ઉમેદવારે 2021ની ચૂંટણીમાં 2.50લાખ ખર્ચયા હતા પણ મળ્યા માત્ર 17 મત
અપક્ષ ઉમેદવારે રૂપિયા પરત માંગતા મતદારોએ કહ્યું, લઈ લો તમારા ત્રણ લાખ પાછા
(એજન્સી)અમદાવાદ, રાજ્યમાં મહાનગરપાલિકા, જિલ્લા પંચાયત, તાલુકા પંચાયતમાં મતદાનને આડે હવે માત્ર ચાર દિવસ બાકી રહ્યા છે ત્યારે આક્ષેપો પ્રતિઆક્ષેપોનો દોર જામ્યો છે. આવી સ્થિતિમાં એએમસીના ચૂંટણી પ્રચાર દરમિયાન એક મીટિંગનો વીડિયો વાયરલ થયો છે
જેમાં લાંભા વોર્ડના અપક્ષ ઉમેદવારે ગત ચૂંટણીમાં આપેલા રૂપિયા અઢી લાખની સામે માત્ર ૧૭ મત મળ્યા હોવાનો બળાપો કાઢતા મતદારો અકળાઈ ગયા હતા. મતદારોએ અગાઉથી જ વ્યવસ્ગા કરીને રાખેલા રોકડા રૂપિયા ત્રણ લાખનું બંડલ આપીને રોકડું પરખાવતા ઉમેદવારે ચાલતી પકડી હતી અને કારમાં બેસીને ભાગી ગયા હતા.
લાંભા વોર્ડમાં ગત ટર્મમાં અપક્ષ ઉમેદવાર તરીકે લડેલા કાળુ ભરવાડ આ બેઠક પર અગાઉ પણ રહ્યા છે. તેઓ પ્રત્યેક ચૂંટણીમાં પ્રચાર દરમિયાન મતદારોને રિઝવવાનો પ્રયાસ કરતા હોય છે. આ વખતે પણ ચૂંટણી પ્રચાર દરમિયાન એક મીટિંગમાં જાહેરમાં બોલતા હતા કે વર્ષ ર૦૧પમાં નાણાં આપ્યા અને વર્ષ ર૦ર૧માં પણ તમારી માંગ પૂરી કરી છે. તો પણ મને વર્ષ ર૦ર૧માં માત્ર ૧૭ મત મળ્યા છે.
તમે મારી સાથે ખોટું કર્યું છે. આ સાંભળી મતદારો અકળાઈ ગયા હતા અને કહ્યું કે તમે અમને ધમકાવવા આવ્યો છો ? તમને બહુ થતું હોય તો તમે આપેલા ર.પ૧ લાખના બદલે આ રૂપિયા ત્રણ લાખ રોકડા તૈયાર છે તમે લઈ જાવ.
આ સાંભળી અપક્ષ ઉમેદવાર કાળુ ભરવાડ ધીરે ધીરે ચાલવા લાગ્યા હતા અને કારમાં બેસીને રૂપિયા રવાના થઈ ગયા હતા. આ પછી મતદારોએ વીડિયોમાં કહ્યું કે પાંચ વર્ષ પછી દેખાયેલા અપક્ષ ઉમેદવાર કાળુભાઈને માતાજીના મઠ માટે આપેલા ર.પ૧ લાખના બદલે ત્રણ લાખ રોકડા આપીએ છીએ. અમારી પાસે નાણાં છે તેઓ કહે તો પરત કરી દઈશું. આ વાયરલ વીડિયોથી સમગ્ર વિસ્તારમાં હોબાળો મચી ગયો છે.
