અમદાવાદ દક્ષિણ ઝોનમાં ડીમોલેશન: 4,500 ચો.ફૂટ બાંધકામ દૂર કરી 350 મીટર ટી.પી. રોડ ખુલ્લો કરાયો
જાહેરમાર્ગો પર પાર્ક કરાયેલા 12 અન-અધિકૃત વાહનોને નોટિસ, રૂ. 9,000 વહીવટી ચાર્જ વસૂલ
અમદાવાદ (પ્રતિનિધિ), અમદાવાદ મ્યુનિસિપલ કોર્પોરેશનના દક્ષિણ ઝોન એસ્ટેટ અને નગર વિકાસ ખાતા દ્વારા શહેરના જાહેરમાર્ગોને અવરોધમુક્ત બનાવવા તેમજ અન-અધિકૃત બાંધકામો અને દબાણો દૂર કરવા માટે સઘન કાર્યવાહી હાથ ધરવામાં આવી છે. આ કામગીરી અંતર્ગત ટી.પી. સ્કીમ અમલીકરણ તેમજ દબાણ નિયંત્રણ સંબંધિત વિવિધ સ્થળોએ જરૂરી પગલાં લેવામાં આવ્યા હતા.
ટી.પી. સ્કીમ અમલીકરણ અંતર્ગત જાહેરમાર્ગોને ખુલ્લા કરવાની કામગીરીના ભાગરૂપે ટી.પી. સ્કીમ નં. 53 (ઈસનપુર) વિસ્તારમાં અસલાલીથી કમોડ સર્કલ તરફ જતા સર્વિસ રોડ પર આવેલા 15.00 મીટર પહોળાઈના ટી.પી. રોડ પરથી રોડ કપાતમાં આવતા 18 કોમર્શિયલ યુનિટોના પ્રકારના આધારે કાર્યવાહી કરવામાં આવી હતી.
આ પ્રકારમાં અંદાજે 4,500 ચોરસ ફૂટ જેટલું બાંધકામ સ્વેચ્છાએ દૂર કરવામાં ન આવતાં 1 જૂન 2026ના રોજ અમદાવાદ મ્યુનિસિપલ કોર્પોરેશન દ્વારા કાર્યવાહી હાથ ધરવામાં આવી હતી. આ કામગીરી દરમિયાન 01 જે.સી.બી. મશીન, દબાણ ગાડી તથા દબાણ મજૂરોની મદદથી બાંધકામ દૂર કરવામાં આવ્યું હતું.
જેને પરિણામે અંદાજે 350 રનીંગ મીટર લંબાઈનો ટી.પી. રસ્તો ખુલ્લો કરવામાં આવ્યો હતો, જેથી જાહેરમાર્ગનો મૂળ હેતુ પુનઃસ્થાપિત કરવામાં આવ્યો હતો. દક્ષિણ ઝોન વિસ્તારમાં આવેલા વિવિધ જાહેરમાર્ગો તેમજ બી.આર.ટી.એસ. રૂટ પર નડતરરૂપ દબાણો સામે પણ કાર્યવાહી કરવામાં આવી હતી.
હાથ ધરાયેલી કાર્યવાહીમાં 03 કાયમી રોડ, 06 લારીઓ તેમજ 75 નંગ પરચુરણ માલસામાન/લુઝ દબાણો દૂર કરવામાં આવ્યા હતા. આ દૂર કરાયેલ દબાણ સામગ્રીને ગોડાઉન ખાતે જમા કરાવી જાહેરમાર્ગોને ખુલ્લા કરવામાં આવ્યા હતા.
આ ઉપરાંત જાહેરમાર્ગો પર પાર્ક કરાયેલા 12 અન-અધિકૃત વાહનો સામે નોટિસની કાર્યવાહી પણ હાથ ધરવામાં આવી હતી. વધુમાં દબાણ, અન-અધિકૃત જાહેરખબરના બોર્ડ તથા બ્લોક પેટે કુલ રૂ. 9,000/- નો વહીવટી ચાર્જ વસૂલ કરવામાં આવ્યો હતો.
દક્ષિણ ઝોનના નાયબ નગર વિકાસ અધિકારીએ જણાવ્યું હતું કે જાહેરમાર્ગો પરના દબાણો દૂર કરી માર્ગોને અવરોધમુક્ત રાખવા તેમજ શહેરી વ્યવસ્થાને સુદ્રઢ બનાવવા માટે આવી કામગીરી સતત હાથ ધરવામાં આવી રહી છે.
