કોણ છે સલીમ ડોલા જે ચલાવી રહ્યો છે ગુજરાતમાં દાઉદનું ડ્રગ્સ હેરાફેરીનું નેટવર્ક

મુંબઈ અને ગુજરાતમાં એકસાથે ૨૦ સ્થળોએ દરોડાથી અંડરવર્લ્ડમાં ફફડાટ

દાઉદના ખાસ સલીમનું આંતરરાષ્ટ્રીય ડ્રગ્સની હેરાફેરીનું નેટવર્ક ગુજરાતમાં સક્રિય

તાજેતરમાં જ એપ્રિલની 28 તારીખે નાર્કોટિક્સ કંટ્રોલ બ્યુરો (NCB) એ ‘ઓપરેશન ગ્લોબલ-હન્ટ’ (Operation Global-Hunt) અંતર્ગત તુર્કીમાંથી વોન્ટેડ ડ્રગ સ્મગલર મહોમ્મદ સલીમ ડોલાને ભારત પરત લાવવામાં મોટી સફળતા મેળવી છે.

મુંબઈ, એન્ફોર્સમેન્ટ ડિરેક્ટોરેટની મુંબઈ ઝોનલ ઓફિસે અંડરવર્લ્ડ ડોન દાઉદ ઈબ્રાહિમના નજીકના સાથી અને આંતરરાષ્ટ્રીય ડ્રગ તસ્કર સલીમ ઈસ્માઈલ ડોલાના નેટવર્ક પર મોટી કાર્યવાહી શરૂ કરી છે.

ED Raids 20 Locations in Gujarat, Maharashtra in PMLA Case Against Drug Trafficker Salim Dola

ઈડી ની ટીમે મુંબઈ તેમજ ગુજરાતના સુરત, અંકલેશ્વર અને રાજકોટ સહિત ૨૦ સ્થળોએ એકસાથે દરોડા પાડ્યા છે. આ ઓપરેશન મની લોન્ડરિંગ અને આંતરરાષ્ટ્રીય ડ્રગ્સની હેરાફેરીના કેસ અંતર્ગત હાથ ધરવામાં આવ્યું છે.

આ કાર્યવાહી સલીમ ઈસ્માઈલ ડોલા અને તેના સાથીદારો દ્વારા ચલાવવામાં આવતા એવા ડ્રગ સિન્ડિકેટ સામે છે, જેનું નેટવર્ક કેટલાય દેશોમાં ફેલાયેલું છે અને તે હજારો કરોડ રૂપિયાના ડ્રગ્સ કારોબાર સાથે જોડાયેલું છે. ભારત સરકાર તાજેતરમાં જ સલીમ ડોલાને તુર્કિયેથી પ્રત્યાર્પણ કરીને ભારત લાવી હતી. તપાસ એજન્સીઓ મુજબ, તે લાંબા સમયથી આંતરરાષ્ટ્રીય સ્તરે પ્રતિબંધિત માદક પદાર્થોનું નેટવર્ક ચલાવીને મોટા પાયે ગેરકાયદે કમાણી કરતો હતો.

ઈડી ની આ તપાસ ડ્રગ્સ બનાવવા માટે વપરાતા પ્રીકર્સર કેમિકલ્સના સપ્લાયર્સ, કેમિકલ બિઝનેસના વચેટિયાઓ, સિન્થેટિક ડ્રગ મેફેડ્રોનના ઉત્પાદકો અને વિતરકો પર કેન્દ્રિત છે. આ સિવાય હવાલા ઓપરેટરો અને બેનામી મિલકતોના માલિકોને પણ તપાસના દાયરામાં લેવાયા છે.

પ્રિવેન્શન ઓફ મની લોન્ડરિંગ એક્ટ, ૨૦૦૨ હેઠળ શરૂ કરાયેલી આ તપાસ મુંબઈમાં સલીમ ડોલા અને અન્ય આરોપીઓ સામે નોંધાયેલી અસંખ્ય FIRના આધારે શરૂ કરવામાં આવી છે.

તપાસ દરમિયાન ઈડીને પુરાવા મળ્યા છે કે, આ સંગઠિત ગુનાહિત નેટવર્ક કેમિકલની ખરીદી, ગુપ્ત રીતે મેફેડ્રોનનું ઉત્પાદન, રાજ્યો વચ્ચે ડ્રગ્સની સપ્લાય અને વિદેશમાં તસ્કરી જેવી પ્રવૃત્તિઓ કરતું હતું. ગુના દ્વારા મેળવેલા આ નાણાંને હવાલા ચેનલ દ્વારા ટ્રાન્સફર કરવામાં આવતા હતા અને વિવિધ સહયોગીઓના નામે ચલ-અચલ તેમજ બેનામી મિલકતો ખરીદવા માટે રોકાણ કરવામાં આવતું હતું.

હાલમાં ઈડીની ટીમ આ સમગ્ર નેટવર્કની નાણાકીય ગતિવિધિઓની તપાસ કરી રહી છે. આ તપાસ કેમિકલ ફેક્ટરીઓથી લઈને એકાઉન્ટન્ટ, ચાર્ટર્ડ એકાઉન્ટન્ટ અને અન્ય નાણાકીય સલાહકારોની ભૂમિકા સુધી વિસ્તરેલી છે.

હવાલા દ્વારા મોકલાયેલી રકમનો ઉપયોગ ભારત અને વિદેશમાં ક્્યાં થયો તે જાણવા માટે દરોડા દરમિયાન દસ્તાવેજો, નાણાકીય રેકોર્ડ અને ડિજિટલ પુરાવા એકત્ર કરવામાં આવી રહ્યા છે.

તાજેતરમાં જ એપ્રિલની 28 તારીખે નાર્કોટિક્સ કંટ્રોલ બ્યુરો (NCB) એ ‘ઓપરેશન ગ્લોબલ-હન્ટ’ (Operation Global-Hunt) અંતર્ગત તુર્કીમાંથી વોન્ટેડ ડ્રગ સ્મગલર મહોમ્મદ સલીમ ડોલાને ભારત પરત લાવવામાં મોટી સફળતા મેળવી છે.