અમેરિકી ફાઈટર એરક્રાફ્ટ ઈરાની હવાઈ ક્ષેત્રમાં ઊંડે સુધી કોઈપણ ડર વિના ઓપરેશન ચલાવી રહ્યા છેઃ પેન્ટાગોન

અમેરિકાના લશ્કરી અભિયાન ‘ઓપરેશન એપિક ફ્યુરી’ બીજા સપ્તાહમાં પ્રવેશ્યુંઃ ઈરાનનુંં અત્યાધુનિક એર ડિફેન્સ નેટવર્ક મોટાભાગે નષ્ટ

વોશિંગ્ટન, ૧૧ માર્ચ-2026: અમેરિકાના લશ્કરી અભિયાનના પ્રથમ તબક્કા દરમિયાન ઈરાનના અત્યાધુનિક એર ડિફેન્સ નેટવર્કને મોટાભાગે નષ્ટ કર્યા બાદ હવે અમેરિકી ફાઈટર એરક્રાફ્ટ ઈરાની હવાઈ ક્ષેત્રમાં ઊંડે સુધી કોઈપણ ડર વિના ઓપરેશન ચલાવી રહ્યા છે, તેમ પેન્ટાગોને જણાવ્યું હતું.

જોઈન્ટ ચીફ ઓફ સ્ટાફના ચેરમેન જનરલ ડેન કેન પત્રકારોને જણાવ્યું હતું કે ‘ઓપરેશન એપિક ફ્યુરી’ (Operation Epic Fury) ના બીજા સપ્તાહમાં પ્રવેશતાની સાથે જ ઈરાનની ઘણી હાઈ-એન્ડ સરફેસ-ટુ-એર મિસાઈલ સિસ્ટમ્સ હવે અમેરિકી વિમાનો માટે મોટો ખતરો રહી નથી.

ઈરાની સંરક્ષણ પ્રણાલી નબળી પડી

સેક્રેટરી ઓફ વોર પીટ હેગસેથ સાથે પેન્ટાગોન ખાતે આયોજિત પ્રેસ બ્રીફિંગ દરમિયાન જનરલ કેને કહ્યું કે, “ઈરાનની મોટાભાગની હાઈ-એન્ડ મિસાઈલ સિસ્ટમ્સ અત્યારે નિષ્ક્રિય જેવી છે. અમે ઈરાની સરહદમાં ઊંડે સુધી ફાઈટર જેટ્સ મોકલી રહ્યા છીએ અને ત્યાં અમને રોકનાર કોઈ નથી.”

અમેરિકી સૈન્ય નેતાઓ તરફથી આ અત્યાર સુધીનો સૌથી સ્પષ્ટ સંકેત છે કે દેશભરમાં થયેલા તીવ્ર અમેરિકી હવાઈ હુમલા બાદ ઈરાનની એર ડિફેન્સ ક્ષમતા ગંભીર રીતે ક્ષીણ થઈ ગઈ છે.

૫,૦૦૦થી વધુ લક્ષ્યો પર પ્રહાર

જનરલ કેને માહિતી આપી હતી કે આ અભિયાન શરૂ થયું ત્યારથી અત્યાર સુધીમાં અમેરિકી નેતૃત્વ હેઠળના દળોએ ૫,૦૦૦થી વધુ લક્ષ્યો પર પ્રહાર કર્યા છે. જેમાં મિસાઈલ લોન્ચ સાઈટ્સ, ડ્રોન ફેસિલિટી અને અન્ય લશ્કરી ઈન્ફ્રાસ્ટ્રક્ચરનો સમાવેશ થાય છે.

• મિસાઈલ લોન્ચર્સ પર હુમલો: અમેરિકી સ્ટ્રેટેજિક કમાન્ડના બોમ્બરોએ તાજેતરમાં દક્ષિણ ભાગમાં જમીનની અંદર દટાયેલા મિસાઈલ લોન્ચર્સ પર ૨,૦૦૦ પાઉન્ડના ડઝનબંધ GPS ગાઈડેડ હથિયારો ફેંક્યા હતા.

• ડ્રોન ફેક્ટરીઓ નષ્ટ: અમેરિકાએ ઈરાનના ડ્રોન ઉત્પાદન નેટવર્કને પણ નિશાન બનાવ્યું છે જેથી તેમની સ્વાયત્ત હુમલાની ક્ષમતાને ખતમ કરી શકાય.

ઈરાનના હુમલામાં મોટો ઘટાડો

પેન્ટાગોનના જણાવ્યા મુજબ, સતત હવાઈ હુમલાઓને કારણે ઈરાન દ્વારા કરવામાં આવતા મિસાઈલ અને ડ્રોન હુમલાઓમાં ધરખમ ઘટાડો થયો છે. જનરલ કેને જણાવ્યું કે બેલિસ્ટિક મિસાઈલ હુમલાઓમાં ૯૦% અને ઘાતક ડ્રોન હુમલાઓમાં ૮૩% નો ઘટાડો નોંધાયો છે.

નૌકાદળને પણ ભારે નુકસાન

આ અભિયાનમાં ઈરાનની નૌકાદળની ક્ષમતાને પણ તોડી પાડવામાં આવી છે. અત્યાર સુધીમાં આર્ટિલરી અને મિસાઈલોના ઉપયોગથી ઈરાનના ૫૦થી વધુ નૌકા જહાજોને નષ્ટ કરવામાં આવ્યા છે, જેમાં ડ્રોન ઓપરેશનમાં મદદ કરતું એક વિશાળ ‘ડ્રોન કેરિયર’ જહાજ પણ સામેલ છે.

“દુશ્મનને જડમૂળથી ઉખાડી ફેંકીશું”: પીટ હેગસેથ

સેક્રેટરી ઓફ વોર પીટ હેગસેથે જણાવ્યું હતું કે આ ઓપરેશન ત્રણ મુખ્ય ઉદ્દેશ્યો પર કેન્દ્રિત છે: ૧. ઈરાનના મિસાઈલ ભંડાર અને લોન્ચર્સનો નાશ કરવો. ૨. તેની નૌકાદળને પંગુ બનાવવી. ૩. ઈરાની શાસન ક્યારેય પરમાણુ હથિયાર મેળવી ન શકે તે સુનિશ્ચિત કરવું.

તેમણે ઉમેર્યું કે, “જ્યાં સુધી દુશ્મનનો સંપૂર્ણ પરાજય ન થાય ત્યાં સુધી અમે શાંત બેસીશું નહીં.” જોકે, જનરલ કેને સાવચેત કરતા એમ પણ કહ્યું કે હવાઈ સંરક્ષણ નબળું પડ્યું હોવા છતાં યુદ્ધમાં જોખમો હંમેશા રહેલા હોય છે.