મહારાષ્ટ્ર સરકારમાં ખાતાઓની ફાળવણી : એકનાથ શિંદેને ગૃહ અને જયંત પાટિલ નાણા મંત્રાલય

મુંબઇ: મહારાષ્ટ્રમાં શિવસેના, એનસીપી અને કોંગ્રેસની ગઠબંધનની સરકારમાં આખરે મંત્રાલયોની ફાળવણી થઈ ગઈ. આ ફાળવણીમાં શિવસેના પાસે મહત્વના ખાતા ગયા છે. ઉદ્ધવ ઠાકરે ની પાર્ટીને ગૃહ મંત્રાલય, પીડબલ્યુડી, શહેરી વિકાસ, ઈન્ડસ્ટ્રી જેવા મંત્રાલય મળ્યા છે. જ્યારે કોંગ્રેસને મહેસૂલ, મહિલા અને બાળ કલ્યાણ, વગેરે મંત્રાલય મળ્યા છે. જ્યારે એનસીપીને ફાળે ગ્રામીણ વિકાસ, જળ સંસાધન, અને નાણા મંત્રાલય આવ્યાં છે.

નોંધનીય છે કે એવી અટકળો હતી કે ભાજપ સાથે 3 દિવસની સરકરામાં દેવેન્દ્ર ફડણવીસ સાથે ડેપ્યુટી સીએમ બનનારા અજિત પવારને ઉદ્ધવ ઠાકરેના નેતૃત્વવાળી સરકારમાં પણ ડેપ્યુટી સીએમ બનાવવામાં આવી શકે છે. જો કે તે અંગેની આજે પણ કોઈ જાહેરાત થઈ નથી. મહારાષ્ટ્રમાં 29મી નવેમ્બરે ઉદ્ધવ ઠાકરેએ મહારાષ્ટ્રના મુખ્યમંત્રી તરીકે કાર્યભાર સંભાળ્યો હતો. ભારે ઉથલપાથલ બાદ મહારાષ્ટ્રમાં શિવસેના કોંગ્રેસ અને એનસીપીની સરકાર બની હતી. વિશ્વાસમત દરમિયાન આ ત્રણેય પક્ષના ગઠબંધન મહાવિકાસ આઘાડીને 169 મત મળ્યાં હતાં.