અરવલ્લીમાં મુક્ત અને ન્યાયી વાતાવરણમાં ચૂંટણી યોજવા જિલ્લા ચૂંટણી તંત્ર સજ્જ

(પ્રતિનિધિ) મોડાસા, અરવલ્લી જિલ્લાની સ્થાનિક સ્વરાજ્યની સંસ્થાઓની સામાન્ય ચૂંટણી સંદર્ભે અરવલ્લી જિલ્લા ચૂંટણી અધિકારી અને કલેક્ટર શ્રી પ્રશસ્તિ પારીકના અધ્યક્ષસ્થાને કલેકટર કચેરીના સભાખંડ ખાતે પ્રેસ કોન્ફરન્સ યોજાઇ હતી.

જિલ્લા ચૂંટણી તંત્ર દ્વારા ચૂંટણીલક્ષી તૈયારીઓને આખરી ઓપ આપવામાં આવ્યો છે. ચૂંટણીના જાહેર થયેલા કાર્યક્રમ અનુસાર, આગામી ૨૬મી એપ્રિલ ૨૦૨૬, રવિવારના રોજ સવારના ૦૭ઃ૦૦ કલાકથી સાંજના ૦૬ઃ૦૦ કલાક સુધી મતદાન પ્રક્રિયા હાથ ધરવામાં આવશે, જ્યારે ૨૮મી એપ્રિલના રોજ મતગણતરી યોજાશે.

આ પ્રેસ કોન્ફરન્સમાં સંબોધન કરતા જિલ્લા ચૂંટણી અધિકારી અને જિલ્લા કલેક્ટરશ્રી પ્રશસ્તિ પારીકએ જણાવ્યું હતું કે, રાજ્ય ચૂંટણી આયોગ, ગાંધીનગર દ્વારા તા. ૦૧/૦૪/૨૦૨૬ ના રોજ અરવલ્લી જિલ્લાની સ્થાનિક સ્વરાજ્યની સંસ્થાઓ જેવી કે જિલ્લા પંચાયત, તાલુકા પંચાયત, અને નગરપાલિકાઓની સામાન્ય ચૂંટણીઓ માટેનો સત્તાવાર કાર્યક્રમ જાહેર કરવામાં આવ્યો છે. આ જાહેરાતની સાથે જ સમગ્ર અરવલ્લી જિલ્લામાં આદર્શ આચાર સંહિતા અમલમાં આવી ગઈ છે.

જે અંતર્ગત વહીવટી તંત્ર દ્વારા મુક્ત, ન્યાયી અને શાંતિપૂર્ણ વાતાવરણમાં ચૂંટણી યોજવા માટેની તમામ તૈયારીઓ પૂર્ણ કરી લેવામાં આવી છે. કાયદો અને વ્યવસ્થાની સ્થિતિ જળવાઈ રહે અને નાગરિકો નિર્ભય રીતે મતદાન કરી શકે તે માટે પોલીસ તંત્ર અને વહીવટી વિભાગો સાથે સંકલન સાધવામાં આવ્યું છે.

ચૂંટણી સંબંધિત તમામ વિગતો અને આદેશો રાજ્ય ચૂંટણી આયોગની સત્તાવાર વેબસાઇટ પર પણ ઉપલબ્ધ કરાવવામાં આવ્યા છે. જિલ્લા ચૂંટણી તંત્ર તમામ સ્તરે નિષ્પક્ષ અને પારદર્શક ચૂંટણી યોજવા માટે કટિબદ્ધ છે.

આ ઉપરાંત તેમણે વિગતો આપતા જણાવ્યું કે અરવલ્લી જિલ્લાના ગ્રામ્ય અને શહેરી વિસ્તારમાં વ્યાપક મતાધિકારનો ઉપયોગ થાય તે માટે વહીવટી તંત્ર દ્વારા સુચારુ આયોજન કરવામાં આવ્યું છે. જિલ્લાના ગ્રામ્ય વિસ્તારમાં કુલ ૬,૯૯,૧૯૯ મતદારો માટે ૧૦૦૦ મતદાન મથકો ઊભા કરવામાં આવ્યા છે.

નગરપાલિકા વિસ્તારોમાં ૬૨,૪૫૯ મતદારો માટે ૭૧ મતદાન મથકો નક્કી કરવામાં આવ્યા છે. આમ, સમગ્ર જિલ્લામાં વિવિધ મતદાન મથકો પર લોકશાહીના આ પર્વની ઉજવણી કરવામાં આવશે. આ પ્રક્રિયાને સફળ બનાવવા માટે જિલ્લા પંચાયત, તાલુકા પંચાયત અને નગરપાલિકાઓ માટે પુરતી સંખ્યામાં ચૂંટણી અધિકારીઓ અને મદદનીશ ચૂંટણી અધિકારીઓની નિમણૂક કરી દેવામાં આવી છે.

અરવલ્લી જિલ્લામાં આ ચૂંટણીઓ અંતર્ગત જિલ્લા પંચાયતની ૩૦ બેઠકો, ૮ તાલુકા પંચાયતોની કુલ ૧૪૬ બેઠકો, તેમજ મોડાસા અને બાયડ નગરપાલિકાની સામાન્ય ચૂંટણીઓ માટે મતદાન થશે.

આ પ્રેસ કોન્ફરન્સમાં નિવાસી અધિક કલેક્ટરશ્રી ડી.વી.મકવાણા, નાયબ જિલ્લા ચૂંટણી અધિકારીશ્રી ,સહાયક માહિતી નિયામકશ્રી તેમજ પ્રિન્ટ અને ઇલેક્ટ્રોનિક મીડિયાના પત્રકારશ્રીઓ ઉપસ્થિત રહ્યા હતા.