પેટ્રોલમાં રૂ. 10 અને ડીઝલમાં રૂ. 10 એક્સાઈઝ ડ્યુટી કેન્દ્ર સરકારે ઘટાડી

વડાપ્રધાન મોદીએ નાણાકીય નુકસાન વેઠીને જનતાને બચાવી-ઓઈલ કંપનીઓનું નુકસાન સરકાર ભોગવશે: કેન્દ્રીય પેટ્રોલિયમ મંત્રી હરદીપ સિંહ પુરી

ઓઈલ કંપનીઓને પેટ્રોલમાં આશરે રૂ. 24 અને ડીઝલમાં રૂ. 30 પ્રતિ લિટરનું નુકસાન

નવી દિલ્હી, ૨૭ માર્ચ: વૈશ્વિક સ્તરે ક્રૂડ ઓઈલના વધતા ભાવ અને આંતરરાષ્ટ્રીય અસ્થિરતા વચ્ચે કેન્દ્ર સરકારે સામાન્ય જનતાને મોટી રાહત આપી છે. સરકારે પેટ્રોલ અને ડીઝલ પરની એક્સાઈઝ ડ્યુટીમાં પ્રતિ લિટર ₹10નો ધરખમ ઘટાડો કર્યો છે. આ ઘટાડા બાદ હવે પેટ્રોલ પરની ડ્યુટી ઘટીને ₹3 અને ડીઝલ પર શૂન્ય (0) થઈ ગઈ છે.

કેન્દ્રીય પેટ્રોલિયમ અને કુદરતી ગેસ મંત્રી હરદીપ સિંહ પુરીએ શુક્રવારે જણાવ્યું હતું કે મોદી સરકાર પાસે બે વિકલ્પો હતા: કાં તો અન્ય દેશોની જેમ ભાવમાં તોતિંગ વધારો કરીને બોજ જનતા પર નાખવો, અથવા સરકાર પોતે નાણાકીય નુકસાન વેઠીને ભારતીય નાગરિકોને સુરક્ષિત રાખે. વડાપ્રધાને બીજા વિકલ્પની પસંદગી કરી છે.

પુરીએ સોશિયલ મીડિયા પ્લેટફોર્મ ‘X’ પર વિગતો શેર કરતા લખ્યું:

“છેલ્લા ૧ મહિનામાં આંતરરાષ્ટ્રીય ક્રૂડના ભાવ પ્રતિ બેરલ ૭૦ ડોલરથી વધીને ૧૨૨ ડોલર સુધી પહોંચી ગયા છે. જેના કારણે દક્ષિણ પૂર્વ એશિયામાં ૩૦-૫૦%, ઉત્તર અમેરિકામાં ૩૦% અને આફ્રિકામાં ૫૦% જેટલો ભાવવધારો થયો છે, પરંતુ ભારતમાં અમે નાગરિકોને સુરક્ષિત રાખ્યા છે.”

મંત્રીએ વધુમાં ઉમેર્યું કે આંતરરાષ્ટ્રીય સ્તરે આસમાને પહોંચેલા ભાવોને કારણે ઓઈલ કંપનીઓને પેટ્રોલમાં આશરે ₹24 અને ડીઝલમાં ₹30 પ્રતિ લિટરનું નુકસાન થઈ રહ્યું હતું. આ નુકસાન ઘટાડવા માટે સરકારે પોતાની ટેક્સની આવકમાં મોટો કાપ મૂક્યો છે. તે જ સમયે, વિદેશમાં નિકાસ થતા ઇંધણ પર ‘એક્સપોર્ટ ટેક્સ’ લાદવામાં આવ્યો છે જેથી દેશના સંસાધનોનો લાભ પહેલા ભારતીયોને મળે.

અન્ય મહત્વના નિર્ણયો:

• ATFમાં રાહત: સરકારે વિદેશ જતા વિમાનો માટેના ઇંધણ (ATF) પર કસ્ટમ ડ્યુટીમાં રાહત આપી છે.

• હોર્મુઝ બ્લોકેડનો ખતરો: અમેરિકા-ઈઝરાયેલ અને ઈરાન વચ્ચેના સંઘર્ષને કારણે હોર્મુઝની સામુદ્રધુનીમાં સર્જાયેલી અવરોધની સ્થિતિ વચ્ચે આ નિર્ણય લેવામાં આવ્યો છે.

• ગ્લોબલ અપડેટ: આજે સવારે બ્રેન્ટ ક્રૂડના ભાવ ૨.૨૯% ઘટીને ૧૦૫.૫૩ ડોલર અને અમેરિકી WTI ૨.૫૪% ઘટીને ૯૨.૦૮ ડોલર પર ટ્રેડ કરી રહ્યા હતા.

હરદીપ સિંહ પુરીએ આ સમયસરના અને સાહસિક નિર્ણય માટે વડાપ્રધાન નરેન્દ્ર મોદી અને નાણામંત્રી નિર્મલા સીતારમણનો આભાર માન્યો હતો.