મોડાસા તાલુકા પંચાયતના પ્રમુખ અને પૂર્વ પ્રમુખની ગઢસમાન બંને બેઠક ઉપર ભાજપમાં ગાબડું પડ્યું
મોડાસા તાલુકા પંચાયતમાં ભાજપ અને કોંગ્રેસ બંનેને ૧૦-૧૦ બેઠકો મળતા ટાઈ સર્જાઈ, શામ દામ દંડ ભેદની નિતીના એંઘાણ
(પ્રતિનિધિ) મોડાસા, મોડાસા તાલુકા પંચાયતની યોજાયેલી સ્થાનિક સ્વરાજ ની ચૂંટણીમાં ૨૦ બેઠકો પૈકી ૧૦ બેઠક ઉપર ભાજપ અને ૧૦ બેઠકો ઉપર કોંગ્રેસે વિજય મેળવ્યો હતો.
મોડાસા તાલુકા પંચાયત ઉપર બંને પક્ષોને ૧૦-૧૦ બેઠક મળતા ટાઈ સર્જાતા હવે ભાજપ અને કોંગ્રેસ વચ્ચે સત્તા મેળવવા માટે શામ દામ દંડ ભેદ ની નીતિ અજમાવાય તો નવાઈ નહીં. કોંગ્રેસે તાલુકા પંચાયતની ચૂંટણીમાં ૧૦ બેઠકો મેળવી કાઠું કાઢ્યું છે અને મૃતપ્રાય થયેલી કોંગ્રેસ માટે મોડાસા તાલુકા પંચાયત સંજીવની બની છે.
અરવલ્લી જિલ્લામાં યોજાયેલી સ્થાનિક સ્વરાજની ચૂંટણીના જાહેર થયેલા પરિણામો ઉમેદવારો માટે ઘાતક અને આંચકા રૂપ આવ્યા હતા. મતદારોએ પોતાનો આક્મક મિજાજ બતાવી હવામાં ઉડતા નેતાઓને જમીન પર લાવી દીધા હતા . મોડાસા તાલુકા પંચાયતની કેટલીક બેઠકો ઉપર મેજર અપસેટ સર્જાયા હતા.
જેમા મોડાસા તાલુકાની લીંભોઈ બેઠક ઉપર પ્રતિષ્ઠા નો જંગ જામ્યો હતો જ્યા લીંભોઈ બેઠકના ભાજપના ઉમેદવાર પૂર્વ તાલુકા પ્રમુખ સ્નેહલબેન મીતકુમાર પટેલ નો કોંગ્રેસના ઉમેદવાર કેનાબેન મણાભાઈ રાઠોડ સામે પરાજ્ય થયો હતો. મોડાસા તાલુકા પંચાયતના પૂર્વ પ્રમુખ બીપીનભાઈ પટેલ ના ગઢ સમાન ગઢા બેઠક ઉપર કોંગ્રેસે મોટું ગાબડું પાડતા કોંગ્રેસ ના ઉમેદવાર મેનીબેન જવાનસિંહ મકવાણા નો નીલમબેન નરેન્દ્રસિંહ ઝાલા સામે વિજય થયો હતો.
ઉલ્લેખનીય બાબતે છે કે ભારતીય જનતા પાર્ટીએ ગઢા બેઠક ઉપર છેલ્લી ઘડીએ ઉમેદવાર મા ફેરફાર કર્યો હતો. મુલોજ તાલુકા પંચાયતની બેઠક ઉપર ભાજપ કોંગ્રેસ અને આપ વચ્ચે ત્રિકોણીય મુકાબલો થયો હતો જેમાં ભાજપ ના ઉમેદવાર ભારતીબેન રમણસિંહ ખાંટ (શહીદવીરનારી) નો વિજય થયો હતો.
જ્યારે ઇટાડી બેઠક ઉપર ભાજપ ના અગ્રણી અને મોડાસા તાલુકા પંચાયતના પૂર્વ કારોબારી અધ્યક્ષ જીવણભાઈ રબારી સતત બીજીવાર જંગી લીડ સાથે ચૂંટાઈ આવ્યા હતા. તેમની જીત સાથે મોટી સંખ્યામા સમર્થકોએ જીતની ઉજવણી કરી હતી. જ્યારે સાકરીયા બેઠક ઉપર પ્રથમ વાર નસીબ અજમાવી રહેલા કોંગ્રેસના ઉમેદવાર અતુલ પટેલે સચિન પટેલ ને હરાવીને જાયન્ટ કિલર સાબિત થયા હતા. સાકરીયા બેઠક ઉપર ઇતિહાસમાં સૌ પ્રથમવાર કોંગ્રેસની જીત થતા સમગ્ર ગામમાં ઉત્સવનો માહોલ જામ્યો હતો.
અરવલ્લી જિલ્લા ની મોડાસા તાલુકા પંચાયતમાં કોનું શાસન આવશે તેના ઉપર સૌની નજર છે, બંને પક્ષોને દસ દસ બેઠક મળતા સત્તાનું સુકાન મેળવવા માટે રાજકીય પાર્ટીઓ કઈ રણનીતિનો ઉપયોગ કરે છે તે જોવું રહ્યું. મતદારોએ પોતાનો અસલી મિજાજ બતાવી ભાજપ કોંગ્રેસ ને ૧૦-૧૦ બેઠકો આપી સૌને ચોંકાવી દીધા છે અને આવનારી વિધાનસભાની ચૂંટણી માટે નેતાઓની ઉંઘ હરામ કરી દીધી છે.
