નવા (રેવાસ)ની દૂધ અને સેવા મંડળીનો સુવર્ણ જયંતિ મહોત્સવ ઉજવાયો
સાબર ડેરીના ચેરમેન શામળભાઈ પટેલે પશુપાલકોને સંબોધી યુવાનોને પશુપાલન ક્ષેત્રે જોડાવા અનુરોધ કર્યો
(પ્રતિનિધિ) હિંમતનગર, ઈડર તાલુકાના નવા (રેવાસ) મુકામે “ધી નવા (ઈ) દૂધ ઉત્પાદક સહકારી મંડળી લિ.” અને “ધી નવા ગામની સેવા સહકારી મંડળી લિ.”ના સુવર્ણ જયંતિ મહોત્સવની ભવ્ય ઉજવણી કરવામાં આવી હતી. કાર્યક્રમમાં સાબર ડેરીના ચેરમેન માનનીય શ્રી શામળભાઈ બી. પટેલ અધ્યક્ષ સ્થાને ઉપસ્થિત રહ્યા હતા.
સહકારના પાયા પર ઉભેલી શ્વેતક્રાંતિને વધુ મજબૂત બનાવવાના સંકલ્પ સાથે આયોજિત આ મહોત્સવમાં ચેરમેનશ્રીએ મોટી સંખ્યામાં ઉપસ્થિત પશુપાલકો અને સભાસદોને સંબોધતા જણાવ્યું હતું કે, સાબર ડેરી આજે દૂધ ઉત્પાદકોના વિશ્વાસ અને સહકારથી સતત પ્રગતિના નવા શિખરો સર કરી રહી છે. તેમણે યુવાનોને પશુપાલન વ્યવસાય સાથે જોડાઈ આધુનિક ટેક્નોલોજી અને સહકારી માળખાનો લાભ લઈ આત્મનિર્ભર બનવા અનુરોધ કર્યો હતો.
ચેરમેનશ્રીએ સાબર ડેરીની વિકાસયાત્રાની માહિતી આપતાં જણાવ્યું હતું કે, ચીજ પ્લાન્ટ તથા રોહતક ખાતે દહીં પ્લાન્ટ જેવા ક્રમબદ્ધ આયોજન અને વિસ્તરણના પરિણામે સાબર ડેરી આજે ૧૦,૦૦૦ કરોડના ટર્નઓવર સુધી પહોંચી છે, જેના સાચા હકદાર દૂધ ઉત્પાદકો છે.
કાર્યક્રમ દરમિયાન ૨૦૦ લીટર દૂધ સંગ્રહથી શરૂઆત કરનાર મંડળીની ૫૦ વર્ષની સફળ સફરને યાદગાર બનાવવામાં આવી હતી. ખાસ કરીને સાબર ડેરીના પૂર્વ ચેરમેન સ્વ. ખેમાભાઈ પટેલના નેતૃત્વમાં મંડળીના વિકાસ અને સહકારી ચળવળને મળેલી ગતિને યાદ કરી તેમને ભાવભીની શ્રદ્ધાંજલિ અર્પણ કરવામાં આવી હતી. પ્રસંગે પૂર્વ ચેરમેનશ્રીઓ, કર્મચારીઓ તથા પ્રગતિશીલ દૂધ ઉત્પાદકોનું સન્માન પણ કરવામાં આવ્યું હતું.
આ પ્રસંગે સાબર ડેરીના વાઈસ ચેરમેન શ્રી ઋતુરાજભાઈ ડી. પટેલ, ડિરેક્ટરશ્રીઓ, એમ.ડી. શ્રી, સેવા મંડળી અને દૂધ મંડળીના ચેરમેનશ્રીઓ, ડિરેક્ટરશ્રીઓ, કર્મચારીઓ, સહકારી આગેવાનો, સેક્રેટરીઓ, વ્યવસ્થાપક કમિટીના સભ્યો તેમજ ગ્રામજનો મોટી સંખ્યામાં ઉપસ્થિત રહ્યા હતા. કાર્યક્રમમાં ગ્રામજનો અને દૂધ ઉત્પાદકોની ઉત્સાહભરી હાજરીએ સમગ્ર મહોત્સવને ભવ્યતા બક્ષી હતી.
