RTE હેઠળ ૯૭૦૯ ખાનગી સ્કૂલોમાં પ્રવેશ માટે ૨.૫૦ લાખ ફોર્મ ભરાયા

(એજન્સી)અમદાવાદ, ગરીબ અને મધ્યમ વર્ગના પરિવારોના ઓછી આવક ધરાવતા બાળકો ખાનગી શાળાઓમાં ભણી શકે તે માટે આરટીઆઈ હેઠળ ધોરણ ૧માં પ્રવેશ માટેની રાજ્ય સરકારની કોમન પ્રક્રિયામાં ફોર્મ ભરવાની મુદત પૂર્ણ થઈ ગઈ છે.

ફોર્મ ભરવાની મુદતમાં ૬ દિવસ વધુ અપાયા બાદ ભરાયેલા કુલ ફોર્મ વધીને ૨,૪૯,૯૪૬ થયા છે. આમ રાજ્યમાં આરટીઈ હેઠળ ખાનગી શાળાઓમાં અઢી લાખ બાળકોને પ્રવેશ ગુજરાત સરકારના પ્રાથમિક શિક્ષણ વિભાગ દ્વારા ૨૦૨૬-૨૭ના શૈક્ષણિક વર્ષ માટે આર.ટી.ઈ.માં પ્રવેશ માટે ગત ૪ એપ્રિલથી ૧૭ એપ્રિલ સુધી ઓનલાઈન ફોર્મ ભરવાની મુદત આપવામાં આવી હતી.

પરંતુ હાલ ચૂંટણીને પગલે અધિકારીઓ ચૂંટણી કામગીરીમાં હોવાથી આવકના દાખલા સહિતના ડોક્યુમેન્ટમાં વાલીઓને મુશ્કેલી ઉભી થતા ફોર્મ ભરવાની મુદત લંબાવવા માંગ કરાઈ હતી. જેને પગલે સરકારે ફોર્મ ભરવાની મુદત ૬ દિવસ વધારીને ૨૩ એપ્રિલ સુધી કરી હતી, જે ગઈકાલે પૂર્ણ થઈ ગઈ છે.

જેમાં કુલ મળીને ૨,૪૯,૯૪૬ વાલીના ઓનલાઈન ફોર્મ સબમીટ થયા છે. આ વર્ષે રાજ્યમાં ૯૭૦૯ ખાનગી સ્કૂલોમાં ૨૫ ટકા બેઠકો મુજબ ઉપલબ્ધ અંદાજિત બેઠકોની સંખ્યા ૮૪,૨૨૮ છે. જેમાં ગુજરાતી માધ્યમમાં ૪૧,૪૧૧, અંગ્રેજી માધ્યમમાં ૪૦,૨૬૨ અને હિન્દી માધ્યમમાં ૨,૨૩૫ તથા અન્ય માધ્યમમાં ૩૨૦ બેઠકો છે. બે પાળીમાં ચાલતી ૫૬ સ્કૂલો છે.

અમદાવાદમાં આરટીઈ હેઠળ ખાનગી સ્કૂલોમાં ૧૪,૨૦૦ બેઠકો છે, જેના માટે ૩૭,૭૦૦ વાલીના ફોર્મ ભરાયા છે. ગત વર્ષે ૯૩ હજારથી વધુ બેઠકો રાજ્યભરમાં હતી અને જેની સામે ૨.૩૯ લાખ જેટલા ફોર્મ ભરાયા હતા. આમ બેઠકો ઘટવા સામે ૧૧ હજાર વધુ ફોર્મ ભરાયા છે.