ગાંધીનગર જિલ્લામાં ર૧૧ મતદાન મથક સંવેદનશીલ

ગાંધીનગર, ગાંધીનગર જિલ્લામાં સ્થાનિક સ્વરાજયની ૩ સંસ્થાની સામાન્ય ચૂંટણીના મતદાનની પ્રક્રિયા હાથ ધરવા માટે જિલ્લા ચૂંટણી પંચ એલર્ટ થઈ ગયું છે. સુરક્ષાની સમીક્ષા બાદ જિલ્લાના ચારેય તાલુકાના ગ્રામ્ય વિસ્તારોના કુલ ૮૯ર મતદાન મથકોમાંથી ર૧૧ મથકોને સંવેદનશીલ જાહેર કરવામાં આવ્યા છે. જયારે કલોલ નગરપાલિકા વિસ્તારના ૧૦ર પૈકી ૪ર મતદાન મથકો પર બાજ નજર રાખવા તંત્ર સજ્જ થઈ ગયું છે.

ર૬ એપ્રિલને રવિવારે યોજાનારી સ્થાનિક સ્વરાજ્યની સામાન્ય અને પેટા ચૂંટણી સંદર્ભે વહીવટી તંત્ર અને પોલીસ વિભાગ એકશન મોડમાં છે. ચૂંટણી પ્રક્રિયાને શાંતિપૂર્ણ અને પારદર્શક રીતે સંપન્ન કરવા માટે તંત્ર દ્વારા સંવેદનશીલ મતદાન મથકોની સુરક્ષા અને નાગરિકો માટે હેલ્પલાઈન સહિતનું દ્વિસ્તરીય આયોજન કરવામાં આવ્યું છે.
જિલ્લા ચૂંટણી તંત્ર દ્વારા સુરક્ષાની સમીક્ષા બાદ કુલ ૮૯ર મતદાન મથકોમાંથી ર૧૧ મથકોને સંવેદનશીલ જાહેર કરવામાં આવ્યા છે.

આશરે ર૩.પ ટકા મથકો પર વધારાના પોલીસ જવાનો અને હોમગાર્ડ તૈનાત રહેશે. કલોલ નગરપાલિકાના ૧૦ર પૈકી ૪ર મથકો પર બાજ નજર રાખવામાં આવશે. આ ઉપરાંત ગાંધીનગર તાલુકાના ૮૩ મથકો સહિત દહેગામ અને માણસાના વિસ્તારોમાં પણ વિશેષ સુરક્ષા કવચ ગોઠવવામાં આવ્યું છે.

જે તે વિસ્તારની ચૂંટણીઓના ઘર્ષણના બનાવોને આધારે આ સંવેદનશીલ કેન્દ્રો નકકી કરવામાં આવ્યા છે. આ ઉપરાંત વહીવટી પ્રશ્નો અને આચારસંહિતા ભંગની ફરિયાદોના ત્વરિત નિરાકરણ માટે સેકટર-૧૧ સ્થિત જિલ્લા સેવા સદન ખાતે વિશેષ કન્ટ્રોલ રૂમ શરૂ કરાયો છે. નાગરિકો કોઈપણ સમસ્યા માટે ૦૭૯-૨૩૨૬૫૯૦૦ પર સંપર્ક કરી શકશે.