કેન્દ્ર સરકારનો મોટો નિર્ણયઃ ઘરગથ્થુ PNG અને CNG સપ્લાયને અગ્રતા આપવા આદેશ

મધ્ય પૂર્વમાં યુદ્ધના કારણે ગેસ સપ્લાય ખોરવાયો:

નવી દિલ્હી, 10 માર્ચ: મધ્ય પૂર્વમાં ચાલી રહેલા યુદ્ધને કારણે ગેસના પુરવઠામાં સર્જાયેલા અવરોધ વચ્ચે, કેન્દ્ર સરકારે મંગળવારે આવશ્યક વસ્તુ ધારા (ECA) હેઠળ મહત્વના આદેશો જારી કર્યા છે. આ આદેશ મુજબ, ઘરગથ્થુ રસોડા માટે પાઈપ્ડ નેચરલ ગેસ (PNG), વાહનવ્યવહાર માટે CNG અને LPGનો પુરવઠો કોઈપણ અડચણ વગર જળવાઈ રહે તેને સર્વોચ્ચ અગ્રતા આપવામાં આવશે.

હોર્મુઝની સામુદ્રધુનીમાં સપ્લાય ખોરવાયો

કેન્દ્ર સરકારના આકલન મુજબ, મધ્ય પૂર્વના સંઘર્ષને કારણે ‘હોર્મુઝની સામુદ્રધુની’ (Strait of Hormuz) દ્વારા થતા લિક્વિફાઇડ નેચરલ ગેસ (LNG)ના શિપમેન્ટમાં વિક્ષેપ પડ્યો છે. સપ્લાયર્સ દ્વારા ‘ફોર્સ મેજ્યુર’ (અનિવાર્ય સંજોગો) કલમ લાગુ કરવામાં આવી છે, જેના પગલે હવે ઉપલબ્ધ નેચરલ ગેસને પ્રાથમિકતા ધરાવતા ક્ષેત્રો તરફ વાળવામાં આવશે.

કયા ક્ષેત્રને કેટલી પ્રાથમિકતા મળશે?

1. પ્રાથમિકતા સેક્ટર-1 (સૌથી વધુ અગ્રતા): ઘરગથ્થુ PNG અને વાહનવ્યવહાર માટેના CNG માટે છેલ્લા છ મહિનાના સરેરાશ વપરાશના 100 ટકા પુરવઠો જાળવી રાખવામાં આવશે. આમાં LPG ઉત્પાદન, પાઇપલાઇન કોમ્પ્રેસર ફ્યુઅલ અને અન્ય આવશ્યક કામગીરીનો પણ સમાવેશ થાય છે.

2. રિફાઇનરીઓ માટે સૂચના: કેન્દ્રએ રિફાઇનરીઓ અને પેટ્રોકેમિકલ યુનિટ્સને LPGનું ઉત્પાદન મહત્તમ કરવા અને હાઇડ્રોકાર્બન પ્રવાહને LPG પૂલ તરફ વાળવા નિર્દેશ આપ્યો છે.

3. ફર્ટિલાઇઝર પ્લાન્ટ્સ (પ્રાથમિકતા સેક્ટર-2): ખાતરના કારખાનાઓને છેલ્લા છ મહિનાના સરેરાશ વપરાશના 70 ટકા પુરવઠો સુનિશ્ચિત કરવામાં આવશે. આ એકમોએ ગેસનો ઉપયોગ માત્ર ખાતર બનાવવા માટે જ કરવાનો રહેશે અને તેનું પ્રમાણપત્ર પેટ્રોલિયમ પ્લાનિંગ એન્ડ એનાલિસિસ સેલ (PPAC) ને સબમિટ કરવાનું રહેશે.

4. ઉદ્યોગો અને અન્ય ગ્રાહકો:

• ચા ઉદ્યોગ અને અન્ય ઉત્પાદકો: નેશનલ ગેસ ગ્રીડ દ્વારા તેમને છેલ્લા છ મહિનાના સરેરાશ વપરાશના 80 ટકા ગેસ સપ્લાય પૂરો પાડવામાં આવશે.

• સિટી ગેસ ડિસ્ટ્રિબ્યુશન (CGD): સીજીડી સંસ્થાઓએ સુનિશ્ચિત કરવાનું રહેશે કે તેમના નેટવર્ક હેઠળના ઔદ્યોગિક અને વ્યાપારી ગ્રાહકોને પણ છ મહિનાના સરેરાશ વપરાશના 80 ટકા પુરવઠો મળે.