટોરેજ, સ્માર્ટ ગ્રીડ, ગ્રીન હાઇડ્રોજન અને અન્ય સ્વચ્છ ટેકનોલોજી સહિત રિન્યુએબલ ઊર્જા ક્ષેત્રે મોલ્ડોવાના વિકાસ પ્રોજેક્ટ્સમાં ભાગ લેવા માટે રસ ધરાવે છે.

રાષ્ટ્રપતિએ જણાવ્યું હતું કે ભારત મોલ્ડોવાની કંપનીઓને વેપાર અને રોકાણ માટે સારી વ્યવસાયિક તકો પૂરી પાડે છે. અમે પારદર્શક, ભવિષ્યવાણી યોગ્ય (predictable) અને રોકાણકાર-અનુકૂળ વ્યવસાયિક વાતાવરણને પ્રોત્સાહન આપવા માટે પ્રતિબદ્ધ છીએ. તેમણે મોલ્ડોવાના વ્યવસાયોને ભારતમાં આવીને તકો શોધવા માટે આમંત્રણ આપ્યું હતું.

રાષ્ટ્રપતિએ ભારતીય વ્યવસાયોને મોલ્ડોવામાં તકો શોધવા માટે વિનંતી કરી હતી. તેમણે જણાવ્યું હતું કે તેમનું સાહસ, વિઝન અને પ્રતિબદ્ધતા ટકાઉ આર્થિક ભાગીદારીના નિર્માણમાં સાધનરૂપ બનશે. તેમણે વિશ્વાસ વ્યક્ત કર્યો હતો કે આ બિઝનેસ ફોરમ ખાતેની વાટાઘાટો નવી ભાગીદારી અને નવીન સહયોગ માટે પાયો નાખશે, જે ભારત અને મોલ્ડોવા વચ્ચેના આર્થિક સહયોગને નવી ઊંચાઈઓ પર લઈ જશે.

કૃષિ અને ફૂડ પ્રોસેસિંગ, ઇન્ફોર્મેશન ટેકનોલોજી, ફાર્માસ્યુટિકલ્સ, હેલ્થકેર, પુનઃપ્રાપ્ય ઊર્જા, શિક્ષણ, લોજિસ્ટિક્સ અને ડિજિટલ ટેકનોલોજી સહિત વિવિધ ક્ષેત્રોનું પ્રતિનિધિત્વ કરતા બંને દેશોના અગ્રણી વ્યવસાયિક પ્રતિનિધિઓ આ ફોરમમાં ભાગ લઈ રહ્યા છે.