ફરદીનના ટ્રાન્સફોર્મેશન પાછળ બાળકોનો ફાળો છે
મુંબઈ: એક્ટર ફરદીન ખાન છેલ્લા થોડા સમયથી પોતાના ટ્રાન્સફોર્મેશનના કારણે ચર્ચામાં છે. ફરદીન ખાનને ફિટ લૂકમાં જાેઈને સૌ કોઈને આશ્ચર્ય થયું હતું. થોડા વર્ષો પહેલા ફરદીન ખાનનું વજન ખૂબ વધી ગયું હતું. વધેલા વજનના કારણે ફરદીન ખાન ઘણીવાર ટ્રોલ પણ થયો હતો. અગાઉ ફરદીને અમારા સહયોગી બોમ્બે ટાઈમ્સ સાથે પોતાના વેઈટ લોસની જર્ની વિશે વાત કરી હતી.
વજન ઉતાર્યા બાદ હવે ફરદીન બોલિવુડમાં કમબેક કરવાનો પ્લાન બનાવી રહ્યો છે. ફરદીન ખાને જણાવ્યું હતું કે, મન અને મગજ વચ્ચે કેવું કનેક્શન છે. ફરદીને કહ્યું, શારીરિક સ્વાસ્થ્ય તમારા માનસિક સ્વાસ્થ્ય પર ચોક્કસ અસર પાડે છે. આ મુશ્કેલ સમય દરમિયાન ફરદીનના બાળકોએ તેની હિંમત વધારી હતી.
ફરદીનની દીકરી ડિયાના અને દીકરા અઝારિયસે તેને હેલ્ધી રૂટિન ફોલો કરવા માટે પ્રેરણા આપી હતી. ફરદીને આગળ કહ્યું, જ્યારે તમે પેરેન્ટ હો અને યોગ્ય આકારમાં ના હો ત્યારે તમારા બાળકો સાથે તાલમેલ જાળવવો મુશ્કેલ બની જાય છે. મારી દીકરીને સ્કેટિંગ, સાઈકલિંગ ગમે છે જ્યારે મારો દીકરો પાર્કમાં દોડાદોડ કરે છે. પિતા તરીકે તેમની સાથે હાઈકિંગ પર જવું, તમે પોતે બાળપણમાં જે રમતો રમ્યા હો તે તેમને રમાડો તેવી ઈચ્છા હોય છે. પિતા તરીકે આ તમારી ફરજ છે અને પૂરી કરવી જ પડે છે.
ત્યારે મને તંદુરસ્ત રહેવાનું મહત્વ સમજાયું હતું. ફરદીનની પત્ની નતાશા ફિટનેસ પ્રત્યે ખૂબ સજાગ છે ત્યારે તેણે પણ પતિને તંદુરસ્ત બનાવવામાં મદદ કરી હતી. ફરદીને કહ્યું, તમે જ્યારે વર્કઆઉટ કરો છો ત્યારે વજન ઉતરે છે પરંતુ પછી એવો સમય આવે છે જ્યારે સ્થિર થઈ જાય છે. ત્યારે જ વજન ઉતારવું પડકારરૂપ બની જાય છે. હું ખુશ છું કે હું મારી જાતને પ્રેરણા આપી શક્યો અને વર્કઆઉટને મારું રૂટિન બનાવી શક્યો.
