પ્રેગ્નેન્ટ કરીના કપૂર લાલ સિંહ ચઢ્ઢાનું શૂટિંગ શરૂ કરશે
મુંબઈ: કોરોના વાયરસ મહામારીના કારણે જાણે લોકોનું જીવન અટકી ગયું છે. મનોરંજન ઈન્ડસ્ટ્રી પણ થંભી ગઈ છે કારણકે આ મહામારી દરમિયાન શૂટિંગ કરવું મુશ્કેલ છે. પરિણામે ફિલ્મોની રિલીઝ પણ પાછી ઠેલાઈ રહી છે. જો કે, હાલમાં જ સરકારે લોકડાઉનના નિયમો હળવા કર્યા હતા જેમાં ગાઈડલાઈન્સના પાલનની સાથે ફિલ્મોના શૂટિંગને મંજૂરી આપવામાં આવી છે. જે બાદ મિસ્ટર પર્ફેક્શનિસ્ટ આમિર ખાને ફિલ્મ ‘લાલ સિંહ ચઢ્ઢા’નું શૂટિંગ શરૂ કર્યું છે. કરીના કપૂર સ્ટાટર આ ફિલ્મના શૂટિંગ માટે આમીર તુર્કી ગયો છે. હવે લેટેસ્ટ રિપોર્ટ મુજબ, કરીના જલદી જ ફિલ્મની ટીમ સાથે મુંબઈમાં શૂટિંગ કરશે.
આમીરે ગ્રીન સિગ્નલ આપ્યા બાદ ફિલ્મના મેકર્સે મુંબઈમાં બે સેટ તૈયાર કરવાનું શરૂ કર્યું છે. રિપોર્ટ પ્રમાણે, આમીર ખાન ઈનડોર શૂટ સાથે શરૂઆત કરવા માગે છે. માટે તેના અને કરીનાના સીન ગોરેગાંવમાં શૂટ થશે, જ્યાં ઘરનો સેટ તૈયાર કરાયો છે.
બેબો સાથે શૂટ કર્યા પછી આમીર ખાન મુંબઈમાં ઊભી કરાયેલી મિલિટ્રી હોસ્પિટલમાં શૂટિંગ કરશે. કરીના બીજી વખત પ્રેગ્નેન્ટ છે ત્યારે આમીર ખાન સુનિશ્ચિત કરી રહ્યો છે કે, એક્ટ્રેસને સેટ પર કોઈ તકલીફ ના પડે. કોરોના મહામારી વચ્ચે કરીના શૂટિંગ કરશે ત્યારે સેફ્ટીનું પૂરતું ધ્યાન રાખવા માટે આમીરે એક સ્પેશિયલ ટીમ રોકી છે.
મીડિયા રિપોર્ટ પ્રમાણે, આમીર ખાને ફિલ્મના ડાયરેક્ટર અદ્વૈત ચંદનને કહ્યું છે કે, જ્યારે કરીના શૂટિંગ માટે હાજર હોય ત્યારે સેટ પર જરૂરિયાત પૂરતી જ ક્રૂ રાખવામાં આવે, વધારાના લોકોને ભેગા ના થવા દે. આમીર અને કરીના ૭ સપ્ટેમ્બરથી મુંબઈમાં આ ફિલ્મનું શૂટિંગ કરવાના છે. મીડિયા રિપોર્ટ મુજબ, સેટ પરના કોઈ સભ્યને કરીના કપૂર પાસે જતાં પહેલા કોવિડ ટેસ્ટ કરાવવાનો રહેશે. ટેસ્ટ નેગેટિવ આવ્યા પછી જ તે કરીના પાસે જઈ શકશે.
કરીના પ્રેગ્નેન્ટ હોવાથી ફિલ્મના મેકર્સ તેનું વિશેષ ધ્યાન રાખી રહ્યા છે. અગાઉ અમારા સહયોગી ઈટાઈમ્સને સૂત્રો પાસેથી જાણવા મળ્યું હતું કે, ‘કરીનાનો બેબી બંપ વીએફએક્સની મદદથી છુપાવી દેવાશે. કરીનાનું ઘણા દિવસોનું શૂટિંગ બાકી છે. જે તે બેબી બંપ વધારે દેખાય તે પહેલા પૂરું કરી દેશે. ઉલ્લેખનીય છે કે, ‘લાલ સિંહ ચઢ્ઢા’ હોલિવુડની ફિલ્મ ‘ફોરેસ્ટ ગમ્પ’ની ઓફિશિયલ હિન્દી રિમેક છે. આ ફિલ્મ પહેલા ક્રિસમસ ૨૦૨૦માં રિલીઝ થવાની હતી. પરંતુ કોરોના વાયરસ મહામારીના કારણે એક વર્ષ માટે પાછી ઠેલાઈ છે. આ ફિલ્મ હવે ક્રિસમસ ૨૦૨૧માં રિલીઝ થશે.
